އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި އިލެކްޝަންތައް ގިނަކަމުން އިލެކްޝަންސް ކޮމިޝަނުގެ ބެޖެޓް ހުސްވާން ކައިރިވެފައިވާ ކަމަށް އެ ކޮމިޝަނުގެ ރައީސް ފުއާދު ތައުފީގު ވިދާޅުވެއްޖެ އެވެ.

މިއަދު ބޭއްވި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުން ފުއާދު ވިދާޅުވީ ކޮންމެ މަހަކު ތިނެއް ނޫނީ ހަތަރު ވަރަކަށް މެންބަރުން އަންހެނުންގެ ކޮމިޓީތަކުން އިސްތިއުފާ ދޭ ކަމަށެވެ. ހުސްވާ ގޮނޑިތަކަށް މެންބަރުން އިންތިހާބުކުރަން ބޮޑު ހޭދައެއް ކުރަންޖެހޭ ކަމަށް ވެސް އޭނާ ވިދާޅުވި އެވެ. އެގޮތުން 150،000 ރުފިޔާ ކޮންމެ ބައި އިލެކްޝަނަކަށް ހަރަދުވާ ކަމަށް ވެސް އޭނާ ވިދާޅުވި އެވެ.

ފުއާދު ވިދާޅުވީ އެ ކޮމިޝަނުގެ ބަޖެޓް ބޮޑު ނުކުރަން ފިނޭންސް މިނިސްޓްރީން ނިންމާފައިވާ ކަމަށެވެ. ފާއިތުވި 14 އަހަރުގެ ތެރޭގައި ކޮމިޝަނުގެ ޒިންމާ ބޮޑުވިޔަސް މުވައްޒަފުންގެ އަދަދަށް މާބޮޑު ބަދަލެއް އައިސްފައިނުވާ ކަމަށް އޭނާ ވިދާޅުވި އެވެ.

ބައި އިލެކްޝަންތަކަށް ބަޖެޓް އިތުރުކޮށްދޭން އެދުމުން އިދާރީ ކަންކަމަށް ދީފައިވާ ބަޖެޓުން އެކަމަށް ހަރަދުކުރަން އަންގާފައިވާ ކަމަށް އޭނާ ވިދާޅުވި އެވެ.

އެފަދައިން ހަރަދުކުރަން ވެއްޖެނަމަ ޖުލައި، އޮގަސްޓް ހިސާބަށް އެ ކޮމިޝަނުގެ މުޅި ބަޖެޓް ހުސްވާނެ ކަމަށް ވެސް ފުއާދު ވިދާޅުވި އެވެ.