ރާއްޖޭގައި ބޭނުންކުރާ ވެހިކަލް ޑޮމެއިންތަކުގެ ތެރެއިން 700 އެއްހާ ޑޮމައިންގެ ސައްހަކަން ކަށަވަރު ނުވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

އެ މިނިސްޓްރީގެ މަސައްކަތްތަކާ ބެހޭ ގޮތުން ބޭއްވި ނޫސްކޮންފަރެންސްގައި އަމީން ވިދާޅުވީ މިހާރު ދިމާވެފައި އޮތް ވަގު ޑޮމެއިންގެ މައްސަލަ ހައްލުކުރަން މަސައްކަތްތަކެއް ކުރަމުން އަންނަ ކަމަށެވެ. އަދި މިހާތަނަށް ބެލި ބެލުމުން 1،400 އެއްހާ ޑޮމައިން ރާއްޖޭގައި ބޭނުންކުރާކަން ހޯދިފައިވާ ކަމަށް އަމީން ވިދާޅުވި އެވެ.

މީގެ ތެރެއިން މިނިސްޓްރިއިން ދޫކޮށް، ސައްޙަ ޑޮމައިންގެ ގޮތުގައި ބޭނުންކުރަނީ 700 ޑޮމެއިން. ދެން ހުރި ޑޮމެއިންތަކަކީ އެކަންކަމުގެ ރެކޯޑް އެކަށީގެންވާ ގޮތުގައި ބަލަހައްޓާފައި ނުވާތީ، އެއީ އޭގެ ސައްޙަކަން ކަށަވަރު ނުވާ ޑޮމައިން. މީގެ ތެރޭގައި އެއްވެސް ހުއްދައެއް ނެތި، އަމިއްލައަށް ނަންބަރު ހަދައިގެން އަޅުވައިގެން ބޭނުންކުރާ ޑޮމައިން ނަންބަރުތައް ވެސް އެބަހުރި،" މިނިސްޓަރު ވިދާޅުވި އެވެ.

އަމީން ވިދާޅުވީ ސިސްޓަމުން ފެންނަން ނެތް ޑޮމައިންތައް އިއުލާނުކޮށް، ސައްޙަކަން ކަށަވަރުކުރުމަށް ފުރުސަތު ދޭނެ ކަމަށެވެ.

"ރެކޯޑް ކްލިއާ ކުރާނަން. ސައްހަ ނޫންކަން ޔަގީނުން ވެސް ކަށަވަރުކުރެވޭ ނަންބަރުތައް ކެންސަލް ކުރާނަން،" އޭނާ ވިދާޅުވި އެވެ.

އައު ސަރުކާރު ހަވާލުވި އިރު، ކުރީގެ ސަރުކާރުގައި ރައީސުލްޖުމްހޫރިއްޔާގެ ސިޓީއަކުން އޮތީ ޑޮމެއިންގެ ވިޔަފާރި ހުއްޓާލަން އަންގާފައި ކަމަށް އަމީން ވިދާޅުވި އެވެ. އަދި މިއީ ގާނޫނުން ކަނޑައަޅާފައި އޮތް ޚިދުމަތްކަށްވާއިރު، މައްސަލައަކާ ގުޅިގެން ޑޮމައިން ދޫކުރުން އެއްކޮށް ހުއްޓާލާފައި އޮތުމަކީ ހައްލު ނޫން ކަމަށް ވެސް އޭނާ ވިދާޅުވި އެވެ.

'އަންނަ އަހަރުގެ ބަޖެޓަށް ލައިގެން، އެހެން ގައުމުތަކުގެ ވެސް ޓްރެފިކް ކަންތައްތައް ކޮންޓްރޯލް ކުރުމަށްޓަކައި، ނުވަތަ ރިކޯޑްސް ބެލެހެއްޓުމަށްޓަކައި، މި ޒަމާނަށް ފެތޭ ވަރުގެ ސޮފްޓްވެއާ ނިޒާމެއް ސަރުކާރުގެ ތެރެއިން ޓްރާންސްޕޯޓް މިނިސްޓްރީގެ ތެރޭގައި ގާއިމްކޮށްފައި އަޅުގަނޑުމެން އެކަން [އާ ޑޮމެއިން ވިއްކުން] ކުރާނީ،" މިނިސްޓަރު ވިދާޅުވި އެވެ.

ސަރުކާރުން ވަނީ އިތުރަށް ޑޮމައިން ވިއްކަން ހުޅުވާލާނެކަން އިއުލާންކޮށްފަ އެވެ. މިނިސްޓްރީގެ ތެރެއިން ބޭނުންކުރަމުންދާ ޕޯޓަލް ހަރުދަނާކުރުމުގެ މަސައްކަތާއެކު ޑޮމައިން ވިއްކުމަށް ފުރުސަތު ހުޅުވާލާނެ ކަމަށް އަމީން ވިދާޅުވި އެވެ.

"ކުރިން ވިއްކާފައިވަނީ ތިން ނަންބަރާ ހަތަރު ނަންބަރުގެ ޑޮމައިން. އަލަށް ދޫކުރާ ނަންބަރުގެ ތެރޭގައި އެކެއް ނުވަތަ ދެ ނަމްބަރުގެ ޑޮމައިން ވިއްކަން ހުޅުވާލާނަން،" މިނިސްޓަރު ވިދާޅުވި އެވެ.