މާދަމާ ބާއްވާ އެމްޑީޕީގެ ވާދަވެރި ރިޔާސީ ޕްރައިމަރީގެ ކެމްޕެއިން ރައީސް އިބްރާހީމް މުހައްމަދު ސޯލިހާއި އެމްޑީޕީގެ ރައީސް މުހައްމަދު ނަޝީދު ނިންމާލައްވައިފި އެވެ.

ކެމްޕެއިން ނިންމާލުމުގެ ހަރަކާތްތައް ދެ ބޭފުޅުން ވެސް ކުރިއަށްގެންދިޔައީ މާލެ އާއި ހުޅުމާލޭގަ އެވެ.

ނަޝީދު މިއަދު ވަނީ އެމަނިކުފާނުގެ ސަޕޯޓަރުންނާއެކު މާލޭގެ މަގުތަކުގައި ހިންގަވާފަ އެވެ. އަދި ރައީސް ސޯލިހު ކެމްޕެއިންގެ ހަރަކާތްތައް ނިންމަވާލެއްވީ ހުޅުމާލޭގައި ބޭއްވި ކެމްޕެއިން ހަރަކާތެެއްގަ އެވެ.

ކެމްޕެއިން ނިންމަވާލެއްވުމުގެ ގޮތުން ރައީސް ވިދާޅުވީ ގޮތުގައި މާދަމާގެ އިންތިހާބު، އެ މަނިކުފާނަށް ބޮޑުތަނުން ކާމިޔާބު ކުރެއްވޭނެ ކަމަށެވެ.

"އަޅުގަނޑު އެދެން ހުރިހާ ބޭފުޅުން ވެސް މާދަމާ ގޮސް ވޯޓުލުމަށް. ވޯޓުލުމާ އެކު އިންތިހާބުގެ ނަތީޖާ ތިބޭފުޅުންނަށް އެނގޭނެ،" ރައީސް ވިދާޅުވި އެވެ.

ކެމްޕެއިން ނިންމާލުމުގެ ހަރަކާތުގައި ނަޝީދު ވާހަކަފުޅެއް ނުދައްކަވަ އެވެ. ނަމަވެސް ރޭ ބޭއްވި ކެމްޕެއިން ހަރަކާތުގައި އެމަނިކުފާނު ވާހަކަފުޅު ދެއްކެވި އެވެ.