ބޭސްފަރުވާ ކުރުމަށް އެދި ހުށައަޅާ ފަރާތްތަކަށް އޮންނަ އުސޫލުގެ ތެރެއިން އެކަން ހަމަޖައްސައި ދެއްވަމުން އަންނަ ކަމަށާއި މި އަހަރުގެ މިހާތަނަށް 1،922 ޓިކެޓު ރާއްޖެއިން ބޭރަށް ދިޔުމަށް ނަގައިދީފައިވާ ކަމަށް ނޭޝަނަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު ވިދާޅުވެއްޖެ އެވެ.

އާސަންދަ އާއި އެންސްޕާގެ އެހީ ދިނުމުގެ ކަންކަމަށް ރައީސް މުއިއްޒު ނުފޫޒު ފޯރުއްވަމުންދާ ކަމަށާ، އެތަކެއް ސަތޭކަ މީހުންނަށް އެންސްޕާ އެހީ ނުލިބިގެން އިންޑިޔާ އަށް ނުދެވިފައިވާ ކަމަށް ބުނެ ސޯޝަލް މީޑިއާގައި ފަތުރާ ހަބަރުތައް ދޮގުކުރައްވާ އެކްސްގައި ހީނާ ކުރެއްވި ޕޯސްޓެއްގައި ވިދާޅުވީ ބޭސްފަރުވާ ކުރުމަށް އެދި ހުށަހަޅާ ފަރާތްތަކަށް އެ އޮންނަ އުސޫލުގެ ތެރެއިން އެކަން ހަމަޖައްސައިދެނީ އެންސްޕާ އަދި އާސަންދައިގެ ތެރެއިން ކަމަށެވެ. އަދި ބޭސްފަރުވާއަށް މީހުން ފޮނުވުމުގައި ރައީސް އިރުޝާދުދެއްވާ ވަކި އުސޫލެއް ނޯންނަ ކަމަށް ވެސް ހީނާ ވިދާޅުވި އެވެ.

ހީނާ އިތުރަށް ވިދާޅުވީ، ހިނގަމުން މިދާ ޖެނުއަރީ މަހުގެ 1 އިން 25 އަށް ބޭސްފަރުވާއަށް ދިއުމަށް 1،922 ޓިކެޓް ދޫކޮށްފައިވާ ކަމަށެވެ. މީގެތެރެއިން 97.2 ޕަސެންޓަކީ ބޭސްފަރުވާ އަށް އިންޑިއާ އަށް ދިއުމަށް ދޫކޮށްފައިވާ ޓިކެޓް ކަމަށް ވެސް ހީނާ ވިދާޅުވި އެވެ.

ސަރުކާރުން އަންނަނީ ބޭސްފަރުވާ އެއް ގައުމަކަށް ބަރޯސާވުމުގެ ބަދަލުގައި އެހެން ގައުމުތަކަށް ފުޅާކުރެއްވުމަށް ވެސް މަސައްކަތް ކުރައްވަމުންނެވެ. އެގޮތުން އާސަންދަ ސްކީމްގެ ދަށުން ރާއްޖެ އިން ބޭރުން ފަރުވާ ހޯދުމަށް ތައިލެންޑާއި ޔޫއޭއީ އަށް ބަލިމީހުން ފޮނުވުމަށް ސަރުކާރުން ވަނީ ނިންމަވައިފަ އެވެ.

އާސަންދަ ސްކީމްގެ ދަށުން ރާއްޖެ އިން ބޭރަށް ބޭސްފަރުވާ އަށް މި ވަގުތު ފޮނުވަމުން ދަނީ އިންޑިއާ އާއި ސްރީލަންކާއަށެވެ.