މިއަހަރު ރާއްޖެއިން ހައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއްޔާއަށް ދިޔަ ހައްޖުވެރިންގެ 4 ވަނަ ގުރޫޕް މިއަދު ރާއްޖެ އަތުވެއްޖެ އެވެ.

މިއަހަރު ރާއްޖެއިން ހައްޖުގެ އަޅުކަން އަދާކުރުމަށް ދިޔަ 1،150 މީހުންގެ ތެރެއިން 1،149 މީހަކު ވަނީ ހައްޖުގެ އަޅުކަން އަދާކޮށްފަ އެވެ.

މިއަހަރު ރާއްޖެއިން ހައްޖަށް ދިޔަ މީހުން އެނބުރި އައިސްފައި ވަނީ 4 ގްރޫޕަކަށް ބަހާލައިގެންނެވެ. ފުރަތަމަ ގްރޫޕްގެ ހައްޖުވެރިން އައީ މިދިޔަ މަހުގެ 24 ވަނަ ދުވަހު އެވެ. އެ ގްރޫޕްގައި 296 މީހަކު އައިސްފައިވެ އެވެ. މީގެ އިތުރުން މިދިޔަ މަހުގެ 28 ވަނަ ދުވަހު 352 ހައްޖުވެރިން ވަނީ އައިސްފަ އެވެ.

ޑޮކްޓަރުންގެ ލަފަޔާއެކު ހައްޖުވެރިންގެ ތެރޭގައި ތިބި ބަލި މީހުން ރާއްޖެ ފޮނުވުމުގެ ގޮތުން މިދިޔަ މަހުގެ 29 ވަނަ ދުވަހު ޚާއްސަ ފްލައިޓެއް ބާއްވާ 25 މީހަކު ރާއްޖެ އައިސްފައިވެ އެވެ. އަދި މިމަހުގެ 1 ވަނަ ދުވަހު 316 މީހަކު އައިރު މިއަދު ރާއްޖެ އައިސްފައި ވަނީ 137 ހައްޖުވެރިންނެވެ.

ހައްޖު ކޯޕަރޭޝަނުން ބުނީ ހައްޖުވެރިންގެ ތެރެއިން ބަލި ދެ މީހަކު އަދި މައްކާގައި އަދިވެސް އެބަތިބި ކަމަށެވެ. އަދި އެ މީހުންގެ އާއިލާގެ މީހުން ވެސް މައްކާގައި މަޑުކޮށްފައިވާ ކަމަށް އެ ކުންފުނިން ބުނެ އެވެ.