ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުން އިމާރާތްކޮށް ބޭނުންކުރަން ފެށިތާ ފަސް އަހަރުވެފައިވާ ދަރުމަވަންތަ ހޮސްޕިޓަލް ރައީސް ޑރ. މުހައްމަދު މުއިއްޒު ރަސްމީކޮށް މިރޭ ހުޅުއްވައިދެއްވައިފި އެވެ.

ދަރުމަވަންތަ ހޮސްޕިޓަލް ބޭނުންކުރަން ފަށާފައި ވަނީ ނިމިދިޔަ ރައީސް އިބްރާހީމް މުހައްމަދު ސޯލިހުގެ ވެރިކަމުގަ އެވެ. އެ ވެރިކަމުގައި ވަނީ އެ ހޮސްޕިޓަލުން ގިނަ ހިދުމަތްތަކެއް ދޭން ފަށާފަ އެވެ. އެގޮތުން މުޅި ދުނިޔެއަށް ކުރިމަތިވި އާލަމީ ވަބާއެއްކަމުގައިވާ ކޮވިޑްގައި އެންމެ ހާލުދެރަވި މީހުންނަށް ފަރުވާދީފައި ވަނީ ވެސް ދަރުމަވަންތަ ހޮސްޕިޓަލްގަ އެވެ.

މިރޭ ބޭއްވި ރަސްމިއްޔާތުގައި އެ ހޮސްޕިޓަލްގެ ރަޖިސްޓްރީ އާއި ހިންގުމުގެ ހުއްދަ ހެލްތު މިނިސްޓްރީން ވަނީ އެ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ހަލީމާ ހަވާލުކޮށްފަ އެވެ.

މާދަމާ އިން ފެށިގެން އެ ހޮސްޕިޓަލުން އާ ހިދުމަތްތަކެއް ދޭން ވަނީ ނިންމާފަ އެވެ. އެގޮތުން ދަރިމައިވުމާ ގުޅޭ ގިނަ ފަރުވާތަކެއް ލިބޭނެ ކަމަށް ސަރުކާރުން ބުންޏެވެ.

މީގެއިތުރުން ކުޑަކުދިންނަށް ހާއްސަ އިމަޖެންސީ ރޫމަކާއި ނާރުގެ ބަލިތަކަށް ފަރުވާދޭ ކެތު ލެބެއް ވެސް ވަނީ ހުޅުވާފަ އެވެ.