ލަފާކުރުންތައް ދައްކަނީ މިފަހަރު ވެސް މޯދީ އިންތިޚާބު ކާމިޔާބު ކުރައްވާނެ ކަމަށް

ނިއު ދިއްލީ (ޖޫން 2) - އިންޑިއާގައި ހަތް ވިޔަވައްސަކަށް ބަހާލައިގެން ކުރިއަށް ގެންދިޔަ އާއްމު އިންތިޚާބު މިފަހަރު ވެސް ކާމިޔާބު ކުރާނީ ބޮޑުވަޒީރު ނަރެންދުރަ މޯދީގެ ކޯލީޝަނުން ކަމަށް ޚިޔާލު ހޯދުމުގެ ވޯޓުތަކުން ދައްކައިފި އެވެ.

އެކަމަކު އިންޑިއާގެ ތަފާތު އެޖެންސީތަކުން މީގެ ކުރިން ނެގި ޚިޔާލު ހޯދުމުގެ ވޯޓުތަކުގެ ނަތީޖާ ދިމާވެފައި ނުވާކަން ތަޖުރިބާކާރުން ފާހަގަކުރެ އެވެ. އެންނަމަވެސް މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އަކީ އެޕްރީލް 19- ޖޫން 1 އަށް ބޭއްވި އިންތިޚާބުގެ އެންމެ ކުރި ހޯދާނެ ޕާޓީ ކަމަށް މިހާތަނަށް ހެދި ލަފާކުރުންތަކުން ދައްކަ އެވެ.

ސަރުކާރެއް އުފައްދަން ބޭނުން ނަމަ ކޮންމެ ޕާޓީއަކަށް ނުވަތަ ކޯލިޝަނަކަށް ވިޔަސް މަދުވެގެން ޕާލަމެންޓުގެ 272 ގޮނޑި ހޯދަން ޖެހެ އެވެ.

ބީޖޭޕީ އިސްވެ އުފައްދާފައިވާ ނޭޝަނަލް ޑިމޮކްރެޓިކް އެކަޔަންސް (އެންޑީއޭ) އިން މި ޓާގެޓަށް އަމާޒުވާނެ ކަމަށް މިހާތަނަށް ނެގި ޚިޔާލު ހޯދުންތަކުން ދައްކަ އެވެ. އެ ކޯލިޝަނުން ޕާލަމެންޓުގެ ތިންބައިކުޅަ ދެބައިގެ އަޣުލަބިއްޔަތެއް ހޯދާނެ ކަމަށް ވެސް ލަފާކޮށްފައިވެ އެވެ.

ވޯޓުލުން އިއްޔެ ނިމުމާ އެކު މޯދީ ކުރެއްވި ފުރަތަމަ ކޮމެންޓުގައި ވެސް ވަނީ ކާމިޔާބު ލިބިއްޖެކަމުގެ އިޝާރާތެއް ދެއްވައިފަ އެވެ.

"އަޅުގަނޑަކަށް ވަރަށް ޔަގީންކަމާ އެކު ދަންނަވަން ކުރޭ އެންޑީއޭގެ ސަރުކާރެއް އިންތިޚާބު ކުރުމަށް ރައްޔިތުން ރެކޯޑް އަދަދަކަށް ވޯޓުދީފައިވާ ކަމަށް،" އެކްސްގައި މޯދީ ލިޔުއްވާފައިވެ އެވެ.

ލަފާކުރުންތައް ދައްކަނީ ކިހިނެއް؟

ބޮޑުވަޒީރު މޯދީ މި އިންތިޚާބާ ކުރިމަތިލެއްވީ ސަރުކާރަށް ބޮޑު މަގްބޫލް ކަމެއް ލިބިފައިވާ ދުވަސްވަރެއްގަ އެވެ. އެކަމަކު އިދިކޮޅު ލީޑަރު ރާހުލް ގާނދީގެ ނޭޝަނަލް ކޮންގްރެސްގެ ފުޅާ ކޯލިޝަނުން ވަނީ އިންތިޚާބުގެ ކެމްޕޭނުގައި ބޮޑު ތާއީދެއް ހޯދައިފަ އެވެ. އެކަމަކު އިންޑިއާގެ ގިނަ އެގްޒިޓް ޕޯލުތައް ބުރަވަނީ މޯދީގެ އެންޑީއޭ ކޯލިޝަނަށެވެ. އެކަމަކު މިއިން އެއްވެސް ޕޯލަކީ އިތުބާރު ހިފޭ އެއްޗެއް ނޫނެވެ. ލަފާ ކުރުންތައް ދައްކަނީ ބޭޖޭޕީ ކޯލިޝަނުން 355-380 އާ ދެމެދުގެ އަދަދަކަށް ގޮނޑި ނަގާނެ ކަމަށެވެ. ރޮއިޓާސް ނިއުސް އެޖެންސީން ލަފާކުރާ ގޮތުގައި ކޮންގްރެސް ކޯލިޝަނަށް ހޯދޭނީ 125-165 އާ ދެމެދުގެ އަދަދެއްގެ ގޮނޑި އެވެ.

ބީޖޭޕީން ޓާގެޓްކޮށްފައި ވަނީ 370 ގޮނޑި ހޯދުމަށެވެ. ނަމަވެސް މިހާރު ލަފާކުރަނީ 327 ގޮނޑި ކާމިޔާބު ކުރެވޭނެ ކަމަށެވެ.

ބޮޑު އިންތިޚާބެއް

އާބާދީގައި 1.4 ބިލިއަން މީހުން ހިމެނޭ ދުނިޔޭގެ އެންމެ ބައިބޯ ގައުމުގައި އިންތިޚާބެއް ބޭއްވުމަކީ ބުރަ އަދި އުނދަގޫ މަސައްކަތެކެވެ. އެހެންވެ އިންތިޚާބު ބާއްވާފައި ވަނީ އެކި ފިޔަވަހިތަކަށް ބަހާލައިގެންނެވެ. އިންތިޚާބުގައި ވޯޓުލުމުގެ ހައްގު 969 މިލިއަން މީހުންނަށް ލިބިގެންވެ އެވެ. މިއީ އެމެރިކާ، ރަޝިޔާ، ޖަޕާން، އިނގިރޭސި ވިލާތް، ބްރެޒިލް، ފްރާންސް އަދި ބެލްޖިއަމްގެ އާބާދީ އެއްކޮށްލުމުންވާ ވަރުގެ އަދަދެކެވެ. އިންޑިއާގައި ވޯޓުލުމުގެ ހައްގު ލިބިގެންވާ ފިރިހެނުންގެ އަދަދަކީ 497 މީހުންނެވެ. އަންހެނުންގެ އަދަދަކީ 471 އެވެ.

އިންތިޚާބުގައި އެތައް ތުހުމަތެއް

އިންތިޚާބުގެ ކެމްޕޭނުގައި އެ ޕާޓީތަކުގެ ވެރިން ވަނީ ވަރުގަދަ ތަގްރީރުތައް ދެއްވައިފަ އެވެ. އަދި ވެރިކަން ކުރާ ޕާޓީގެ މައްޗަށް ވަނީ އެތައް ތުހުމަތެއް ކޮށްފަ އެވެ. މީގެ ތެރޭން އިދިކޮޅު ފަރާތްތަކުގެ އެއް ތުހުމަތަކީ ދިއްލީގެ ޗީފް މިނިސްޓަރު އަރްވިންދު ކެޖްރިވާލްގެ މައްޗަށް ކޮރަޕްޝަނުގެ މައްސަލައެއް ސާބިތުކޮށް އޭނާ ޖަލަށް ލުމަކީ އިންތިޚާބަށް ނުފޫޒު ފޯރުވުން ކަމަށެވެ. ކަފާލާތުގެ ދަށުން މެއި 10 ގައި ކެޖްރިވާލް ދޫކޮށްލި ނަމަވެސް އަނެއްކާވެސް މިއަދު އޭނާ ޖަލަށް ދާން ޖެހޭނެ އެވެ.

އިންތިޚާބުގެ ދުވަސްވަރުގެ އެންމެ ބޮޑު އަނެއް ތުހުމަތަކީ އިންޑިއާގެ މުސްލިމުންގެ ވޯޓުލުމުގެ ހައްގަށް ހުރަސް އެޅުމެވެ.

ރައްޔިތުން ވޯޓުދިނީ ކޮން ކަމަކަށް؟

ބީޖޭޕީގެ ކެމްޕޭނުގައި ވަރަށް ބޮޑަށް ވަނީ ވަތަނިއްޔަތަށް އިސްކަން ދީފަ އެވެ. ބީޖޭޕީގެ އެންމެ ބޮޑު ވައުދު ކަމަށްވާ ރާމް ފައްޅި ވަނީ އިންތިޚާބުގެ ކުރިން ހުޅުވައިފަ އެވެ. އަދި ސަރުކާރުން ވަނީ 400 ބިލިއަން ޑޮލަރުގެ ބޮޑު ވެލްފެއާ ޕްރޮފްރާމެއް ފަށައިފަ އެވެ. ފަގީރުންނާއި ހިންދޫންގެ ބޮޑު އާބާދީއެއް އޮންނަ އިންޑިއާގައި ވޯޓުލީ މީހުން ވަނީ މިކަން ކަމަށް ބަލައިފަ އެވެ.