ސަރުކާރުގެ ވަޒީރުންނާ ސުވާލުކުރަން މަޖިލީހުގައި ބޮޑު ކިޔޫއެއް އޮތްކަން ހާމަވެއްޖެ އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ވަޒީރުންނާ ސުވާލުކުރެއްވުމަށް ގިނަ އަދަދެއްގެ މެންބަރުން ހުށަހަޅުއްވާފައިވާ ކަމަށެވެ. އެގޮތުން ނަޝީދު ވިދާޅުވީ ވަޒީރުންނާ ސުވާލުކުރެއްވުމަށް މިހާރުވެސް 20 ސުވާލެއް ކިއުގައި އެބައޮތް ކަމަށެވެ.

ރައީސް ނަޝީދު މިކަން ހާމަކުރައްވާފައިވަނީ ޔޯގާ މައްސަލައާ ގުޅިގެން ނޮޅިވަރަމް ދާއިރާގެ މެންބަރު މުހައްމަދު ނަޝީދު ޢަބްދުﷲ (މޮސްޓާ) ހޯމް އެފެއާޒް މިނިސްޓަރު އިމްރާން އަބްދުﷲއާ ސުވާލުކުރުމަށް ތާވަލުކޮށްފައިވަނިކޮށް މޮސްޓާ ހުށަހެޅުއްވި ސުވާލު ރޭގެ ވަގުތެއްގައި އޭނާ އަނބުރާ ގެންދަވުމުންނެވެ.

ރައީސް ނަޝީދު ވިދާޅުވީ ވަޒީރަކާ ސުވާލުކުރެއްވުމަށް ހުށަހަޅުއްވައި ސުވާލުކުރައްވަންވީ ވަގުތު ކައިރިވުމުން ސުވާލު އަނބުރާ ގެންދެވުމަކީ މީގެ ކުރިންވެސް މޮސްޓާ އަމަލުކުރައްވާފައިވާ ގޮތެއް ކަމަށެވެ. އަދި އެފަދައިން މެންބަރުން ކަންކުރެއްވުމުން އެހެން މެންބަރުން ކުރައްވަން އެދިވަޑައިގަންނަވާ ސުވާލުތައް ކިއުގައި އޮވެމެ ފުރުސަތު ގެއްލިގެންދާ ކަމަށެވެ.