މިހާރު ބޮލީވުޑްގެ އެންމެ ފުންނާބު އުސް އަންހެން ދެ ތަރިން ކަމަށްވާ ދީޕިކާ ޕަދުކޯންއާއި ސޯނަމް ކަޕޫރު ބޮލީވުޑަށް ނުކުތީ ގާތްގަނޑަކަށް އެކުއެކީގަ އެވެ.

2007 ވަނަ އަހަރު ނުކުތް "އޯމް ޝާންތި އޯމް"އިން ދީޕިކާ އާއްމުންގެ ސަމާލުކަން ހޯދިއިރު ހަމަ އެ އަހަރު ނުކުތް ސޯނަމްގެ ފުރަތަމަ ފިލްމު "ސާވަރިޔާ" އަށް ލިބުނީ ފިނި ތަރުހީބެކެވެ.

ނަތީޖާއަކަށްވީ އެ ދުވަސްވަރު އެ ދެތަރިންގެ ދެމެދުގައި އަޅާކިޔުން އިތުރުވުމެވެ. ދީޕިކާއަކީ ސޯނަމްއަށް ވުރެ ހުނަރުވެރި ތަރިއެއް ކަމަށް ބުނެ އެކަކު އަނެކަކާ އޮތް ވާދަވެރިކަން ބޮޑުވުމެވެ.

މި އަޅާކިޔުންތައް އިތުރުވުމާއެކު ސޯނަމް ވަނީ އެ ވާހަކަތަކަށް ފާޅުގައި ވަރުގަދަ ރައްދެއް ވެސް ދީފަ އެވެ. އޭނާގެ އެ އިންޓަވިއުއަށް އެ ދުވަސްވަރު ބޮޑު ސަމާލުކަމެއް ލިބުނެވެ.

ސޯނަމް ބުނެފައިވަނީ އޭނާގެ ފުރަތަމަ ފިލްމަށް މާ ބޮޑު ތަރުހީބެއް ނުލިބުނަސް އޭނާއަކީ ދީޕިކާއަށް ވުރެ ދަށް އެކްޓަރެއްގެ ގޮތުގައި ގަބޫލު ނުކުރާ ކަމަށެވެ.

"އަހަރެންގެ ފުރަތަމަ ފިލްމަކީ ސަންޖޭ ލީލާ ބަންސާލީގެ ފިލްމެއް، ދެވަނަ ފިލްމަކީ ރާކޭޝް އޯމް ޕްރަކާޝް މެހްރާގެ ފިލްމެއް. މިއީ މި ދާއިރާގައި ބޮޑެތި ނަންތައް،" ސޯނަމް ބުންޏެވެ.

މީގެ އިތުރުން ވެސް އޭނާއަކީ އަނިލް ކަޕޫރުގެ ދަރިއެއް ކަމަށާއި އޭނާ އުފަންވެފައިވަނީ ބޮލީވުޑްގެ ނުފޫޒުގަދަ އާއިލާއަކަށް ކަމަށް ވެސް ސޯނަމް ބުންޏެވެ.

މި ބީދައިން ވާހަކަ ދެއްކުމަށްފަހު ސޯނަމް ވަނީ ދީޕިކާއާއެކު "ކޮފީ ވިތު ކަރަން"ގެ ތިންވަނަ ސީޒަންގެ އެޕިސޯޑެއްގައި ވެސް ބައިވެރިވެފަ އެވެ.