ރަސްމާލެ މަޝްރޫއަށް ހިނގާ ހަރަދު ސިއްރުކޮށްފި

ރައީސް ޑރ. މުހައްމަދު މުއިއްޒުގެ ސަރުކާރުން ހިންގަން ނިންމި ބޯހިޔާވަހިކަމުގެ އެންމެ ބޮޑު މަޝްރޫއުގެ ދަށުން ހިއްކާ ފުށިދިއްގަރުފަޅުގެ މަޝްރޫއަށް ހިނގާ ހަރަދު ސިއްރުކޮށްފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން އެ މަޝްރޫއާ ގުޅޭ ބައެއް މައުލޫމާތު ހޯދަން ފުރަތަމަ އެދުނީ އިންފްރާސްޓްރަކްޗާ މިނިސްޓްރީގަ އެވެ. އެ މިނިސްޓްރީން އެންގީ އެ މައުލޫމާތު ހޯދަން އެޗްޑީސީއަށް ހުށަހެޅުމަށެވެ. އެހެންވެ އެޗްޑީސީއަށް މައުލޫމާތު ހޯދަން ހުށަހެޅި ބައެއް ސުވާލުތަކަށް އެ ކުންފުނިން މިއަދު ވަނީ ޖަވާބު ދީފަ އެވެ.

އެޗްޑީސީން ބުނީ ރަސްމާލޭގެ ނަމުގައި ހިންގާ ފުށިދިއްގަރުފަޅު ހިއްކުމުގެ މަސައްކަތް މިދިޔަ ޖޫން މަހު އަލުން ފަށައި ކުރިއަށްދަނީ، މަސައްކަތް ނިމުމުން އެ ކުންފުނިން ދިވެހި ރުފިޔާއިން އަގު އަދާކުރާ މޮޑެލްއަށް ކަމަށެވެ.

އެޗްޑީސީން ބުނިގޮތުގައި ފުށިދިއްގަރުފަޅު ހިއްކުމުގެ މަޝްރޫއުގެ މަސައްކަތް ކުރުމަށް ތިން ފަރާތަކާ ހަވާލުކުރެވިފައިވެ އެވެ. އެއީ، ސީއާރުސީސީއާއި، އެމްއެމް އެކްސްޕޯޓް އަދި ސީއެމްސީސީ އެވެ. ސީއެމްސީސީގެ ޑްރެޖިން ޕާޓްނަރަކީ ބޮސްކާލިސް އެވެ.

ފުށިދިއްގަރުފަޅުން ހިއްކަން ހަމަޖެހިފައިވަނީ ޖުމްލަ 1009 ހެކްޓަރުގެ ބިމެވެ. އަދި މި މަޝްރޫއުގެ ދަށުން ޖުމްލަ 1153 ހެކްޓަރުގެ ސަރަހައްދެއް ތަރައްގީކުރާނެ އެވެ. އެ މަޝްރޫއުގެ މަސައްކަތް މި އަހަރުގެ ނިޔަލަށް އެއްކޮށް ނިންމަންޖެހޭ ކަމަށް އެ ކުންފުނިން ބުންޏެވެ.

އެ މަޝްރޫއަށް ހަރަދުވާ ފައިސާގެ އަދަދު ހޯދަން ކުރި ސުވާލުގެ ޖަވާބުގައި އެޗްޑީސީން ބުނެފައި ވަނީ ވިޔަފާރިއަށް ގެއްލުންވެދާނެތީ އެ މައުލޫމާތު ހާމަކުރެވެން ނެތް ކަމަށެވެ.

ފުށިދިއްގަރު ފަޅު ހިއްކުމުގެ މަޝްރޫއަށް ދައްކަންޖެހޭ ފައިސާގެ އަދަދު އެޗްޑީސީން ސިއްރުކޮށްފައިވާއިރު، މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ރައީސް ޑރ. މުހައްމަދު މުއިއްޒު ވިދާޅުވެފައި ވަނީ މި ސަރުކާރުން ފޮރުވާނެ އެއްވެސް ކަމެއް ނޯންނާނެ ކަމަށެވެ.