ކ. ގުޅީގައި މި މަހުގެ މިހާތަނަށް 11 ފާނަބަސަންދު ކޭސް ރިޕޯޓްކޮށްފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

އެޗްޕީއޭއިން މިއަދު ބުނީ ގުޅިން ފާނަބަސަންދުގެ ކޭސްތަކެއް ރިޕޯޓްކޮށްފައިވާކަމަށާއި އޭގެ ތެރެއިން ދެ މީހަކަށް ދަނީ އައިޖީއެމްއެޗުގައި އެޑްމިޓްކުރެވި އިތުރު ފަރުވާދެމުން ކަމަށެވެ.

ފާނަބަސަންދުގެ އަލާމާތްތަކުގެ ތެރޭގައި ހުންއައުމާއި ގައިގައި ވަރުދެރަވެ، ނޭފަތުން ފެންއައުން އަދި ގައިގައި ބިހިތަކެއް ނެގުން ހިމެނެ އެވެ. އަދި އެ ބިހިތައް ފެންފޮޅުތަކަކަށް ބަދަލުވެ ފަޅައިގެންގޮސް ވަރަށް ހިރުވުންވެސް ހިމެނެ އެވެ.

ފާނަބަސަންދަކީ ބަލި ޖެހިފައިވާ މީހެއްގެ ފަރާތުން ފަސޭހައިން ގައިންގަޔަށް އަރާ ބައްޔެއްނަމަވެސް، އެ ބަލި އެއްފަހަރު ޖެހިފައި ހުންނަ މީހަކަށް ދެވަނަފަހަރު ބަލި ޖެހުމުގެ ފުރުސަތު ކުޑަކަމަށްވެސް އެޗްޕީއޭއިން ބުންޏެވެ.

ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކުވެސް ރިޕޯޓް ކުރާކަމަށް އެޗްޕީއޭއިން ބުންޏެވެ.

2024 ވަނަ އަހަރުގެ ނޮވެމްބަރު އާއި ހަމައަށް މުޅި ރާއްޖެއިން 2977 ކޭސް ވަނީ ރިޕޯޓް ކުރެވިފައިވާއިރު، މާލެ ސަރަހައްދުން 1506 ކޭސް އަދި އަތޮޅު ތަކުން 1471 ކޭސް ރިޕޯޓްކޮށްފައިވާކަމަށް އެ އެޖެންސީ ބުނެ އެވެ.