ދިވެހި ތަރިކަ ދިރާސާ ކުރާ ގައުމީ މަރުކަޒުގެ ނަމުގައި ރައީސް، ޑރ. މުހައްމަދު މުއިއްޒު ޖެނުއަރީ 18, ގައި އުފެއްދެވި އިދާރާއަށް 30,000ރ. ގެ މުސާރާގައި 10 ވިލަރެސްވެރިންގެ ވަޒީފާއަށް މީހުން ނެގުމަށް އިއުލާނުކޮށްފި އެވެ.

ދިވެހި ގައުމީ ތަރިކަ ދިރާސާކުރާ މަރުކަޒު މިދިޔަ މަހުގެ 18 ގައި އުފެއްދީ ދިވެހި ގައުމިއްޔަތު ދިރުވުމަށެވެ.

ވިލަރެސްވެރިންނަށް މުސާރައިގެ ގޮތުގައި 25,000ރ. ކަނޑައަޅާފައިވާއިރު އެލަވަންސްގެ ގޮތުގައި 5,000ރ. ލިބޭނެ އެވެ. އިތުރު އެލަވަންސަކަށް ހިމަނާފައި ވަނީ ހަމައެކަނި ރޯދަ އެލަވަންސެވެ. މިއީ ދެ އަހަރު ދުވަހުގެ ކޮންޓްރެކްޓް މަގާމެކެވެ.

ދެ އަހަރު ދުވަހަށް ނަގާ އެ ވަޒީފާ އަށް ކުރިމަތިލުމަށް ހުޅުވާލާފައި ވަނީ އަންނަ އަންގާރަ ދުވަހުގެ ނިޔަލަށެވެ.

މަގާމުގެ މައިގަނޑު މަސްއޫލިއްޔަތުތަކާއި ވާޖިބުތައް:

1. ދިވެހިވަންތަކަމުގެ ބަހާތައް ހިމާޔަތްކޮށް، ދިރުވައި އާލާކޮށް ދެމެހެއްޓުމާ ބެހޭ މައުލޫމާތު އެއްކުރުމާއި ދަސްކުރުމާ ދިރާސާކުރުމާއި ހުށަހަޅައިދިނުމުގެ މަސައްކަތް ވިލަރެސް ކުރުން.

2. ދިވެހިވަންތަކަމުގެ ބަހާތަކާ ބެހޭ ދިރާސާތައް ޝާއިއުކުރުމަށް ތައްޔާރުކުރާ ތަކެތީގެ ފުރިހަމަކަން ޗެކްކުރުން.

3. ދިވެހިވަންތަކަމުގެ ބަހާތަކާ ބެހޭ އުފެއްދުންތައް އިތުރުކުރުމުގެ މަސައްކަތްކުރުމަށް ޝައުގުވެރިކަން ހުރުން.

4. ސުޕަވައިޒް ކުރަންޖެހޭ މުވައްޒަފުންގެ މަސައްކަތްތައް ސުޕަވައިޒްކޮށް އެ މުވައްޒަފުންގެ މަސައްކަތު ފެންވަރު ބެލުން.

އެ މަގާމަށް ކުރިމަތިލާ މީހުންގެ ހުންނަން ޖެހޭ ޝަރުތު

1. ބެޗެލާސް ޑިގްރީއެއް ހާސިލު ކޮށްފައިވުމާ އެކު، ތައުލީމީ/ ކިޔަވައިދިނުމުގެ ދާއިރާގައި މަދުވެގެން އެއް އަހަރު ދުވަހުގެ ތަޖުރިބާ ލިބިފައިވާ މީހެއް ކަމުގައިވުން.

2. ޑިގްރީ ނުވަތަ ޑިޕްލޮމާއެއް ހާސިލްކޮށްފައިވުމާ އެކު، މަސައްކަތު ދާއިރާގައި މަދުވެގެން ދެ އަހަރު ދުވަހުގެ ތަޖުރިބާ ލިބިފައިވާ މީހެއް ކަމުގައި ވުން.

3. "ސާނަވީ" ނުވަތަ އެއާ އެއް ފެންވަރުގެ އިމްތިހާނަކުން ދެ މާއްދާއިން ދަށްވެގެން "ޑީ"' ގްރޭޑް ލިބިފައި ވުމާ އެކު، "ސެކަންޑަރީ ސްކޫލް" ނުވަތަ "ހަޔާ ސެކަންޑަރީ ސްކޫލް" ސެޓްފިކެޓް އިމްތިހާނުގައި "ދިވެހި" މާއްދާއިން ދަށްވެގެން "ސީ" ގްރޭޑް ލިބި، ދިވެހިވަންތަކަމުގެ ބަހާތައް ދިރާސާކުރުމަށް ޝައުގުވެރިމުވާ އެކު މަދުވެގެން ތިން އަހަރު ދުވަހުގެ އިދާރީ މަސައްކަތް ކުރުމުގެ ތަޖުރިބާ ލިބިފައިވާ މީހެއް ކަމުގައިވުން

އެ އިން ކޮންމެވެސް އެއް ޝަރުތެއް ފުރިހަމަ ވުމާ އެކު، އެއީ ދިވެހި ބަހާއި އިނގިރޭސި ބަހުން ލިޔަން ކިޔަން އަދި ޕްރެޒެންޓޭޝަން ހުށަހަޅަން އެނގޭ މީހެއް ކަމުގައި ވާން ޖެހެ އެވެ. އެ މަގާމަށް ކުރިމަތިލާ މީހުން ވާން ޖެހެނީ އުމުރުން 35 އަހަރުން ދަށުގެ ބަޔަކަށެވެ.

ދިވެހި ތަރިކަ ދިރާސާ ކުރާ ގައުމީ މަރުކަޒުގެ ނަމުގައި ސަރުކާރުގެ އާ އިދާރާއެއް އުފެއްދުމުގެ ބޭނުމަކީ ދިވެހި ގައުމިއްޔަތު އާލާ ކުރުމުގެ ގައުމީ ނިޒަމުގެ ތެރެއިން ދިވެހި ބަހާއި ތާރީހާއި ސަގާފަތުގެ އިތުރުން ތަރިކަ އާއި އާދަކާދަތަކާއި ގައުމިއްޔަތުގެ އިލްމެއް އުފަންކޮށް ދިރުވައި އާލާ ކުރުމަށާއި ގައުމީ ރޫހު އާލާކޮށް އާންމުކޮށް ދިވެހީންގެ މެދުގައި ގައުމިއްޔަތުގެ އިލްމާއި ވިސްނުން އުފެއްދުމުގެ މަސައްކަތް ކުރުން ކަމަށް ސަރުކާރުން ބުނެ އެވެ.

އެ މަރުކަޒުގެ މަސައްކަތްތަކުގެ ތެރޭގައި ދިވެހިން މެދުގައި ދިވެހިވަންތަކަމާއި ދިވެހިންގެ ހައްގުގައި ހިދުމަތް ކުރުމުގެ ވިސްނުމާއި ރޫހު ދިރުވައި އާލާ ކުރުން ހިމެނޭ ކަމަށް ސަރުކާރުން ބުނެ އެވެ.

އޭގެ އިތުރުން ރާއްޖެ އާއި ދިވެހި ގައުމިއްޔަތާ ގުޅޭގޮތުން އެކިއެކި ބަސްބަހުން ލިޔެފައިވާ ލިޔުންތައް ދިވެހި ބަހަށް ތަރުޖަމާކޮށް ދިވެހިރާއްޖެ އާއި ދިވެހީންނާ ގުޅޭ ގޮތުން ހުރި އެވޭލާ ބަސްމަގުގެ ތަކެތި މިހާރުގެ ބަސްމަގަސް ގެނައުން ހިމެނޭ ކަމަށް ސަރުކާރުން ބުނެ އެވެ.

ދިވެހިބަހާއި ތާރީހާއި ސަގާފަތާ ބެހޭ މިނިސްޓްރީގެ ދަށުން ހިންގައި، ގައުމިއްޔަތު ދިރުވަން އިތުރު ތިން އިދާރާއެއް ވަނީ އުފައްދައިފަ އެވެ. އެއީ ދިވެހި ގައުމީ ތަރިކަ ދިރާސާކުރާ މަރުކަޒާއި ދިވެހި ގައުމީ ތަރިކައިގެ ކޮލެޖު އަދި ދިވެހި ގައުމީ ޗާޕުހާނާއެކެވެ.

ދިވެހިންގެ ގައުމިއްޔަތު ދިރުވައި އާލާކުރުމަކީ ރައީސް ޑރ. މުހައްމަދު މުއިއްޒުގެ ވަރަށް ބޮޑު ވައުދެކެވެ.