ހދ. އަތޮޅުގެ ބައެއް ރަށްތަކަށް ބިންހެލުމެއްގެ އަސަރުކޮށްފައިވާ ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ.

އެ އިދާރާއިން ބުނީ ހދ. އަތޮޅުގެ ބައެއް ރަށްތަކުގެ ބިންގަނޑަށް ލޮޅުމެއް އައިކަމުގެ ރިޕޯޓުތައް ލިބިފައިވާ ކަމަށެވެ. އެގޮތުން ބެލިބެލުމުން ހަނިމާދޫގައި ގާއިމުކޮށްފައިވާ ބިންހެލުން ރެކޯޑުކުރާ މީޓަރަށް މިރޭ 8:27 ހާއިރު ލޮޅުމެއްގެ އަސަރުކޮށްފައިވާ ކަމަށް ރެކޯޑުކުރެވިފައިވާ ކަމަށް އެ އިދާރާއިން ބުންޏެވެ.

މޫސުމާ ބެހޭ އިދާރާއިން ބުނީ ލޮޅުމުގެ އަސަރެއް ކުރި ނަމަވެސް މީގެ ސަބަބުން ރާއްޖެއަށް ނުރައްކަލެއް ކުރިމަތިވާނެ ކަމަށް ލަފާ ނުކުރެވޭ ކަމަށެވެ.

ބިންހެލުން ރެކޯޑް ކުރާ ވޯލްކެނޯ ޑިސްކަވަރީ އިން މިރޭ ބުނި ގޮތުގައި މި ރޭ ރާއްޖެ ގަޑިން އިރުއޮއްސި 8:26ގައި، ރާއްޖޭގެ ހުޅަނގު އުތުރުން 216 ކިލޯ މީޓަރު ދުރުގައިވާ އަރަބި ކަނޑަށް 4.5 މެގްނިޓިއުޑްގެ ބިންހެލުމެއް އަ އެވެ. އަދި އެ ލޮޅުން އައިސްފައިވަނީ ވަރަށް ތިލަފަށުން، 10 ކިލޯ މީޓަރު އަޑިން ކަމަށާއި ބިންހެލުން އައި ސަރަހައްދު ކައިރީގައި ތިބި ގިނަ ބަޔަކަށް އިހުސާސް ކުރެވިފައިވާ ކަމަށެވެ. އަދި ވަރަށް ފުނުން އަންނަ ބިންހެލުމަށް ވުރެ، ތިލަ ފަށުން އަންނަ ބިންހެލުމުގެ އިހުސާސް އެ ހިސާބެއްގެ ބަޔަކަށް ކުރާ ވަރު ބޮޑުވާނެ ކަމަށް ވެސް އެ ވެބްސައިޓުން ބުންޏެވެ.

މި ދުވަސްވަރު ރާއްޖެއަށް ހުޅަނގުމޫސުމުގެ ވިއްސާރަވެސް ދަނީ ކުރަމުންނެވެ. މި ދުވަސްވަރު ކަނޑުދަތުރު ކުރާ ފަރާތްތަކުން ރައްކާތެރިކަމުގެ ފިޔަވަޅު އެޅުމަށާއި މޫސުމަށް ސަމާލުވުމަށް ކަމާ ބެހޭ އިދާރާތަކުން އިލްތިމާސްކުރެއެވެ.