ގްރީސްގެ ގަދީމީ ރަސްކަލެއް ކަމަށްވާ "އެލެކްޒެންޑްރާ ދަ ގްރޭޓް" ބޭނުން ކުރި ކުރުތާއެއް ކަމަށް ބުނާ ހެދުމެއް 2،300 އަހަރު ފަހުން ފެނިއްޖެ އެވެ.
ގްރީސްގެ ވާޖީނިއާގައި ހުރި ކަށްވަޅެއް ހޯދުމުގެ ތެރޭގައި ސައިންސްވެރިންނަށް ވަނީ ހުދު ކުލައާއި ދަނބު ކުލައިގެ ކުރުތާއެއް ފެނިފަ އެވެ.
އިތުރަށް ކުރެވުނު ތަހުލީލުތަކުން އެއީ ތާރީހީ ލިޔެކިޔުންތަކުގައި ވެސް އެލެކްޒެންޑްރާގެ ހެދުންކޮޅު ސިފަކުރެވިފައިވާ ފަދަ ކުރުތާއެއް ކަމުން އެއީ އޭނާގެ ކުރުތާކޮޅެއްކަން ޔަގީންވެފައިވެ އެވެ.
އެ ކުރުތާކޮޅު ފެނުނުއިރު އެ ވަނީ ވަރަށް ބޮޑަށް ވީރާނާވެފަ އެވެ. މުޅި ކުރުތާކޮޅު ކުދިކުދި ބައިބައަށް ވަކިވެފައިވާއިރު ކޮންމެ ބައެއްގައި ހުރީ ގާތްގަނޑަކަށް ހަ ސެންޓިމީޓަރު ކަމަށް ހަބަރުތައް ބުނެ އެވެ.
އުމުރުން 32 އަހަރުގައި އެލެކްޒެންޑްރާ އަވަހާރަވިއިރު އޭނާ ވަޅުލެވިފައިވާ ތަނެއް މިއަދާ ހަމައަށް ވެސް ސައިންސްވެރިންނަށް ހޯދިފައެއް ނުވެ އެވެ. އެގޮތުން އެލެކްޒެންޑްރާ އެންމެ ފުރަތަމަ ވަޅުލެވުނީ މިސްރުގައި ނަމަވެސް ގަބުރު ވަގަށް ނަގާފާނެތީ ފަހުން އެރަދުންގެ މަހާނަ އެހެން ތަނަކަށް ބަދަލުކުރެވިފައިވާ ކަމަށް ބުނެވެ އެވެ.
ހަބަރުތައް ބުނާ ގޮތުގައި އެލެކްޒެންޑްރާގެ ކުރުތާކޮޅު ކަމަށް ބުނާ ހެދުން ސައިންސްވެރިންނަށް ފެނުނީ އޭނާގެ އެއްބަފާ ބޭބެގެ ކަށްވަޅުންނެވެ.
އެލެކްޒެންޑްރާ ފާހަގަކުރެވެނީ މުޅި ދުނިޔޭގެ ތާރީހުގައި ވެސް އެންމެ ވަރުގަދަ އަސްކަރިއްޔާއެއް ގެންގުޅުނު ރަސްކަލުގެ ގޮތުގަ އެވެ. އެރަދުންގެ ރަސްކަމުގައި ދުނިޔޭގެ ބޮޑުބައެއް ފަތަހަ ކޮށްފައިވެ އެވެ.
އިސްލާމީ އިލްމުވެރިން ވިދާޅުވާ ގޮތުގައި އެލެކްޒެންޑްރާ ދަ ގްރޭޓް ނިސްބަތް ކުރެވެނީ ކީރިތި ގުރުއާނުގައި އެ ރަސްކަލެއްގެ ވާހަކަ ގެނެވިފައިވާ ޛުލްގަރްނައިން އަށެވެ. އެހެން ނަމަވެސް އެއީ އެއް ފަރާތެއް ކަމެއް ޔަގީންކޮށް ބުނާކަށް ނޭނގެ އެވެ.
