Rasmale mashroou akee bodu olhuvaalumeh, beyruge gulhunthakah burooaraane: Shahid

ޔުނައިޓެޑް އަރަބް އެމިރޭޓްސް (ޔޫއޭއީ)ގެ ކުންފުންޏަކަށް ރަސްމާލެއިން 500 ހެކްޓަރުގެ ބިން ދިނުމަށް ސަރުކާރުން ވެފައިވާ އެއްބަސްވުމަކީ ފެށުނީއްސުރެ އޮޅުވާލުންތަކެއްގެ މައްޗަށް އެކުލެވިގެންވާ ކަމެއް ކަމަށާއި، އޭގެ ސަބަބުން އެކުވެރި ދައުލަތްތަކާ އޮންނަ ހާރިޖީ ގުޅުންތަކަށް ނޭދެވޭ އަސަރުކޮށްފާނެ ކަމުގެ އިންޒާރު ކުރީގެ ފޮރިން މިނިސްޓަރު އަބްދުﷲ ޝާހިދު ދެއްވައިފި އެވެ.

އިދިކޮޅު މައި ޕާޓީ، އެމްޑީޕީގެ ފަސްވަނަ ކޮންގްރެސް ނިންމުމަށް ރޭ ބޭއްވި ހާއްސަ ޖަލްސާގައި ވާހަކަދައްކަވަމުން، އެ ޕާޓީގެ ކުރީގެ ރައީސް އަދި އދ. ގެ އާންމު މަޖިލީހުގެ ރައީސްކަން ވެސް ކުރެއްވި ޝާހިދު ވިދާޅުވީ ފުށިދިއްގަރުފަޅު ނުވަތަ ރަސްމާލެ އެއްބަސްވުމަކީ "ޑިސެޕްޓަސް އަބް އިނީޝިއޯ" ނުވަތަ އުފެދުމުގައި ވެސް މަކަރާއި އޮޅުވާލުން ހިމެނޭ މުއާމަލާތެއް ކަމަށެވެ.

މި ސަރުކާރުން ބޭރުގެ ފަރާތްތަކާއެކު ހަދާ އެއްބަސްވުންތަކުގައި އެއްވެސް ދެފުށް ފެންނަ ހާމަކަންބޮޑު ސިޔާސަތެއް ނެތްކަން ފާހަގަކުރައްވައި ޝާހިދު ވިދާޅުވީ، ރަސްމާލެ މަޝްރޫއުގެ ތަފްސީލުތައް ރައްޔިތުންނަށް ސިއްރުކޮށްފައިވާ ކަމަށެވެ. އެގޮތުން ފަޅު ހިއްކުމަށް ފައިސާ ހަރަދުކުރި ގޮތާއި، ވެލި އެޅުމުގެ ކަންކަމާއި އަދި އީގަލް ހިލްސް ކުންފުންޏާއެކު ވެފައިވާ މުއާމަލާތަކީ ވެސް ބޮޑެތި އޮޅުވާލުންތަކެއް ކަމަށް އޭނާ ތުހުމަތުކުރެއްވި އެވެ.

އޭނާ އިތުރަށް ވިދާޅުވީ، ދައުލަތުގެ މިފަދަ ސިއްރު އެއްބަސްވުންތަކުގެ ސަބަބުން ރާއްޖޭގެ ބޭރުގެ ގުޅުންތަކަށް ބޮޑެތި ބުރޫތަކެއް އަރައި، ގައުމު އިގުތިސާދީ ގޮތުން ނިކަމެތި ހާލަތަކަށް ވެއްޓިގެންދާނެ ކަމަށެވެ. އަދި މިކަމުގެ ސަބަބުން ރާއްޖެ ޑިޕްލޮމެޓިކް ހަތަރުއަނގޮޅިއަކަށް ހުށަހެޅިގެންދާނެ ކަމުގެ އިންޒާރު ވެސް ދެއްވި އެވެ.

ރާއްޖެއަކީ ކުޑަ ގައުމަކަށް ވުމުން ބައިނަލްއަގުވާމީ ގުޅުންތައް ކެނޑުމަކީ އިގުތިސާދަށް ތަހައްމަލު ނުކުރެވޭނެ ވަރުގެ ބޮޑު ގެއްލުމެއްކަން ފާހަގަކުރައްވަމުން ޝާހިދު ވިދާޅުވީ، ދުނިޔެ ބަދަލުވަމުންދާ މި ޒަމާނުގައި އެއް ގައުމު އަނެއް ގައުމާ އޮންނަ ހާރިޖީ ގުޅުމަކީ އިގުތިސާދުގެ މައި ކަންވާރު ކަމަށެވެ. އެ ކަންވާރު ބުރިވެއްޖެނަމަ އޭގެ ހިތި ނަތީޖާ ތަހައްމަލުކުރަން ޖެހޭނީ އާންމު ރައްޔިތުންނާއި ވިޔަފާރިތަކުން ކަމަށް ވިދާޅުވި އެވެ.

ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ނަމުގައި ދައުލަތުގެ ބަޖެޓުން ހަރަދުކޮށްގެން ހިއްކާ ރަސްމާލެއިން 500 ހެކްޓަރުގެ ބިން، 99 އަހަރުގެ މުއްދަތަށް ޔޫއޭއީގެ އީގަލް ހިލްސް ކުންފުންޏަށް ދޫކޮށްލަން ނިންމުމަކީ ގައުމުގެ އަސްލު ގެއްލިގެން ހިނގައިދާނެ ބިރުވެރި ކަމެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. އެ މައްސަލައިގައި އާންމުންގެ ނުރުހުން އަމާޒުވުމުން ސަރުކާރުން ބުނެފައިވަނީ އަސްލު އެއްބަސްވުމުގައި ސޮއިކުރާނީ ގާނޫނަށް ގެންނަންޖެހޭ ބަދަލުތައް ގެނައުމަށް ފަހު ކަމަށެވެ.

މި ސަރުކާރަކީ ނާގާބިލު އަދި އޮޅުވާލުންތަކުގެ މައްޗަށް ބިނާވެފައިވާ ސަރުކާރެއްގެ ގޮތުގައި ސިފަކުރައްވަމުން ޝާހިދު ވިދާޅުވީ، ގައުމުގެ އިގުތިސާދު ފޫގޮސް، ސިއްހީ ނިޒާމާއި ބޯހިޔާވަހިކަމުގެ ސިޔާސަތުތައް މުޅިން ބޮއްސުންލާފައިވާ ކަމަށެވެ. އަދި ވަޒީފާގެ ފުރުސަތުތައް ހަނިވެ، ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ޑޮލަރު މާރުކުރުމުގެ ނަމުގައި ދަންތުރަ ޖައްސާފައިވާ ކަމަށް ވެސް އޭނާ ވިދާޅުވި އެވެ.

ޝާހިދު ވިދާޅުވީ، އެމްޑީޕީގެ އަމާޒަކީ ދޮގު ނުހަދާ، އޯގާތެރި އަދި ރައްޔިތުންގެ ފުދުންތެރިކަން އިތުރުކޮށްދޭނެ ވެރިކަމެއް ގާއިމުކޮށްދީ، މި އަނދިރި ހާލަތުން ގައުމު ސަލާމަތްކުރުން ކަމަށެވެ.