ފާއިތުވި ހަ އަހަރުގެ ތެރޭގައި ފުލުހުންނަށް ހުށަހެޅުނު ޖިންސީ ކުށުގެ އަދަދު 2،000 އަށް ވުރެ މައްޗަށް އަރާފައިވާ ކަމަށް ރައްޔިތުންގެ މަޖިލީހުން އެއްކުރި ތަފާސް ހިސާބުތަކުން ދައްކައިފި އެވެ.

ޖިންސީ ގޯނާ އާއި ރޭޕްގެ މައްސަލަތައް އިތުރުވަމުންދާތީ ކަންބޮޑުވުން ފާޅުކުރުމަށް މަޑުއްވަރީ ދާއިރާގެ ކުރީގެ މެމްބަރު އަދި މިހާރު ކައުންސިލް މިނިސްޓަރު އާދަމް ޝަރީފް 2021 ވަނަ އަހަރު ހުށަހެޅުއްވި ގަރާރާ ގުޅިގެން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ޖިންސީ ކުށްތަކާ ގުޅޭ ތަފާސް ހިސާބުތައް ވަނީ އެކުލަވާލާފަ އެވެ.

މި ގަރާރުގެ ދަށުން އެއްކުރެވުނު މައުލޫމާތާއެކު އެކުލަވައިލި ރިޕޯޓެއް 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި ވަނީ ހުށަހަޅާފަ އެވެ.

ކަމާބެހޭ އިދާރާތަކުގެ އިސްވެރިންނާ ސުވާލުކުރުމަށްފަހު އެއްކުރި މައުލޫމާތުގެ މައްޗަށް ބިނާކޮށް އެކުލަވާލި ރިޕޯޓުގައިވާ ގޮތުން ފާއިތުވި ހަ އަހަރުގެ ތެރޭގައި އެންމެ ގިނައިން ޖިންސީ ކުށުގެ މައްސަލަތައް ރިޕޯޓްކޮށްފައި ވަނީ 2020 ވަނަ އަހަރު 487 މައްސަލައަކާ އެކު އެވެ. މިދިޔަ އަހަރު އެންމެ މަދުން ކުށް ރިޕޯޓްކޮށްފައިވަނީ 234 މައްސަލަ އެވެ.

މިދިޔަ 6 އަހަރު ތެރޭ ހުށަހެޅުނު ޖިންސީ ކުށްތަކުގެ އަދަދު

  • 2018: 362
  • 2019: 410
  • 2020: 487
  • 2021: 342
  • 2022: 334
  • 2023: 234

ޖުމްލަ: 2،169 މައްސަލަ

ރައްޔިތުންގެ މަޖިލީހުން އެއްކުރި މައުލޫމާތަށް ބަލާއިރު، ފުލުހުންނަށް ހުށަހެޅޭ މައްސަލަތައް ގިނަ ނަމަވެސް، 2018 ވަނަ އަހަރުން ފެށިގެން 2023 ވަނަ އަހަރާ ހަމައަށް ޕްރޮސިކިއުޓާ ޖެނެރަލްގެ އޮފީހުން ދައުވާ ކުރީ އެންމެ 47 މައްސަލައެއްގަ އެވެ.

މި މައްސަލަތަކުގެ ތެރެއިން ކުށްކުރި މީހާގެ މައްޗަށް ކުށް ސާބިތުވެފައި ވަނީ އެންމެ 10 މައްސަލައަކަށެވެ. ކޯޓުން ނިންމި މައްސަލަތަކުގެ ތެރެއިން އެއް މައްސަލައެއްގައި ދައުވާ ލިބޭ މީހާ ވަނީ މިނިވަންކޮށްފަ އެވެ. އެއް މައްސަލައެއްގައި ދައުވާތައް ބާތިލްކޮށްފައިވާއިރު، އަނެއް މައްސަލަތަކުގެ ޝަރީއަތްތައް ދަނީ ހިނގަމުންނެވެ.