މިހާރު ސިނަމާތަކުގައި ދައްކަމުން އަންނަ އަޖޭ ދޭވްގަންގެ "ދްރިޝްޔަމް 3"އަށް ލިބެމުން އަންނަ ބޮޑު ތަރުހީބާއެކު ބޮލީވުޑްގެ އެހެން ފިލްމުތައް ފަސްކުރަމުން އެބަދެ އެވެ.

އެގޮތުން އަޔުޝްމާން ކުރާނާ އާއި ސާރާ އަލީ ޚާންގެ ޖާސޫސީ ފިލްމު "އުޑްތާ ތީރް" ރިލީޒް ކުރުން ވަނީ އޮކްޓޯބަރު 23 އަށް ފަސްކޮށްފަ އެވެ.

މީގެ ކުރިން އޮކްޓޯބަރު 9 ގައި ރިލީޒްކުރަން ނިންމި މި ފިލްމު ފަސްކުރަން ނިންމީ "ދުރިޝްޔަމް 3" ބޮކްސް އޮފީހުގައި ފުރަތަމަ ދުވަހުވެސް 60 ކްރޯޑް ރުޕީސްއަށް ވުރެ ބޮޑު އާމްދަނީއެއް ހޯދައި ބޮޑު ކާމިޔާބީއެއް ހޯދަމުންދާތީ އެވެ.

ފިލްމު އުފެއްދި ފަރާތްތަކުން ނެރުނު ބަޔާނެއްގައި ބުނެފައިވަނީ، ޓްރޭލާއާއި ޕްރޮމޯޝަންތަކަށް އާންމުންގެ ބޮޑު ތަރުހީބެއް ލިބެމުންދާ މި ދަނޑިވަޅުގައި، ސިނަމާތަކުގައި ގިނަ ފިލްމުތަކެއް އެކީގައި އަޅުވައިގެން ވާދަ ކުރުމުގެ ބަދަލުގައި ފިލްމަށް ރަނގަޅު ފުރުސަތެއް ދިނުމުގެ ގޮތުން ރިލީޒް ކުރުން އޮކްޓޯބަރު 23 އަށް ފަސްކުރީ ކަމަށެވެ. މިއީ މާކެޓްގެ ހާލަތަށް ބަލައި ނިންމި ވިސްނުންތެރި ނިންމުމެއް ކަމަށްވެސް އެފަރާތުން ބުނެ އެވެ.

އޮކްޓޯބަރު މަހު ސިނަމާތަކުގައި ބޮޑު ވާދަވެރިކަމެއް އުފެދިފައިވާއިރު، "ދްރިޝްޔަމް 3"ގެ އިތުރުން އޮސްކާ އަށް އިންޑިއާއިން ހުށަހެޅި ފިލްމު "ގޮންދަލް"ގެ ހާއްސަ ޝޯތައް އޮކްޓޯބަރު 9ގައި ފެށުމަށް ވަނީ ހަމަޖެހިފަ އެވެ.

އެއާއެކު އޮކްޓޯބަރު 16 ގައި ރާޖްކުމާރު ރާއޯގެ "ޕްރަހާރު" އާއި ޔަމީ ގޯތަމްގެ "ނަޔީ ނަވެލީ" ވެސް ރިލީޒް ކުރުމަށް ވަނީ ނިންމާފަ އެވެ.

މި ފިލްމުގައި އަޔުޝްމާން ކުޅެނީ ހަނދާން ނެތޭ ބަލި ޖެހިފައިވާ ޕާކިސްތާނުގެ ޖާސޫސެއްގެ ބައެވެ. އޭނާގެ ހަނދާން ނެތުމުގެ ސަބަބުން އޭނާއަށް އަމިއްލަ ގައުމު އޮޅި އިންޑިއާއަށް ތާއީދު ކުރެވޭ ގޮތްވެ އެވެ.

އަޔުޝްމާން ބުނެފައިވަނީ މިއީ އޭނާ މީގެ ކުރިންވެސް ކުޅެމުން އައި ކޮމެޑީ އާއި ގައުމީ ރޫޙު އެކުލެވޭ ތަފާތު ވާހަކައަކަށް ތައްޔާރުކޮށްފައިވާ ފިލްމެއް ކަމަށެވެ.

އާކާޝް އޭ ކޯޝިކް ޑައިރެކްޓްކުރާ މި ފިލްމުގެ މުހިންމު ރޯލުތަކުން އަޔުޝްމާން އާއި ސާރާ އަލީ ޚާންގެ އިތުރުން ރާހުލް ބޯސް، ރާމް ކަޕޫރު، އަދި ގުލްޝަން ގްރޯވަރު ފަދަ މަޝްހޫރު ތަރިން ފެނިގެންދާނެ އެވެ.

އޮކްޓޯބަރު މަހު ބޮކްސް އޮފީހުގެ ވާދަވެރިކަމަށް ބަލައި "އުޑްތާ ތީރް"ގެ އިތުރުން އެހެން ފިލްމުތައް ވެސް ރިލީޒް ކުރުން ފަސް ކުރުމުގެ ފުރުސަތު އެބައޮތް ކަމަށް ހަބަރުތައް ބުނެ އެވެ.