ކ. ގާފަރާއި ދިމާ 13 މޭލު ހުޅަނގުން، ނުވަ މީހުންނާ އެކު ދަތުރު ކުރި "އަވި" ނަމަކަށް ކިޔާ ސަފާރީއެއްގައި ރޯވެ އަނދައި ހުލިވެއްޖެ އެވެ.

އެމްއެންޑީއެފް އިން ބުނީ އެ ހާދިސާ ހިނގީ މިރޭ 10:50 ހާއިރު ކަމަށެވެ. އެ ސަފާރީން ތިން ފަތުރުވެރިންނާއި ހަ ފަޅުވެރިން ދަތުރުކޮށްފައިވެ އެވެ. ނަމަވެސް އެއްވެސް މީހަކަށް އަނިޔާއެއް ނުލިބެ އެވެ.

ކޯސްޓް ގާޑު ފަޔާ ލޯންޗާއި ސީ އެމްބިއުލާންސުން ދަނީ އެ މީހުން ސަލާމަތް ކުރުމުގެ މަސައްކަތް ކުރަމުންނެވެ.

ސަފާރީ އުޅަނދުގެ ކްރޫއިންނާއި ފަސެންޖަރުން ތިބީ ސަފާރީގެ ޑައިވިންގް ދޯނީގައި ހެޔޮހާލުގައި ކަމަށާއި ޑައިވިން ދޯނީގައި ތިބި މީހުން މިހާރު ކޯސްޓްގާޑްގެ ސީއެމްބިއުލާސްގެ އެހީތެރިކަމާއެކު ގާފަރަށް ދަތުރުކުރަމުންދާ ކަމަށް ވެސް އެމްއެންޑީއެފް އިން ބުންޏެވެ.

"ރޯވި ސަފާރީ ވަނީ މިހާރު އެއްކޮށް އަޑިޔަށް ގޮސްފައި. ކޯސްޓްގާޑު ހާބަ ކްރާފްޓާއި ފަޔަރު ލޯންޗު ދަނީ އެ ސަރަހައްދުގައި ހަރަކާތްތެރިވަމުން،" އެމްއެންޑީއެފް އިން ބުންޏެވެ.