Rasmale gai mashroou hingaa UAE kunfuneege noosbayaan badhalu koffi

ޔުނައިޓެޑް އެރަބް އެމިރޭޓްސް (ޔޫއޭއީ)ގެ އީގަލް ހިލްސް ކުންފުނިން ރަސްމާލެ ޕްރޮޖެކްޓާ ގުޅޭގޮތުން ކުރިން ނެރުނު ނޫސް ބަޔާނަށް ބަދަލު ގެނެސްފި އެވެ. މި ބަދަލު ގެނެސްފައިވަނީ، ރަސްމާލޭގެ ބިން ދިވެހިންނަށް ދުވަހަކުވެސް ނުލިބޭ ގޮތަށް އެގްރީމެންޓް ހެދޭކަމަށްބުނެ އާއްމުގެ ބޮޑެތި ކަންބޮޑުވުންތަކެއް އުފެދިފައިވާ ދަނޑިވަޅެއްގަ އެވެ.

ރަސްމާލެ ޕްރޮޖެކްޓުގެ އެއްބަސްވުމުގައި ސޮއިކުރި ދުވަހު، ސެޕްޓެމްބަރު 21 ގައި އީގަލް ހިލްސްއިން ނެރުނު ނޫސް ބަޔާނުގައި ބުނެފައިވަނީ، ރަސްމާލޭގެ ހުރިހާ ޕްރޮޕަޓީއެއް ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް ކުއްޔަށް ދޫކުރާނެ ކަމަށެވެ. އަދި އެތަންތަނުގެ ހައްގުތައް ވިއްކައިގެން ނުވަތަ ވާރުތައިން އެހެން ފަރާތަކަށް ބަދަލުކޮށްފިނަމަ، 99 އަހަރުގެ އާ ކުލީގެ މުއްދަތެއް ފެށޭނެ ކަމަށާއި، މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ ކަމަށެވެ.

ސަރުކާރުން ރަސްމާލެ ދޫކުރަނީ 99 އަހަރަށް ކަމަށް ބުނި ނަމަވެސް، އީގަލް ހިލްސްގެ މި ބަޔާނާއެކު ރަސްމާލެ އަބަދަށްޓަކައި ދިވެހިންގެ އަތުން ބީވެދާނެ ކަމުގެ ބިރު އާންމުންގެ މެދުގައި އުފެދިގެން ދިޔަ އެވެ. މިކަމާ ދެކޮޅަށް ގިނަ ބަޔަކު އަޑު އުފުލަން ފެށުމުން، އީގަލް ހިލްސްއިން ވަނީ އެ ކުންފުނިން ކުރިން ނެރުނު ނޫސް ބަޔާނަށް މިއަދު ބަދަލު ގެނެސްފަ އެވެ.

ބަދަލު ގެނެސްފައިވަނީ، 99 އަހަރަށް ބިން ލިބުމާއި ކޮންމެ ޓްރާންސްފާއަކާއެކު 99 އަހަރުގެ އާ ކުލީގެ މުއްދަތެއް ފެށޭނެ ކަމަށް ބުނާ ބަޔަށެވެ. މިހާރުގެ ނޫސް ބަޔާނުން، ރަސްމާލޭގެ ޕްރޮޕަޓީއެއް ވިއްކާލައިފި ނަމަ ނުވަތަ ވާރުތައިން ދީފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށް ބުނާ ބައި ވަނީ އުނިކޮށްފަ އެވެ.

ރަސްމާލެ ދޫކޮށްލުމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވި މިނިސްޓަރު މުއްތަލިބު ވަނީ މިކަމާ ގުޅޭގޮތުން ވާހަކަ ދައްކަވައިފަ އެވެ. އޭނާ ވިދާޅުވީ، ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ އެ ޕްރޮޕަޓީ ކަމަށާއި، އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް ކަމަށެވެ. އަދި އެ ޕްރޮޕަޓީއެއް ވިއްކާލާ ނަމަ، ނުވަތަ އެ ފަރާތެއް މަރުވުމުން ވާރުތަވާ ނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަ ކުރާނަމަ ކަމަށް ވެސް މިނިސްޓަރު ވިދާޅުވި އެވެ.