ސްޓްރެސް ވުމުން "ބަނޑު ސަކަރާތް" ވަނީ ކީއްވެ؟
އެމެރިކާއިން އަލުން ހަމަލާތައް ފަށަނީ، އީރާނުން އިންޒާރު ދީފި
ޕީއެންސީގެ މީހުންގެ މައްސަލަ ބަލާކަށް ނުކެރޭނެ: ޔާމީން
ގޭބަންދަށް ބަދަލުކުރުމަށް ކަނޑައަޅާފައިވާ ޝަރުތެއް ކަމުގައިވާ 12.26 މިލިއަން އެމެރިކާ ޑޮލަރުގެ ޖޫރިމަނާ ދެއްކޭނެ ގޮތެއް ނެތް ކަމަށް މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގު ވިދާޅުވެއްޖެ އެވެ. ނަޖީބުގެ ގާނޫނީ ޓީމުން ނެރުނު ބަޔާނެއްގައި ބުނެފައިވަނީ، މާފު ދިނުމުގެ ޝަރުތެއްގެ ގޮތުން ދައްކަންޖެހޭ 50 މިލިއަން މެލޭޝިއަން ރިންގިޓް (12.26 މިލިއަން ޑޮލަރު) ދެއްކުމަކީ މިވަގުތު އޭނާއަށް ކުރެވެން އޮތް ކަމެއް ނޫން ކަމަށެވެ.
ޝަފީ އެންޑް ކޯ އިން ނެރުނު މި ބަޔާނުގައި ބުނެފައިވަނީ، ނަޖީބުގެ މިލްކިއްޔާތުގައިވާ ގިނަ އަދަދެއްގެ މުދަލާއި، ބޭންކު އެކައުންޓުތަކާއި، އިމާރާތްތައް ހުރީ ސަރުކާރުން ފިޔަވަޅު އަޅައި ފްރީޒްކޮށްފައި ކަމަށެވެ. އެހެންކަމުން އެ ތަކެތި ބޭނުންކުރުމުގެ ފުރިހަމަ ބާރު އޭނާއަށް ލިބިގެން ނުވާ ކަމަށް ބަޔާނުގައިވެ އެވެ. މި ހާލަތާ ގުޅިގެން، ކަނޑައެޅިފައިވާ ޝަރުތު ފުރިހަމަކުރުމަށްޓަކައި އެންމެ އެކަށީގެންވާ ގޮތަކީ ކޮބައިތޯ ބަލައި، ގާނޫނީ ލަފާ ހޯދަމުންދާ ކަމަށްވެސް ބުނެފައިވެ އެވެ.
މެލޭޝިއާގެ ރަސްގެފާނު ސުލްތާން އިބްރާހީމް އިސްކަންދަރު މިދިޔަ ހުކުރު ދުވަހު ދެއްވި ލުޔާއެކު، ނަޖީބަށް ވަނީ 23 އޮގަސްޓް 2028 އާ ހަމައަށް އޭނާގެ ޖަލު ހުކުމުގެ ބާކީ ބައި ގޭބަންދުގައި ހޭދަކުރުމުގެ ފުރުސަތު ލިބިފަ އެވެ. މިކަމާ ގުޅިގެން ނަޖީބު ވަނީ އޭނާއަށް އެހީތެރިކަން ފޯރުކޮށްދޭ ފަރާތްތަކަށް ޝުކުރު އަދާކުރައްވާފަ އެވެ. ވަކިން ހާއްސަކޮށް، އޭނާގެ ޕާޓީ ކަމަށްވާ ޔޫއެމްއެންއޯ ގެ ރައީސް އަދި ބޮޑުވަޒީރުގެ ނައިބު އަހުމަދު ޒާހިދު ހާމިދީއަށް ނަޖީބު ޝުކުރު އަދާކުރެއްވި އެވެ.
އެހެންނަމަވެސް، ނަޖީބުގެ ބަޔާނުގައި ބުނެފައިވަނީ އޭނާގެ ސަބަބުން ޕާޓީގެ މެންބަރުންނާއި އާންމު ރައްޔިތުންނަށް އެއްވެސް ބުރައެއް އުފުލަންޖެހުމަކީ އޭނާ އެދޭ ގޮތް ނޫން ކަމަށެވެ. އަމިއްލަ އިހުތިޔާރުގައި އެހީތެރިކަން ފޯރުކޮށްދޭ ފަރާތްތަކުގެ ހެޔޮކަން ފާހަގަކުރައްވައި، އެއީ އޭނާއަށް ލިބޭ ވަރަށް ބޮޑު ހިތްވަރެއް ކަމަށް ވިދާޅުވި އެވެ.
ނަޖީބަށް އެހީވުމަށް ޔޫއެމްއެންއޯ އިން ހުޅުވި ފަންޑަށް ފުރަތަމަ ތިން ގަޑިއިރު ތެރޭގައި 634،000 ރިންގިޓް ލިބިފައިވާއިރު، ހޮނިހިރު ދުވަހުގެ ހެނދުނާ ހަމައަށް އެއް މިލިއަން ރިންގިޓް ހަމަވެފައިވާ ކަމަށް އެ ޕާޓީން ބުނެ އެވެ. ޕާޓީގެ ސެކްރެޓަރީ ޖެނެރަލް އަޝްރަފް ވަޖުދީ ދުސޫކީ ވިދާޅުވީ ގިނަ ބަޔަކު ކުދި އަދަދުތަކުން އެހީވަމުންދާ ކަމަށާއި، އެހީތެރިކަން އިތުރުކުރުމަށް އެދޭ ކަމަށެވެ.
ނަޖީބަށް ގޭބަންދުގެ ފުރުސަތު ދިނުމަށް ނިންމީ ރަސްގެފާނު ރިޔާސަތު ބެލެހެއްޓެވި މާފުދޭ ބޯޑުގެ ބައްދަލުވުމުގަ އެވެ. ސަރުކާރުގެ ގާނޫނީ އިދާރާއިން ހާމަކޮށްފައިވާ ގޮތުގައި، މި ލުއި ލިބޭނީ 50 މިލިއަން ރިންގިޓްގެ ޖޫރިމަނާ ދެއްކުން ހިމެނޭހެން ހުރިހާ ޝަރުތުތަކެއް ފުރިހަމަކުރުމުންނެވެ. ޝަރުތަކާ ހިލާފުވެއްޖެ ނަމަ، މި ލުއި ބާތިލުވެ އަލުން ޖަލަށް ދާންޖެހޭނެ އެވެ.
ނަޖީބުގެ މައްޗަށް ކުރިން އިއްވާފައިވަނީ 12 އަހަރުގެ ޖަލު ހުކުމަކާއި 210 މިލިއަން ރިންގިޓްގެ ޖޫރިމަނާއެކެވެ. އެއީ 1އެމްޑީބީ ގެ ސަބްސިޑިއަރީ ކުންފުންޏަކުން އޭނާގެ އަމިއްލަ އެކައުންޓަށް ފައިސާ ޖަމާކުރި މައްސަލައިގަ އެވެ. 2024 ގެ ޖެނުއަރީގައި ލިބުނު ލުޔާއެކު ޖަލު ހުކުމުގެ މުއްދަތު ދެބައިކުޅަ އެއްބަޔަށް ކުޑަކޮށް، ޖޫރިމަނާ ވަނީ 50 މިލިއަން ރިންގިޓަށް ތިރިކޮށްފަ އެވެ.
ޖޫރިމަނާ ދެއްކުމާ ހަމައަށް ނަޖީބު ހުންނަވާނީ ކާޖަންގް ޖަލުގަ އެވެ. މިކަމާ ގުޅިގެން ހިތްހަމަނުޖެހުން ފާޅުކުރައްވައި، މެލޭޝިއާގެ ޓްރާންސްޕޯޓް މިނިސްޓަރު އެންތަނީ ލޯކް ވަނީ އިސްތިއުފާ ދެއްވާފަ އެވެ. އެހެންނަމަވެސް، ބޮޑުވަޒީރު އަންވަރު އިބްރާހީމް ވިދާޅުވީ މާފުދޭ ބޯޑުގެ ނިންމުމުގެ ސަބަބުން ކޮރަޕްޝަނާ ދެކޮޅަށް ސަރުކާރުން ކުރާ މަސައްކަތަށް އެއްވެސް ބުރުލެއް ނާރާނެ ކަމަށެވެ.
މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގު ގޭބަންދަށް
މަލްޓި ބިލިއަން ޑޮލަރުގެ ކޮރަޕްޝަނަށް ފަހު ނަޖީބު މާފަށް އެދިއްޖެ
