ބޮލީވުޑްގެ މަޝްހޫރު ބަތަލާ އާލިއާ ބަޓްގެ ފުރަތަމަ ހޮލީވުޑް ފިލްމުގެ ޝޫޓިން ނިންމާލައިފި އެވެ.

އާލިއާ ހޮލީވުޑަށް ތައާރަފްވާ ފިލްމަކީ "ދަ ހާޓް އޮފް ސްޓޯން" އެވެ.

މި ފިލްމުގެ ޝޫޓިން ނިންމާލިކަން އާލިއާ ހާމަކޮށްފައި ވަނީ އޭނާއެކު މި ފިލްމުގައި ފެނިގެންދާ "ވޮންޑާ ވުމަން"ގެ ތަރި ގަލް ގެޑޮޓް އާއެކު ނަގާފައިވާ ފޮޓޯ އިންސްޓަގްރާމްގައި ހިއްސާ ކުރަމުންނެވެ. އަދި އެ ޕޯސްޓްގައި އާލިއާ ބުނެފައި ވަނީ ވަރަށް އަވަހަށް އެނބުރި އަންނާނެ ކަމަށެވެ.

އާލިއާގެ އިތުރުން ގަލް ގެޑޮޓްވެސް އޭނާގެ އިންސްޓަގްރާމްގައި ވަނީ މިފިލްމުގެ ޝޫޓިން ނިންމާލިކަން ހާމަކޮށްފަ އެވެ. އަދި އޭނާގެ އިންސްޓަގްރާމް ސްޓޯރީގައި ވަނީ އާލިއާއަށް ތައުރީފުކޮށް ވާހަކަ ދައްކާފަ އެވެ. އަދި އާލިއާ އަކީ ކުޅަދާނަ ފަންނާނެ ކަމަށް ވެސް ގަލް ވަނީ ބުނެފަ އެވެ.

https://www.instagram.com/p/Cfwi6BcMsok/

މި ދެ މީހުންގެ އިތުރުން ޖެމީ ޑޮނާން ވެސް މި ފިލްމުން ފެންނާނެ އެވެ.

އާލިއާގެ ފުރަތަމަ ހޮލީވުޑް ފިލްމަކީ ހޮލީވުޑްގެ ކުޅަދާނަ ޑައިރެކްޓަރު ޓޮމް ހާޕާ ޑައިރެކްޓްކޮށް ނެޓްފްލިކްސް އިން ގެނެސްދޭ ސްޕައި ތުރިލާއެކެވެ. އެހެން ނަމަވެސް މިފިލްމު ނެޓްފްލިކްސްއިން ދައްކާނެ ތާރީހެއް އިއުލާނެއް ނުކުރެ އެވެ.

އާލިއާގެ ކުރިއަށް ހުރި ފިލްމުތަކުގެތެރޭގައި ރަންބީރު ކަޕޫރާއި އަމީތާބް ބައްޗަން އާއި މައުނީ ރޯއީ އަދި ނަގަރްޖުނާ އާއެކު "ބްރަހަމަސްޓްރާ" ހިމެނެ އެވެ. އަދި ރަންވީރު ސިންގް އާއެކު "ރޮކީ އައު ރާނީ ކީ ޕްރޭމް ކަހާނީ" އާއި ޕްރިޔަންކާ ޗޯޕްރާ އާއި ކެޓްރީނާ ކައިފް އާއެކު "ޖީ ލެ ޒަރާ" ވެސް ހިމެނެ އެވެ.