ގާހިރާ (6 ފެބްރުއަރީ) - މިސްރުގެ ޖަލެއްގައި ހައްޔަރުކޮށްފައިހުރި އަލްޖަޒީރާގެ ނޫސްވެރިޔާ މަހްމޫދު ހުސައިން ހަތަރު އަހަރު ފަހުން މިނިވަންކޮށްފި އެވެ.

އަލް ޖަޒީރާގެ ނޫސް އެޖެންސީގެ އެކްޓިން ޑައިރެކްޓާ ޖެނެރަލް އޮފް ނެޓްވޯޓް ނެރުއްވި ބަޔާނެއްގައި މަހްމޫދު ދޫކޮށްލުމަކީ ހައްގަށް ނަސްރު ލިބި އަދި ދުނިޔޭގެ ނޫސްވެރިކަމުގެ މިނިވަންކަމަށް ލިބުނު އިތުރު ކުރިއެރުމެއް ކަމަށް ވިދާޅުވި އެވެ.

ޑައިރެކްޓާ ޖެނެރަލް މުސްތަފާ ސުއާގް ވިދާޅުވިގޮތުގައި މަހްމޫދު ދޫކޮށްލުމުން އުފާކުރާކަމަށާއި، އަދި އެއްވެސް ނޫސްވެރިޔަކު، ނޫސްވެރިކަމުގެ މިނިވަންކަމުގައި އަދާކުރާ ވަޒީފާގެ ގޮތުން މަހްމޫދު ކުރެއްވި ފަދަ ހިތި ތަޖުރިބާ ކުރަންޖެހޭނެ ކަމަށް ގަބޫލު ނުކުރެއްވެ އެވެ.

މަހްމޫދު ހުސައިން މިނިވަންކޮށްފައި ވަނީ އިއްޔެ އެވެ. އަދި ހަތަރު އަހަރުވަންދެން އާއިލާއާއި ދުރުގައި އެއްވެސް ހައްގަކާއިނުލައި ހައްޔަރުކޮށް ޖަލުގައި ބަންދުކޮށްފައި ހުރުމަށް ފަހު މިއަދު މިނިވަނެއްގެ ގޮތުގައި މަހްމޫދަށް އާއިލާއާއި ބައްދަލުކުރުމަށް ފުރުސަތު ލިބުމުން އުފާކުރާ ކަމަށާއި، އަދި މަހްމޫދަށް ކުރިއަށް ދުވަސްތަކަކީ ފާގަތި އަދި ކާމިޔާބު ދުވަސްތަކެއްކަމަށް އެދޭ ކަމަށް ވިދާޅުވި އެވެ.

މަހްމޫދަކީ ކާކު؟

ފްރީލާންސް ނޫސްވެރިއެއްގެ ގޮތުގައި އަލް ޖަޒީރާ ނޫސް އެޖެންސީގައި މަސައްކަތްކުރުމަށްފަހު ފުލްޓައިމް ނޫސްވެރިއެއްގެ ގޮތުގައި އަލްޖަޒީރާއާ ގުޅުނީ 2010ގަ އެވެ. މަހްމޫދަކީ އަރަބް ނޫސްތަކުގައި ގިނަ ދުވަސްތަކެއް ވަންދެން މަސައްކަތްކޮށްފައިވާ ނޫސްވެރިއެކެވެ.

މިސްރުގެ އިދާރާތަކުން މަހްމޫދު ހައްޔަރުކުރީ އާއިލާއާ ބައްދަލުކުރުމަށް ކައިރޯއަށް ވަޑައިގެން އުޅުއްވަނިކޮށް 2016 ޑިސެމްބަރު 23 ވަނަ ދުވަހު އެވެ.

މިސްރުގެ އިންޓީރިއާ މިނިސްޓްރީން މަހްމޫދު ހައްޔަރުކުރި ކަމަށް ބުނެފައި ވަނީ ބޭރު ބައެއްގެ އަތުން ފައިސާ ނަގައިގެން މިސްރުގެ ސަރުކާރާ ދެކޮޅަށް، ސަރުކާރުގެ އަގުވެއްޓޭނެހެން ހަބަރު ފެތުރުމާއި އަދި ދޮގު ހަބަރު ފެތުރުމުން ކަމަށެވެ. އެކަމަކު މަހްމޫދުގެ އިތުރުން އަލް ޖަޒީރާ ނިއުސް އިން ވެސް ވަނީ މިކަން ދޮގުކޮށްފަ އެވެ. މަހްމޫދު ވަނީ އެއްވެސް ދައުވާއެއްނުކޮށް މިސްރުގެ ޖަލުގައި ހަތަރު އަހަރު ވަންދެން ތަހްގީގަށް ބަންދުކޮށްފައި ބަހައްޓާފަ އެވެ.

މަހްމޫދު ހައްޔަރުކުރުމާއެކު އަލް ޖަޒީރާ ނިއުސް އިން ވަނީ މަހްމޫދު ދޫކުރުމަށް ގޮވާލައި ވަރުގަދަ ކެންޕެއިން އެއް ލޯންޗްކޮށްފަ އެވެ. މިސްރުގެ ސަރުކާރުން ވަނީ މަހްމޫދު ހައްޔަރުކޮށް މިސްރުގެ ގާނޫނުގައި އެންމެ ގިނަވެގެން ދައުވާ ކުރުމަކާއި ނުލައި މީހަކު ބަންދުގައި ބެހެއްޓޭނެ ދުވަސްތަކަށް ވުރެ ގިނަ ދުވަސް ވަންދެން ޖަލުގައި ބަހައްޓާފަ އެވެ.

ޖަލުގައި ބެހެއްޓިއިރު ގިނަ ދުވަސްތަކެއް ވަންދެން އެކަހެރިކޮށް އެހެން މީހުންނާ ވަކިން ގެންގުޅުމާއި، ޖަލުގައި ހުއްޓައި 2017 ވަނަ އަހަރު އަތް ބިންދައިގެން ގޮސްގެން ރަނގަޅު އެކަށޭނެ ސިއްހީ ފަރުވާ ނުދިނުމާއި އަދި ނަފްސާނީ ގޮތުންނާއި ޖިސްމާނީ ގޮތުން އެތަކެއް އަނިޔާތަކެއް ވަނީ ދީފަ އެވެ.

މެއި 2019 ގައި މަހްމޫދު ޝަރުތުތަކާއެކު ދޫކުރުމަށް އެ ގައުމުގެ ޕްރޮސެކިޓަރުން ނިންމި އެވެ. ނަމަވެސް އެންމެ ފަހުވަގުތު ވަނީ ވަކި ސަބަބެއް ނާންގައި އަލުން ޖަލަށް ބަދަލުކޮށްފަ އެވެ. ސަރުކާރުގެ އިދާރާތަކުން ފަހުން ބުނީ މަހްމޫދުގެ މައްޗަށް އިތުރު ތަހުގީގުތަކެއް ކުރުމަށް އަލުން ބަންދަށް ބަދަލުކުރަން ނިންމީ ކަމަށެވެ.

މަހްމޫދު ދޫކުރުމަށް ފަހު ދޫކޮށްލި ސަބަބެއް މިސްރުގެ ސަރުކާރުން ހާމަކޮށްފައެއް ނުވެ އެވެ.

އަލް ޖަޒީރާއިން ވަނީ ދުނިޔޭގެ އެކިކަންކޮޅުތަކުގައި ނުހައްގުން ހައްޔަރުކޮށްފައިވާ ނޫސްވެރިން މިނިވަންކުރުމަށް ގޮވާލާފަ އެވެ. – އަލް ޖަޒީރާ