ރާއްޖޭގެ ބޮޑެތި ވިޔަފާރިވެރިންނާ ދެކޮޅަށް ސަރުކާރުގެ ބައެއް އިސްވެރިންނާއި ޕީއެންސީގެ އެކްޓިވިސްޓުން ކެމްޕޭނެއް ފަށައިފި އެވެ.

ސަރުކާރުގެ ބައެއް އިސްވެރިންނާއި ޕީއެންސީގެ އެކްޓިވިސްޓުން އަންނަނީ ސޯޝަލް މީޑިއާގައި ރިސޯޓް އޯނަރުންނާ ދެކޮޅަށް ތަފާތު އެކި ބަސްތައް ބުނަމުންނެވެ.

އެގޮތުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބުގެ އެއްބަނޑު އެއްބަފާ ބޭބެ، ފިޝަރީޒް މިނިސްޓްރީގެ ސްޓޭޓް މިނިސްޓަރު މުހައްމަދު މުއްތަލިބު ވަނީ، ރާއްޖޭގެ ފަތުރުވެރިކަމުގެ ދާއިރާގެ ކުރީސަފުގައި ހިމެނޭ ޔުނިވާސަލް އެންޓަޕްރައިޒަސްގެ އަށް ރިސޯޓްގެ ހުއްދަ ހިފަހައްޓަން ސަރުކާރަށް ގޮވާލައިފަ އެވެ.

މީގެއިތުރުން ހޯމް މިނިސްޓަރުގެ ނައިބު އަމާނީ މުހައްމަދު ވަނީ ރާއްޖޭގެ އެންމެ ބޮޑު ވިޔަފާރިވެރިޔާ ޗަމްޕާ މުހައްމަދު މޫސާއަށް އިޝާރާތް ކުރައްވައި "ޑޮލަރު މާރުކުރަން ދެކޮޅުހަދާ މަހުޖަނުގެ ރަށްތައް ރައްޔިތުންނަށް ބަހާލަން" ގޮވާލާފަ އެވެ.

ބޭރު ފައިސާގެ މުއާމަލާތްތައް ކުރުމަށް ދާދިފަހުން މަރުކަޒީ ބޭންކް، އެމްއެމްއޭއިން އެކުލަވާލި އާ ގަވައިދާ އެއްގޮތަށް ޑޮލަރު މާރުކުރުމުން ރިސޯޓްތަކަށް ގެއްލުންވާ ކަމަށް ފާހަގަކޮށް އެ ގަވާއިދު އުވާލަން އެންމެ ފުރަތަމަ އެމްއެމްއޭގައި އެދުނީ ރާއްޖޭގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) އެވެ. އެއަށްފަހު ޔުނިވާސަލްގެ ޗެއާމަން މުހައްމަދު އުމަރު މަނިކު ވެސް ވަނީ އެ ގަވާއިދުގެ ދަށުން ޑޮލަރު މާރުކުރެވެން ނެތްކަން އެމްއެމްއޭއަށް އަންގާފަ އެވެ.

ރިސޯޓްތައް ހިންގާ ބޮޑެތި ވިޔަފާރިވެރިން އެމްއެމްއޭއަށް ފޮނުވި ސިޓީގައި ވަނީ އެމްއެމްއޭ އިން ނެރުނު ގަވައިދުގައި ކަނޑައަޅާފައިވާ ގޮތަށް ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަކަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށެވެ. އަދި އެފަދައިން އަމަލުކުރުމަކީ ޓޫރިޒަމް ދާއިރާގެ ވިޔަފާރިތަކަށް ވަރަށް ބޮޑު ގޮންޖެހުމެއް ކަމަށް ވެސް އެ ސިޓީގައިވެ އެވެ.

ރައީސް މުއިއްޒުގެ އެޑްވައިޒަރަކު ވެސް މިކަމާ ދެކޮޅު

ރައީސް މުއިއްޒޔުގެ ޓޫރިޒަމް އެޑްވައިޒަރު މުހައްމަދު ޚަލީލްގެ ޕަލްސް ކުންފުނިން ވެސް ވަނީ އެ ގަވާއިދަށް އަމަލުކުރެވެން ނެތްކަން އެމްއެމްއޭއަށް އަންގާފަ އެވެ. ޚަލީލްގެ ކުންފުންޏަކީ ވެސް ރާއްޖޭގައި ގިނަ ރިސޯޓުތަކެއް ހިންގާ ކުންފުންޏެކެވެ.

ޚަލީލްގެ ކުންފުނިން އެމްއެމްއޭއަށް ފޮނުވި ސިޓީގައި ވަނީ ރިސޯޓުތަކަށް ޑޮލަރުން ލިބޭ އާމްދަނީގެ ބޮޑު ބައެއް ހަރަދުތަކަށް ހޭދަވާކަން އެމްއެމްއޭ އާއެކު ބޭއްވި ބައްދަލުވުމުގައި ބުނެފައިވާނެ ކަމަށެވެ. އެގޮތުން އެ ޚަރަދުތަކުގެ ތެރޭގައި ސަޕްލަޔަރުންނަށް ދޭ ފައިސާ އާއި މުވައްޒަފުންނަށް ދޭ މުސާރަ އަދި ލޯނު ދެއްކުމަށް ޑޮލަރުން ކުރާ ހަރަދުތައް ހިމެނޭކަން އެ އިދާރާގެ ސަމާލުކަމަށް ގެނެސްފައިވާ ކަމަށް އެ ސިޓީގައިވެ އެވެ.

ރައީސް މުއިއްޒުގެ ޓޫރިޒަމް އެޑްވައިޒަރު މުހައްމަދު ޚަލީލް

އެ ކުންފުނިން ބުނީ އެ ޚަރަދުތައް ކޮށްފައި ގަވާއިދުގެ ދަށުން މާރުކުރަން މަޖުބޫރުކުރާ އަދަދަށް ޑޮލަރު ނުހުންނަ ކަމަށެވެ. އެހެންކަމުން އެ ގަވާއިދުގެ ދަށުން ބޮލަކަށް ޑޮލަރު މާރުކުރަން ކަނޑައެޅި 500 ގެ ރޭޓަކީ ސަބަބުވެރި އަދަދެއް ނޫން ކަމަށާއި އެއީ ކުރެވޭނެ ކަމެއް ނޫން ކަމަށް ރައީސް މުއިއްޒުގެ އެޑްވައިޒަރުގެ ކުންފުނިން ވަނީ އެމްއެމްއޭއަށް އަންގާފަ އެވެ.

ރިސޯޓް އޯނަރުންގެ ކަންބޮޑުވުންތަކަށް ބެލުމެއްނެތި ޕީއެންސީގެ އެކްޓިވިސްޓުންނާއި ސަރުކާރުގެ ބައެއް އިސްބޭފުޅުން އަންނަނީ އެ ބޭފުޅުންނަށް ފިޔަވަޅު އަޅަން ގޮވާލަމުންނެވެ.

ސަރުކާރަށް މާލީގޮތުން ބޮޑު ގޮންޖެހުމަކާ ކުރިމަތިވާ ކޮންމެ ފަހަރަކު އެކަމަށް އެހީވުމުގައި ރާއްޖޭގެ އެންމެ ބޮޑު ވިޔަފާރިވެރިން ދެމިތިބިކަން އެއީ ތާރީޚުން ފެންނަން އޮތް ކަމެކެވެ. އެގޮތުން ޗަމްޕާ މުހައްމަދު މޫސާ މާލީގޮތުން ސަރުކާރަށް ވެދީފައިވާ އެހީތައް އެހީ ފާހަގަކޮށްލެވޭ ކަމެކެވެ. ނަމަވެސް އެބޭފުޅުންގެ ވިޔަފާރިތައް ކުރިއެރުމަށް ބޮޑު ހުރަސްތަކެއް ކުރިމަތިވާފަދަ އުސޫލެއް ތަންފީޒުކުރަން ސަރުކާރުން އަންނަނީ މަޖުބޫރުކުރުވަމުންނެވެ.