މިދިޔަ އޭޕްރީލު މަހު ކައިވެނިކުރި ބޮލީވުޑްގެ މަޝްހޫރު ދެ ތަރިން ކަމަށްވާ އާލިއާ ބަޓް އާއި ރަންބީރު ކަޕޫރަށް ދަރިއަކު ލިބެން އުޅޭކަން އިއުލާން އެވެ.

އާލިއާ އާއި ރަންބީރަށް ދަރިޔަކު ލިބޭކަން ހާމަކޮށްފައިވަނީ އާލިއާ އިންސްޓަގްރާމްގައި ހިއްސާކުރި ޕޯސްޓެއްގައި އެވެ. އަދި މި ޕޯސްޓްގައި އާލިއާ ބަނޑުގެ ސްކޭނެއް ހަދަން ހޮސްޕިޓަލެއްގައި އޮވެ ނަގާފައިވާ ފޮޓޯއެއް ވެސް ވަނީ ހިއްސާ ކޮށްފަ އެވެ.

އެ ފޮޓޯގެ ކެޕްޝަނަކަށް ލިޔެފައި ވަނީ "އަވަ ބޭބީ…ކަމިން ސޫން" އެވެ.

އެ ހަބަރު އާލިއާ ހިއްސާ ކުރުމާ އެކުގައި ބޮލީވުޑް އާއި ހޮލީވުޑްގެ ގިނަ އެކްޓަރުން އަންނަނީ ރަންބީރާއި އާލިއާއަށް ތަހުނިޔާގެ ގިނަ މެސެޖްތަކެއް ފޮނުވަމުންނެވެ.

https://www.instagram.com/p/CfS-_HvMhQ8/?hl=en

ދަރިއަކު ލިބެން އުޅޭކަން ދެމީހުން އިއުލާން ކުރިއިރު އެމީހުންގެ ކައިވެންޏަށް އަދި މިވީ ދެމަހެއްހާ ދުވަހެވެ.

ރަންބީރް، 39، އާއި އާލިއާ، 28، ކައިވެނިކުރީ އެޕްރީލް މަހުގެ 14 ގަ އެވެ.

އާލިއާ ބަލިވެއިން ވާހަކަ އިއުލާންކުރިއިރު އޭނާ މިދިޔަ މަހުން ފެށިގެން އަންނަނީ ސޮއިކުރި ފުރަތަމަ ހޮލީވުޑް ފިލްމު "ހާޓް އޮފް ސްޓޯން" ގެ މަސައްކަތް އިނގިރޭސިވިލާތުގައި ކުރަމުންނެވެ.

އާލިއާ އާއި ރަންބީރް އެކީގައި ކުޅުނު ފުރަތަމަ ފިލްމު "ބުރައްމަސްތުރާ" މި އަހަރުގެ ސެޕްޓެމްބަރު 9 ގައި ސިނަމާތަކަށް އަންނާނެ އެވެ. ރަންބީރް މިހާރު އަންނަނީ ހަތަރު އަހަރު ފަހުން އޭނަ ސްކްރީނަށް އަންނަ ފުރަތަމަ ފިލްމު އަންނަ މަހުގެ 22 ގައި ރިލީޒްކުރާ "ޝަމްޝޭރާ" ޕްރޮމޯޓްކުރުމުގެ މަސައްކަތް ކުރަމުންނެވެ.