ރޯޑް ޑިވަލޮޕްމަންޓް ކޯޕަރޭޝަން ލިމިޓެޑް (އާރްޑީސީ) އިން ހަރަދު ކުޑަކުރުމަށް ފިޔަވަޅުތަކެއް އެޅިކަމަށް މުވައްޒަފުންނަށް އެނގުމާ އެކު، ކުންފުނީގެ ހިނގުން ހަރުދަނާ ކުރުމަށްކަމަށް ބުނެ ބޮޑު މުސާރަ ދީފައި އާ ކޮންސަލްޓަންޓުން ނަގައިފި އެވެ.

އެ ކުންފުނީގެ މުވައްޒަފުންނަށް ބުރާސްފަތި ދުވަހު ފޮނުވި މެމޯއެއްގައި ބުނެފައި ވާގޮތުން 6 ޖުލައި އިން ފެށިގެން އިދާރީ މުވައްޒަފުން ރަސްމީ ގަޑީގައި މަސައްކަތްތައްކޮށް ނިންމުމަށާއި އިތުރު ގަޑީގައި މަސައްކަތް ކުރެވޭނީ ޑިވިޝަންގެ ޖެނަރަލް މެނޭޖަރު މެދުވެރިކޮށް މެނޭޖިން ޑިރެކްޓަރުގެ ހުއްދަ ހޯދައިގެން ކަމަށެވެ. މި މެމޯގެ ކޮޕީއެއް "ހުރިހާ" އަށް ވަނީ ލިބިފަ އެވެ.

އެ ކުންފުނިން ނެރުނު ދެވަނަ މެމޯގައި ވެސް ހަރަދު ކުޑަކުރުމަށް ފިޔަވަޅުތަކެއް އެޅުމަށް ހަމަޖައްސާފައިވެ އެވެ. އެގޮތުން ކޮންމެހެން ކުރަންޖެހޭ މަރާމާތު ފިޔަވާ އިތުރު މަރާމާތު ނުކުރުމާއި ދަތުރުތައް މަދުކުރުން ފަދަ ފިޔަވަޅުތައް އެޅުމަށް ނިންމާފައިވާ ކަމަށް މެމޯގައިވެ އެވެ.

ހަރަދު ކުޑަކުރުމަށް ފިޔަވަޅުތަކެއް އެޅުމަށް ނިންމި ކަމަށް އެނގުމާއެކު ހަމަ އެދުވަހު ވަނީ ކުންފުންޏާ ގުޅުނު އާ ދެ ކޮންސަލްޓަންޓުންގެ މަސައްކަތަށް އެއްބާރުލުން ދިނުމަށް މުވައްޒަފުންނަށް އަންގާ މެމޯއެއް ނެރެފަ އެވެ. މި ދެ ކޮންސަލްޓަންޓުން ނަގާފައި ވަނީ ކޯޕަރޭޝަންގެ މަސައްކަތް ހަރުދަނާ ކުރުމުގެ ގޮތުން ހިއުމަން ރިސޯސް މަސައްކަތާއި ރިޕެއާ އެންޑް މެއިންޓިނެންސް މަސައްކަތް ހަރުދަނާ ކުރުމަށް ކަމަށް މެމޯގައިވެ އެވެ.

އާރުޑީސީން މާލޭގެ މަގެއް ހެދުމުގެ މަސައްކަތްކުރަނީ. ފޮޓޯ: އާރުޑީސީ

އާރްޑީސީން ހަރަދު ބޮޑުވެގެން ހަރަދު ކުޑަކުރަން އެންގުމަށްފަހު ބޮޑު މުސާރަ ދީފައި ކޮންސަލްޓަންޓުން ނެގުމަކީ ހަގީގަތުގައި ވެސް ހަރަދު ކުޑަކުރުންތޯ ސުވާލު އުފެދެ އެވެ.

ހަރަދު ކުޑަކުރުމަށް އާރްޑީސީ އިން މަސައްކަތް މި ފެށީ ސަރުކާރުން ހަރަދު ކުޑަކުރުމަށް ގެންގުޅުއްވާ ސިޔާސަތާ އެއްގޮތަށް ކަމަށް ބެލެވެ އެވެ. ސަރުކާރުން ހަރަދު ކުޑަކުރުމަށް އިއުލާން ކުރެއްވި ނަމަވެސް ބޮޑު މުސާރަ ދީފައި މަގާމުތަކަށް މީހުން ނަގަމުން ދެ އެވެ. އެގޮތުން ފާއިތުވި ހަފުތާ ތެރޭގައި އިތުރު ސިޔާސީ މަގާމު ދިނުމާއި އިސްލާމިކް މިނިސްޓަރުގެ ދަރިކަލުންނަށް އެއްލައްކަ ރުފިޔާއަށް ވުރެން ގިނައިން މުސާރަ ލިބޭ ގޮތަށް ވަނީ މެލޭޝިޔާ އެމްބަސީން ވަޒީފާ ދީފަ އެވެ.