ރައީސް މުހައްމަދު މުއިއްޒު ތަސްދީގުނުކުރައްވައި އަނބުރާ ފޮނުވާލި، އިންތިހާބާ ބެހޭ ގާނޫނަށް އިސްލާހު ގެނައުމުގެ ބިލް، ރައީސް ތަސްދީގުކުރަން ލާޒިމްވާ ގޮތަށް، ދެ ވަނަ ފަހަރަށް މަޖިލީހުން މިއަދު ފާސްކޮށްފި އެވެ.

އެ ބިލް ދެ ވަނަ ފަހަރަށް ފާސްކުރީ މަޖިލީހުގައި މިއަދު ނެގި ވޯޓުގައި 47 މެންބަރުންގެ އަޣުލަބިއްޔަތުންނެވެ. މަޖިލީހުގެ ޖުމްލަ މެންބަރުންގެ އަދަދަކީ 87 ކަމަށް ބަލައިފި ނަމަ، އަޣުލަބިއްޔަތަކީ 44 މެންބަރުންނެވެ.

އިންތިހާބާ ބެހޭ ގާނޫނަށް އިސްލާހު ގެނައުމުގެ ބިލް މަޖިލީހުގެ ތަޅުމަށް މިއަދު ހުށަހެޅުމަށް ފަހު، އެ ބިލް ދިރާސާ ކުރަން ކޮމިޓީ އަށް ނުފޮނުވައި މަޖިލީހުން ފާސްކުރަން ހުށަހެޅުއްވީ ފުވައްމުލަކު މެދު ދާއިރާގެ އެމްޑީޕީގެ މެންބަރު ހުސެއިން މުހައްމަދު ދީދީ އެވެ. އެ ހުށަހެޅުމަށް ތާއީދުކުރެއްވީ، ދާންދޫ ދާއިރާގެ މެންބަރު ޔައުގޫބު އަބްދުﷲ އެވެ.

އެ ބިލް ތަސްދީގު ނުކުރައްވައި އަނބުރާ ފޮނުވާލަން ރައީސް ނިންމެވީ މައިގަނޑު ފަސް ސަބަބެއްގެ ދެއްކުމަށް ފަހު އެވެ. ރައީސް އޮފީހުން ބުނީ އެ ބިލް މިހާރު އޮތް ގޮތުން ގާނޫނުއަސާސީގެ ބައެއް މާއްދާތަކާ ފުށުއަރާ ކަމަށެވެ. ކުރިއަށް އޮތް ރައްޔިތުންގެ މަޖިލިސް އިންތިހާބު ރޯދަ މަސް ތެރޭ ނުބާއްވައި، އެ މަސް ނިމިގެން 10 ދުވަސް ފަހުން އެ އިންތިހާބު ބޭއްވުމަށް މަޖިލީހުން މި މަހު 11 ވަނަ ދުވަހު ފޮނުވި ބިލު ތަސްދީގުނުކުރާއްވައި ރައީސް އަނބުރާ މަޖިލީހަށް ފޮނުއްވީ، މިދިޔަ ހޯމަ ދުވަހު އެވެ.

https://hurihaa.mv/28154

ގާނޫނު އަސާސީގައިވާ ގޮތުން މަޖިލީހުން ފާސްކުރާ ބިލެއް ތަސްދީގުކުރަން ރައީސަށް ފޮނުވުމުން 15 ދުވަހުގެ މުއްދަތެއް ލިބެ އެވެ. އަދި އެ މުއްދަތު ތެރޭ ތަސްދީގު ކުރަން ބޭނުން ނުވާ ނަމަ، އަނބުރާ މަޖިލީހަށް އެ ބިލެއް ފޮނުވުމުގެ އިހްތިޔާރު ރައީސަށް އޮވެ އެވެ. ދެވަނަ ފަހަރަށް ބިލު މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްވެއްޖެ ނަމަ، ރައީސް އެ ބިލު ތަސްދީގުކޮށް ސަރުކާރުގެ ގެޒެޓްގައި ޝާއިއު ކުރަން ވާނެ ކަމަށް ވެސް ގާނޫނުއަސާސީގައި ބަޔާންކޮށްފައިވެ އެވެ.

އިލެކްޝަންސް ކޮމިޝަނުން ނިންމާފައި ވަނީ އަންނަ މަހުގެ 17 ގައި މަޖިލިސް އިންތިހާބު ބާއްވާށެވެ. އެކަމަކު، އެމްޑީޕީ އާއި ޑިމޮކްރެޓްސް އިން ބޭނުންވަނީ ރޯދަމަސް ނިމޭތާ 10 ދުވަސް ފަހުން އިންތިހާބު ބާއްވާށެވެ.