މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓް (ހައުސިން މިނިސްޓްރީ) އިން ރަސްމާލެ މަޝްރޫއާ ގުޅޭ މުހިންމު ލިޔެކިޔުންތަކެއް ގެއްލިގެން އުޅޭ ކަމުގެ އަޑުތައް ފެތުރިފައިވަނިކޮށް، އެ މިނިސްޓްރީ ހިންގާ އިމާރާތުގެ ސެކިއުރިޓީ ބެލެހެއްޓުމަށް ފުލުހުން ފޯރިމަރަން ފަށައިފި އެވެ.

ނަން ހާމަނުކުރުމަށް ޝަރުތުކޮށް އެ މިނިސްޓްރީގެ މުވައްޒަފަކު މައުލޫމާތު ދިން ގޮތުގައި، ވޭތުވެދިޔަ ދެ ރޭ ވެސް ފުލުހުން ވަނީ މިނިސްޓްރީގެ ދޮރުމަތީގައި ފާރައަށް ތިބެފަ އެވެ. އޭނާ ބުނި ގޮތުގައި ފުލުހުން ފޯރިމަރަނީ ރޭގަނޑު އޮފީސް ބަންދު ގަޑިތަކުގަ އެވެ. އަދި އާދީއްތަ ދުވަހު ރަސްމީކޮށް އޮފީސް ހުޅުވަންދެން ވެސް ފުލުހުން އެ ސަރަހައްދުގައި ހަރަކާތްތެރިވެފައިވާ ކަމަށް އޭނާ ބުންޏެވެ.

މިކަމާ ގުޅިގެން މުވައްޒަފުންގެ މެދުގައި ބޮޑު ނުތަނަވަސްކަމެއް އުފެދިފައިވާ ކަމަށާއި، މިފަދަ ފިޔަވަޅެއް މިނިސްޓަރު ޑރ. އަބްދުﷲ މުއްތަލިބު އެޅުއްވީ މިނިސްޓްރީގެ މުވައްޒަފުންނަށް އިތުބާރު ނުކުރައްވާތީ ކަމަށް ބައެއް މުވައްޒަފުން ތުހުމަތުކުރާ ކަމަށްވެސް މައުލޫމާތު ދިން ފަރާތުން ބުންޏެވެ.

މި މައްސަލައާ ގުޅިގެން ފުލުހުން ނެރުނު ބަޔާނެއްގައި ހާމަކޮށްފައިވާ ގޮތުގައި، މިނިސްޓްރީގައި ހުރި ރަސްމީ ލިޔެކިޔުންތަކެއް އަޅާފައިވާ ލޮކަރުތަކެއް އުސޫލުން ބޭރުން ހުޅުވާފައި ހުރި ކަމަށް އެ މިނިސްޓްރީން ރިޕޯޓްކުރުމާ ގުޅިގެން ފުލުހުން ވަނީ އެތަނަށް ގޮސްފަ އެވެ. އެގޮތުން ހުކުރު ދުވަހުގެ ރޭ 7:18 ހާއިރު ފުލުހުން އެތަނަށް ހާޒިރުވެ، ފޮރެންސިކް ޓީމަކުން ވަނީ ތަހުގީގީ ހަރަކާތްތަކެއް ހިންގާފަ އެވެ.

މި މައުލޫމާތު ލިބުމާ ގުޅިގެން މީޑިއާތަކުން އެ ސަރަހައްދު ބެލި ވަގުތު ދުވާލުގެ ވަގުތު ފުލުހުން ފެންނަން ނެތް ނަމަވެސް، ރޭގަނޑުގެ ވަގުތުތަކުގައި ފުލުހުން ގެންދިޔައީ މިނިސްޓްރީ ކައިރީގައި ފޯރިމަރަމުންނެވެ.

ރަސްމާލެ މަޝްރޫއުގެ ބޮޑު ބައެއް އަބޫދާބީގެ އީގަލް ހިލްސް ކުންފުންޏަށް ދިނުމަށް ނިންމާފައިވާ އެއްބަސްވުމުގެ ދެފުށް ފެންނަ މިންވަރު ކުޑަވުމުން އާންމުންގެ ބޮޑެތި ފާޑުކިޔުންތަކެއް ވަނީ ސަރުކާރަށް އަމާޒުވެފަ އެވެ. ދިގު މުއްދަތަކަށް ބިންތައް ދޫކޮށްފައިވާއިރު ދައުލަތަށް ވަގުތުން ލިބޭނެ އާމްދަނީއެއް ނުވަތަ ރައްޔިތުންނަށް ލިބޭނެ ސީދާ މަންފާއެއް ސާފުކޮށް އެނގެން ނެތުމުން، މި މުއާމަލާތުން ހަގީގީ މަންފާ ލިބެނީ ކޮން ބަޔަކަށްތޯ ގިނަ ބަޔަކު ދަނީ ސުވާލު އުފައްދަމުންނެވެ.

މި ލިޔުމާ ގުޅޭ އިތުރު ލިޔުން
Rasmale ge bimakee dhaulathuge milkeh, automatic in vaaruthaeh nuvaane: Muththalib ރަސްމާލޭގެ ބިން އޮޓޮމެޓިކުން ވާރުތައެއް ނުވާނެ: މުއްތަލިބް
Rasmale ebbasvun: Komme badhalakaaeku 99 aharu ithurah libey ރަސްމާލެ އެއްބަސްވުމުގައި ކޮންމެ ބަދަލަކާއެކު އިތުރު 99 އަހަރު
Rasmale mashroou ge liyekiyunthakeh gelli, fuluhun Housing Ministry ah! ލިޔެކިޔުންތަކެއް ގެއްލި، ފުލުހުން ހައުސިން މިނިސްޓްރީއަށް!