ރައީސް މުހައްމަދު މުއިއްޒުއާ ގާތް ވުމަށް ސިހުރު ހެދި ކަމުގެ ތުހުމަތުގައި ހައްޔަރުކުރި އެންވާރަންމަންޓް މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އާއި އޭނާގެ ކޮއްކޮ ބަންދު ކުރި މައްސަލަ ހައިކޯޓަށް ހުށަހަޅައިފި އެވެ.

ޝަމްނާޒް އަދި އޭނާގެ ކޮއްކޮ ބަންދު ކުރި މައްސަލަ ހައިކޯޓަށް ހުށަހަޅާފައި ވާކަމަށް ހައިކޯޓް ރަޖިސްޓްރީން ދައްކާއިރު، މިހާރު އެ ދެ މީހުން ވަނީ ދޫކޮށްލާފަ އެވެ. ބަންދުގައި ބޭތިއްބުމަށް ނުފެންނާތީ ދޫކޮށްލި ނަމަވެސް އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.

ސިހުރު ހެދުމުގެ ތުހުމަތުގައި، ޖޫން މަހުގެ 26 ވަނަ ދުވަހު، ޝަމްނާޒާއި އިތުރު ދެ މީހަކު ހައްޔަރުކުރި އެވެ.

ޝަމްނާޒް އާއި އޭނާގެ ކޮއްކޮ ސަނާ މި މައްސަލައިގައި ހައްޔަރުކުރިއިރު ތިބީ ސަރުކާރުގެ ސިޔާސީ މަގާމުތަކުގަ އެވެ. އެގޮތުން ޝަމްނާޒް އަކީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރެވެ. އަދި އޭނާގެ ކޮއްކޮ އަކީ ހަމަ އެ މިނިސްޓްރީގެ ސީނިއާ ޕޮލިޓިކަލް ޑިރެކްޓަރެކެވެ. ނަމަވެސް މިހާރު އެ ދެ މީހުން ވެސް މަގާމުން ވަކިކޮށްފައިވާކަމަށް ބައެއް މީޑިއާތަކުން ރިޕޯޓްކޮށްފައިވެ އެވެ.

ޝަމްނާޒް ކުރިން ކައިވެނިކޮށްގެން އުޅުނީ މިހާރު ސަސްޕެންޑް ކޮށްފައިވާ ރައީސުލްޖުމްހޫރިއްޔާ އޮފީހުގެ މިނިސްޓަރު އާދަމް ރަމީޒާ އެވެ. ނަމަވެސް އެ ކައިވަނި ނިމުމަކަށް އައިސްފައިވާ ކަމަށް މި މައްސަލައިގެ ތެރެއިން ވަނީ ހާމަވެފަ އެވެ.