ޔަހޫދީން ފަލަސްތީނުގެ ގާޒާ ސިޓީގެ ނަސްލު ނައްތާލުމަށް ހިންގަމުންދާ ގަތުލްއާންމަށް 366 ދުވަސް، އެއް އަހަރު ވެފައިވާއިރު، މިހާތަނަށް 41،909 މީހުން ޝަހީދުވެ، 11،000 އަށްވުރެ ގިނަ މީހުން ގެއްލިފައިވާކަމަށް ތަފާސްހިސާބުތަކުން ދައްކަ އެވެ. ޝަހީދުވި މީހުންގެ ތެރޭގައި 17،000 އަށްވުރެެ ގިނަ ކުޑަކުދިންނާއި އަންހެނުން ހިމެނެ އެވެ.

މިދިޔަަ އަހަރުގެ އޮކްޓޯބަރު 7 ގައި އިޒްރޭލުން ގާޒާ އަށް ހަމަލާދޭންފެށި ފަހުން މިހާތަނަށް ލައްކައަކާ ގާތްކުރާ އަދަދަކަށް މީހުން ޒަހަމްވެފައިވެ އެވެ. އަދި ގާޒާގެ އާބާދީގެ ބޮޑުބަޔަކީ ގެދޮރު ގެއްލިފައިވާ މީހުނެވެ.

މަގުތަކާއި އިމާރާތްތައް ސުންނާފަތިވެފައިވާ ގާޒާ އިން ފެންނަނީ މާޔޫސްކަމާއި ހިތްދަތިކަމެވެ. އިޒްރޭލުން ހުއްޓުމެއްނެތި ހަމަލާތަށް ދީ ބިމާ ހަމަކޮށްފައިވާ ގާޒާގެ އިންފްރާސްޓްރަކްޗާގެ 75 ޕަސަންޓްވަނީ ހަލާކުކޮށްލާފަ އެވެ.

ގާޒާގެ ސުންނާފަތިވެފައިވާ ސަރަހައްދެއް

"މީ އަހަރެންގެ ގެ، ގޭން ބާކީ ފެންނަން ހުރި އެއްޗަކީ މީ. ބިމާ ހަމަނުވެ ހުރީ ކުޑަކުޑަ ތަންކޮޅެއް. އަހަރެންގެ ހުރިހާ ހުވަފެންތަކެއް ވަނީ ވިއްސި ވިހާލިވެފައި" ހަމަލާއެއްގައި ކުދިކުދިވެފައިވާ ގެއެއްގެ ކައިރީގައި ހުރެ ގާޒާގެ ރަބަބު މަގްހަރީ ބުންޏެވެ.

"ހިތަށްއަރާ މީ ހުވަފެނެއް ނަމައޭ، އޭރުން ހުވަފެނުން ހޭލާ ކުރީގެ ދިރިއުޅުމަށް ރުޖޫއަވެވޭނޭ. ނަމަވެސް އަހަރެމެންގެ ގެއްލިގެން ދިޔަ އާއިލާ މެންބަރުންނާ ގެދޮރާ އެއްވެސް އެއްޗެއް އަނބުރާ ނުލިބޭނެ. އަދި މިހެން އުޅެންވީ ކިހާދުވަހަކު؟ އަހަރެމެން ދެން އަބަދުވެސް އުޅެންވީ މިހެންތަ؟ އަހަރެމެނަކަށް އެއްވެސް އުފަލެއް އެއްވެސް ރައްކާތެރިކަމެއް ނެތް" އެކަނިވެ ހިތްމަރުވެފައިވާ ގާޒާގެ މަންމައަކު ކިޔާދީފައިވެ އެވެ.

ދުނިޔޭގެ ކޯޓުގައި އިޒްރޭލުގެ މައްޗަށް ނަސްލުނައްތާލުމުގެ ދައުވާތަކާއި، އެ ގައުމުގެ ބޮޑުވަޒީރާއި ދިފާއީ ވަޒީރަށް އިންޓަނޭޝަނަލް ކްރިމިނަލް ކޯޓް (އައިސީސީ) އިން ހަނގުރާމައިގެ ޖަރީމާތަކުގެ ދައުވާ އުފުލާފައިވީނަމަވެސް، އިޒްރޭލުން އަންނަނީ އަސްކަރީ ހަމަލާތައް ހުއްޓުމެއް ނެތި ގާޒާއަށް ދެމުންނެވެ. މި ހުރިހާ ކަމަކާއެކު ބައިނަލްއަޤްވާމީ ޤާނޫނުތަކުން ފަލަސްތީނަށް ލިބެންވާ ރައްކާތެރިކަން ކަށަވަރުކޮށް ނުދެވި އދ ފަދަ ބައިނަލްއަޤްވާމީ އޯގަނައިޒޭޝަންތައް ފެއިލްވެފައިވާކަމަށް ގިނަ ބަޔަކު ގަބޫލުކުރެ އެވެ.

ފަލަސްތީނަށް އިޒްރޭލުން ދެމުންދާ ހަމަލާތަކާ ދެކޮޅަށް ވަރަށް ގިނަ ގައުމުތަކުން ދަނީ އަޑުއުފުލަމުން

އިސްލާމީ ގިނަ ގައުމުތަކަށް ފަލަސްތީނަށް އިޒްރޭލުން ދެމުންގެންދާ ހަމަލާތައް ކުށްވެރިކުރުން ނޫން އިތުރު މުހިއްމުކަމެއް މިކަމާ ދެކޮޅަށް ނުކުރެވޭއިރު، ހަނގުރާމަ ފެށުނު އިރުން ފެށިގެން ފަލަސްތީނުގެ ދިފާއުގައި އިޒްރޭލަށް ހަމަލާ ދެމުންދިޔަ ލުބުނާނުގެ ހިޒްބުﷲ ޖަމާއަތާ ދެކޮޅަށް އިޒްރޭލުން މިހާރު ދަނީ އެގައުމަށް ހަމަލާ ދެމުންނެވެ.