ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު އިބްރާހީމް މުއިއްޒު ވެސް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ތާއީދު ކުރައްވަން ނިންމަވައިފި އެވެ.

ފެށުނީއްސުރެ ރައީސް މުހައްމަދު ނަޝީދަށް ތާއީދު ކުރައްވަމުން ގެންދެވި މުއިއްޒު މިރޭ ކުރެއްވި ޓްވީޓެއްގައި ވިދާޅުވީ އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވި ރައީސް އިބްރާހީމް މުހައްމަދު ސޯލިހާއެކު އެ ޕާޓީ އަށް ރިޔާސީ އިންތިހާބު ކާމިޔާބު ކޮށްދިނުމަށް މަސައްކަތް ކުރަން ނިންމާފައިވާ ކަމަށެވެ.

އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ތެރޭގައި ވެސް ވަނީ ނަޝީދަށް ތާއީދު ކުރައްވާ ބައެއް މެންބަރުން ރައީސް ސޯލިހު ފަހަތަށް އަރާވަޑައިގެންފަ އެވެ. އޭގެތެރޭގައި ތުޅާދޫ ދާއިރާގެ މެމްބަރު ހިސާން ހުސެއިން އާއި ފޮނަދޫ ދާއިރާގެ މެމްބަރު މޫސާ ސިރާޖް އާއި ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމްގެ އިތުރުން އިނގުރައިދޫ ދާއިރާގެ މެމްބަރު ހަސަން އަހްމަދު ހިމެނިވަޑައިގަންނަވަ އެވެ.

ޕްރައިމަރީން ބަލިވުމާއެކު ނަޝީދު ވަނީ ޕްރައިމަރީގައި އެމަނިކުފާނު ބޭނުންކުރި ސްލޯގަން "ފިކުރެއްގެ ދިރުން" ގޮފި ހަދައި އެ ގޮތްޕަށް މީހުން ހަމަކުރުމުގެ މަސައްކަތް ފަށައިފަ އެވެ.

އެމްޑީޕީގެ ރިޔާސީ ޕްރައިމަރީގައި ރައީސް ވަނީ 61 ޕަސެންޓުގެ ވޯޓު ހޯއްދަވާފަ އެވެ. އަދި ނަޝީދަށް ލިބިވަޑައިގަތީ 39 ޕަސެންޓެވެ.