އެމްޑީޕީ އަލުން މަގުމަތިވެއްޖެނަމަ ތަރައްގީ ނުގެނެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.

ފުވައްމުލައް ސިޓީގައި އެމަނިކުފާނުގެ ކެމްޕެއިން ޖަގަހަ ހުޅުއްވައިދެއްވުމަށްފަހު ރައީސް މިރޭ ވިދާޅުވީ ރާއްޖެއަށް ތަރައްގީ ގެނައުމަށްޓަކައި އެމަނިކުފާނުގެ ވެރިކަން ދަމަހައްޓަން ޖެހޭ ކަމަށެވެ.

ރައީސް ވިދާޅުވީ ރައްޔިތުން މަޖިލީހުގެ އެމްޑީޕީ ބައެއް މެންބަރުންނަށް 2023ގެ ރިޔާސީ އިންތިހާބަށްވުރެ 2024ގައި ބާއްވާ މަޖިލިސް އިންތިޚާބު މުހިންމު ވެގެން އުޅޭތަން ފެންނަ ކަމަށެވެ. ނަމަވެސް ވެރިކަމުގައި ނެތި އެމްޑީޕީއަށް މަޖިލީހުގެ ގޮޑިތައް ކާމިޔާބުކޮށް، މަޖިލީހުގެ މެޖޯރިޓީ ހޯދުމަކީ ކުރެވޭނެ ކަމެއް ނޫން ކަމަށް ވެސް އެމަނިކުފާނު ވިދާޅުވި އެވެ.

"ފުރަތަމަ ކުރަންވީ ކަންކަން އަޅުގަނޑުމެން ފުރަތަމަ ކުރަންވީ. އެއީ 2023 އަޅުގަނޑުމެންނަށް ހޯދުން. މި ޕްރައިމަރީ އަޅުގަނޑަށް ކާމިޔާބު ކޮށްދެއްވުން. އެއަށް ފަހު 2024 އާ މެދު އަޅުގަނޑުމެން ވިސްނަންވީ ވެސް. އަޅުގަނޑުމެންނަށް އެބަ އިނގޭ ރިޔާސީ އިންތިހާބު ކާމިޔާބުވާނެ ގޮތް. އެމަގުން އަޅުގަނޑުމެން ހިނގަންވީ،" ރައީސް ވިދާޅުވި އެވެ.

ރައީސް ވިދާޅުވީ ފުވައްމުލަކު ރައްޔިތުން ބޭނުންވަނީ ތަރައްގީގެ މަގުގައި ކުރިއަށްދާން ކަމަށާއި އެކަން ކުރައްވަން އެމަނިކުފާނު ހުންނެވީ ތައްޔާރަށް ކަމަށެވެ. އަދި ފުވައްމުލަކު ހިމެނޭހެން ހުރިހާ އެމްޑީޕީ މެންބަރުންނާއެކު މި ޕްރައިމަރީ ބޮޑުތަނުން ކާމިޔާބު ކުރައްވާނެ ކަމަށް އެމަނިކުފާނު ވިދާޅުވި އެވެ.