އޭދަފުއްޓަށް ޚާއްސަ "ބިންބި ތެލޭ" އަކީ ތަފާތު ފޮނި ހެދިކާއެއް

ބިންބިއަކީ ދިވެހިންގެ ތެރޭގައި ޚައްސަ ފޮނި ކެއުން ތައްޔާރު ކުރުމަށް ބޭނުން ކުރާ ގޮވާމުގެ ބާވަތެކެވެ. ހަށިގަނޑަށް ވެސް ފައިދާހުރި ބިންބި އަކީ ކެލްސިއަމް ގިނަ، ގަވައިދުން ބޭނުން ކުރުމުން ހަކުރު ބަލިޖެހުމުގެ ފުރުޞަތު ކުޑަކޮށްދޭ ވެސް އެއްޗެކެވެ. އިހު ޒަމާނުގައި ބިންބި ފުށް ހިލައިގެން ކުޑަކުދިންނަށް ކާންދީ ވެސް އުޅުނެވެ.

ބިންބިން އާންމުކޮށް ތައްޔާރުކުރާ ފޮނި ކާތަކެތީގެ ތެރޭގައި މާފުށް ފާހަގަކޮށްލެވެ އެވެ.

ބ. އޭދަފުއްޓަށް ޚާއްސަ "ބިންބި ތެލޭ" އަކީ ވެސް ބިންބިން ތައްޔާރު ކުރާ ވަރަށް މީރު ފޮނި ކާއެއްޗެކެވެ. ޑޯނަޓެއްގެ ބައްޓަމަށް ތައްޔާރު ކުރާ މި ހެދިކާ އަކީ ހަވީރު ސަޔަށް ވެސް، އަދި ހުހާ ކާލަންް ވެސް ވަރަށް ކަމުދާ އެއްޗެކެވެ. ބިންމި ތެލޭ އެންމެ މީރުކޮށް ހަދާ މީހެއް ކައިރިން އެހަދާގޮތް އޮޅުން ފިލުވައިލީ އޭގެ މީރު ރަހަ ބަލާލަން ބޭނުންވެފައިވާ މީހުނަށް ކޮންމެ ވެސް ސިފައެއްގައި އެ ރަހަ އަރު ތެރޭގައި ލައްވައި ދިނުމުގެ މަގުސަދުގަ އެވެ.

ބިންބި ތެލޭ ހެދުމަށް ބޭނުންވަނީ ބިންބި ފުށް ލާއްސަކަށް ދެ ލާހި ގޮދަންފުށާއި ދޮޅުލާހި ހަކުރެވެ. އޭގެ އިތުރުން ގަބުޅިއެއްގެ ހުންޏާއި ތިން ބިސް އަދި ސަމްސަލެއްގެ ބޭކިން ޕައުޑަރެވެ. ތައްޔާރު ކުރުމަށް ކުރަންޖެހޭ ކަމަކީ މި ހުރިހާ އެއްޗެއް އެއްކޮށްފައި ރަނގަޅަށް މޮޑެލުމަށްފަހު، އެމީހަކު ބޭނުން ސައިޒަކަށް ގުޅަޖަހައި ކޮންމެ ގުޅައެއްގެ މެދުން ކުޑަ ލޯވަޅެއް އަޅާނީ އެވެ. އޭރުން ހުންނާނީ ޑޯނަޓެއްގެ ސިފައިގަ އެވެ.

އެއަށްފަހު ފަހު ތަވާއަކަށް ތެޔޮއަޅައި ހޫނުވުމުން ބިންބި ތެލޭތައް ތެލުގައި ތެލުލާނީ އެވެ. ތެލުލުމަށް ފަހު އޭގައިވާ ތެޔޮތައް ފިލުވައިލުމަށްޓަކައި ޓިޝޫއެއްގެ ތެރޭގައި އިރުކޮޅަކު ބެހެއްޓުމަށް ފަހު ހިހޫވުމުން އެހެރީ ބިންބި ތެލޭ ތައްޔާރުވެފަ އެވެ. ފިނިކޮށްގެން ވެސް ކާން މީރު، ބިންބި ތެލޭއަކީ ނުބައި ނުވެ 2-3 ދުވަހަށް ވެސް ބެހެއްޓޭ އެއްޗެކެވެ.