ރާއްޖޭގައި މިހާތަނަށް ހިންގި އެންމެ ބޮޑު ވައްކަމުގެ މުގުލުގައި ހުރި، ކުރީގެ ނައިބު ރައީސް އަހުމަދު އަދީބު 20 އަހަރަށް ޖަލަށްލުމާއެކު ދެ މިލިއަން ރުފިޔާ އިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކުރިތާ މިހާރު ހަ މަސްވާން ކައިރިވީއިރު ވެސް އޭނާ ހުންނެވީ އަރާމުގައި ހަމަޖެހިލައިގެން ގޭގަ އެވެ. އެ ވައްކަމުގައި ބައިވެރިވި އަދީބުގެ އެކުވެރިޔާ އަބްދުﷲ ޒިޔަތު ވެސް ހުންނެވީ ޖަލު ހުކުމަށްފަހު ދުވަސްކޮޅަކު ގޭގަ އެވެ.

އަދީބު ގޭ ބަންދުކޮށްފައި ހުރުމުން އެތައް ބަޔަކު ދަނީ ރައީސް އިބްރާހިމް މުހައްމަދު ސޯލިހަށާއި ސަރުކާރަށް ވަރަށް ބޮޑަށް ފާޑުކިޔަމުންނެވެ. އެމްއެމްޕީއާރުސީގެ ޚިޔާނާތާ ގުޅުވައިގެން ދައުވާ އުފުލައި ފަސް އަހަރުގެ ޖަލު ހުކުމެއް ކުރީގެ ރައީސް އަބްދުﷲ ޔާމީންގެ މައްޗަށް އިއްވައި އެމަނިކުފާނު ޖަލުގައި ބަންދުކޮށްފައިވާއިރު، އަދީބު ގޭގައި ބަންދުކޮށްފައި ބެހެއްޓުމަކީ ގަބޫލުކުރެވޭނެ ކަމަކަށް ނުވެ އެވެ.

ތިލަފަތުގެ ދެކޮޅު ހަމަހަމަ ދައްކާ ޕާޓީއަކުން ވެރިކަންކުރާއިރު ރައީސް ޔާމީން ޖަލުގައި ބަންދުކޮށް، ދައުލަތުގެ އެތައް މިލިއަން ރުފިޔާއެއް ވަގަށް ނެގި ކަމަށް އަމިއްލައަށް އިއުތިރާފުވި އަދީބު ގޭގައި ބަންދުކޮށްފައި ބަހައްޓަން ޖެހޭ ފޮރުވިފައިވާ ކޮންމެ ވެސް ސިއްރެއް އޮންނާނެ އެވެ.

އަދީބު ގޭގައި ބަންދުކޮށްފައިވާ ސަބަބެއް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވާ ނިދާ މެޝިނެއް އަދީބަށް ބޭނުންވާ ކަމަށް ބުނާ ވާހަކައަކީ ބުއްދި ގަބޫލުކުރެވޭ ކަހަލަ ވާހަކައަކަށް ނުވެ އެވެ. އަދީބު ޖަލުގައި ބަންދުކޮށްފައި ބެހެއްޓިއަސް އެ މެޝިނެއް އެތަނަށް ގެންގޮސް ބޭނުންކުރެވޭނެ ގޮތް ހޯމް މިނިސްޓްރީއަށް ހަމަޖެއްސޭނެ އެވެ.

މެޝިނެއްގެ ނަމުގައި އަޅުވައި، އަދީބު ގޭގައި ބަހައްޓަނީ ރައީސް ސޯލިހާއި އަދީބާ ދެމެދު ހެދިފައިވާ ސިޔާސީ ޑީލެއްގެ ދަށުން ކަމަށް ވަރަށް ބޮޑަށް ގަބޫލުކުރެވެ އެވެ. އެ ޑީލަކީ ރައީސް ޔާމީނާ ދެކޮޅަށް ކުރާ ހުރިހާ ދައުވާއެއްގައި ދައުލަތާ އެއްކޮޅަށް ހެކި ބަސްދޭން އަދީބު އެއްބަސްވުން ނުވަތަ 2018ގެ ރިޔާސީ އިންތިހާބުގެ ދުވަސްވަރު ކެމްޕޭންކުރަން އެމްޑީޕީއަށް އޭނާ ކުރި ހަރަދުގެ ބަދަލުގެ ގޮތުގައި އަދީބު ގޭގައި ބަހައްޓައި ދިނުން ކަމަށް ބެލެވެ އެވެ. ކޮންމެ ގޮތެއް ވިޔަސް އަދީބު ގޭ ބަންދަށް ބަދަލުކުރި ފަހުން އޭނާގެ ގެންދަނީ ރައީސް ޔާމީނާ ދެކޮޅަށް ވަރަށް ޖޯޝާއި ފޯރީގައި، ނިތްކުރިއަށް ރުލެއް ވެސް ނާރުވައި ހެކި ބަސް ދެމުންނެވެ. އެހެންވެ އަދީބު ޖަލަށް ބަދަލުކުރަން ރައީސް ސޯލިހު ފަސްޖެހިވަޑައިގަންނަވަނީ މިފަދަ ސަބަބުތަކާހެދި ކަމަށް ބެލެވެ އެވެ.

ކުރިން ވެސް ގޭގައި ބަންދުކޮށްފައި ހުއްޓާ ޓަގު ބޯޓެއްގައި ފިލައިގެން އިންޑިއާއަށް އެތެރެވާން އުޅެނިކޮށް އަތުލައިގަތް އަދީބު މިހާރު ވެސް ހުންނާނީ ދެމިގަންނާނެ އެފަދަ ފުރުސަތަކަށް ބަލަބަލަ އެވެ. އޭނާއަކީ ކުރީގެ ޓޫރިޒަމް މިނިސްޓަރު އަލީ ވަހީދު ގޮތަށް ފިލުމުގެ މާބޮޑު ހުނަރެއް ނެތް މީހެއް ނަމަވެސް، ސިޔާސީ މީހުން ބޮލަށް ސަވާރުވެގެން ލުއި ހޯދަން މަސައްކަތްކުރަން އެނގޭނެ އެވެ. މިހާރު ވެސް ގޭ ބަންދުގައި އެ ހުރެވެނީ އެ ސަބަބާ ހެދި ކަމަށް ބެލެވެ އެވެ.

ކޮންމެ ގޮތެއް ވިޔަސް 20 އަހަރު ދުވަހުގެ ޖަލު ހުކުމެއް އިއްވާފައިވާ މީހަކު މުއްދަތެއް ނެތް ގޮތަށް ގޭގައި ބަންދުކޮށްފައި ބެހެއްޓުމަކީ ޖަލު ހުކުމެއް ތަންފީޒުކުރުން ކަމަށް ނުބެލެވޭނެ އެވެ. ތާރީހު ދުށް އެންމެ ބޮޑު ވައްކަމުގެ މޭސްތިރިޔާ، ގޭބަންދުގައި ބެހެއްޓުމަކީ ކުދި ކުދި އެހެން ވައްކަމުގައި ޖަލު ހުކުމް ތަންފީޒުކުރާ އާދައިގެ މީހުންނަށް ކުރެވޭ މަލާމާތެކެވެ. ތިލަފަތުގެ ދެކޮޅު ހަމަހަމަވާން ޖެހެ އެވެ.