ސޮނީ ޓީވީގެ މަޝްހޫރު ރިއަލިޓީ ޝޯ "ކޯން ބަނޭގާ ކްރޯޑްޕަތީ" ސީޒަން 18ގެ ޝޫޓިންގެ ތެރެއިން އެ ޝޯގެ ހޮސްޓް ބޮލީވުޑްގެ މަޝްހޫރު ތަރި އަމީތާބު ބައްޗަން ކައްސާލައިގެން ވެއްޓި އޭނާގެ ކަކުލަށް އަނިޔާވެއްޖެ އެވެ.

ޝޯގެ އެންމެ ފަހުގެ އެޕިސޯޑުގައި އުމުރުން 83 އަހަރުގެ އަމީތާބް ވަނީ އޭނާއަށް ލިބުނު އަނިޔާގެ ތަފްސީލު ބެލުންތެރިންނާ ހިއްސާކޮށްފަ އެވެ.

އާންމުކޮށް ޝޯ ފަށާއިރު ކޮޅަށް ހުރެގެން ވާހަކަ ދައްކާ އަމިތާބް އެންމެ ފަހުގެ އެޕިސޯޑު ފެށީ ގޮނޑީގައި އިށީނދެ އިނދެ އެވެ.

އޭނާ ބުނީ، އިއްޔެގެ ޝޫޓިންގެ ތެރޭގައި ކައްސާލައިގެން ވެއްޓި ވާތްފަރާތު ކަކުލަށް އަނިޔާވި ކަމަށެވެ. ސީދަލަށް ކޮޅަށް ހުރުމަށް އުނދަގޫތަކެއް ހުރުމުގެ ސަބަބުން، ޝޯގެ ފެށުން ގޮނޑީގައި އިށީނދެ އިނދެ ކުރިއަށް ގެންދިއުމަށް ނިންމީ ކަމަށް އޭނާ ހާމަކުރި އެވެ.

އަމީތާބްގެ މި ވާހަކައާއެކު އޯޑިއަންސްގައި ތިބި މީހުން ކަންބޮޑުވުން ފާޅުކުރި ނަމަވެސް، އޭނާ ވަނީ މިއީ މާ ސީރިއަސް އަނިޔާއެއް ނޫން ކަމަށް ބުނެފަ އެވެ. އެގޮތުން ޝޯގެ ބައިވެރިންނާ ސަލާމް ކުރަން ކޮޅަށް ތެދުވާނެ ކަމަށްވެސް އޭނާ ބުންޏެވެ.

މި ހާދިސާއާ ގުޅިގެން ޝޯގެ އޯޑިއަންސާއި ސަޕޯޓަރުން ދަނީ އަމީތާބަށް އަވަސް ޝިފާއަކަށް އެދި ހެޔޮއެދުންތައް ފޮނުވަމުންނެވެ.