ބޮޑު ރަސްގެފާނު ޖަހައިގެން އިންޓަނެޓުގައި ސާޗްކޮށްލާށެވެ. ފެންނާނީ ރައީސް މުހައްމަދު މުއިއްޒަށް ބޮޑު ރަސްގެފާނުގެ ލަގަބު ލިބިވަޑައިގެންނެވި ވާހަކަ އެވެ. ރައީސް މުއިއްޒަށް މި ލަގަބު އެރުވީ މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި) އިންނެވެ. އެ ޖަމްއިއްޔާގެ އިސް ބޭފުޅަކީ ރައީސްގެ އިގްތިސާދީ މުޝީރު މުހައްމަދު އަލީ ޖަނާހް އެވެ.

ޖަނާހް، ރައީސްގެ މުސްތަޝާރެއްގެ ވަޒީފާ އަދާކުރެއްވި ކަމަށް ވިޔަސް އެ ވަޒީފާގެ މުސާރަ ނުނަންގަވާ ކަމަށްވެ އެވެ. ހަގީގަތުގައި ޖަނާހު ފަދަ މުއްސަނދި ވިޔަފާރިވެރިއަކަށް އެފަދަ މަގާމެއްގެ މުސާރައެއް މުހިންމެއް ނުވެ އެވެ. މުހިންމީ މަގާމުގެ ހައިބަތާއި ޕާސްޕޯޓުގެ އިނާޔަތެވެ. ރައީސް މުއިއްޒަށް ވެރިކަން ލިބިވަޑައިގެންނެވުމާއި ޖަނާހަށް މުޝީރުކަން ލިބިވަޑައިގެންނެވުމާއެކު އެކީހެން އެރުވުނު "ބޮޑު ރަސްގެފާނު"ގެ ޓައިޓްލް ރައީސަށް އެރުވީ އެމަނިކުފާނު ދިވެހި ރާއްޖޭގެ ކޮންސްޓްރަކްޝަން އިންޑަސްޓްރީއަށް ކޮށްދެއްވި މަތިވެރި ޚިދުމަތުގެ އަގު ވަޒަންކުރުމަށެވެ. އެ ޚިދުމަތްތަކުގެ ތެރޭގައި ދަރުމަވަންތަ ހޮސްޕިޓަލް އިމާރާތްކުރުމާއި ޗައިނާ މޯލްޑިވްސް ފްރެންޑްޝިޕް ބްރިޖް އެޅުން ހިމެނެ އެވެ.

ރައީސް މުއިއްޒަށް ލިބިވަޑައިގެންނެވި ބޮޑު ރަސްގެފާނުގެ ލަގަބު ނިސްބަތް ވަނީ ރާއްޖޭގެ މަޝްހޫރު ރަސްކަލެއް ކަމަށްވާ ސުލްތާން މުހައްމަދު އިމާދުއްދީން (އެއްވަނަ) އަށެވެ. އެ ރަސްގެފާނަކީ ކަލާފާނުގެ ވެރިކަމަށްފަހު ރާއްޖޭގެ ދިފާއީބާރު ކަންފަތިވެފައިވަނިކޮށް އެބާރު އަލުން ރުކުރުވައިލެއްވި ރަސްގެފާނެވެ. ރާއްޖެއަށް ގިނަގުނަ ޚިދުމަތްތަކެއް އެ ރަސްގެފާނު ކުރެއްވި އެވެ.

ބޮޑު ރަސްގެފާނަކީ ކޮންމެފަދަ ޚިދުމަތެއް ކުރެއްވި ބޭފުޅެއް ކަމަށް ވިޔަސް އެއީ ރަސްކަލެކެވެ. ރަސްކަލަކަށް ލިބިގެންވާ އާރާއި ބާރާއި ހައިބަތުން ބޮޑު ރަސްގެފާނު ވެސް އެއްކިބާވެ ވަޑައިގެނެއް ނުވެ އެވެ. ރަސްކަލުންނަކީ ވެރިންނެވެ. ރައްޔިތުންނަކީ ރަސްގެފާނުގެ އަޅުންނެވެ. އެއަޅުންގެ ކަންތައް ބޭނުންފުޅު ގޮތަކަށް ގެންދެވުމުގެ ފުރިހަމަ އިޚުތިޔާރު ރަސްގެފާނަށް ލިބިވަޑައިގެންވާނެ އެވެ.

ރާއްޖޭގައި އަން ޒަމާނުއްސުރެ ކުރަމުން އައި ރަސްކަން އުވުނުތާ މިހާރު ކިތަންމެ ދުވަހެކެވެ. ގައުމުގެ ކަންތައް ހިންގެވުމަށް އިސްވެ ހުންނަވަނީ ރައްޔިތުންގެ ވޯޓަކުން ހޮވިވަޑައިގެންފައި ހުންނަވާ ރައީސެކެވެ. ރައީސަށް ވެރިކަން ކުރެއްވުމަށް ބޭނުންފުޅުވާ ގާނޫނުތައް ހަދައިދީ ވެރިކަމުގެ ތަރަހަތަކުގެ ތެރޭގައި އެބޭފުޅަކު ސާބިތުވެ ހުންނަވާތޯ ނުވަތަ ނޫންތޯ ބަލައި ފާރަވެރިވުމަށް އޮންނީ ރައްޔިތުންގެ މަޖިލީހެކެވެ. އެހެން ކަމުން ހަގީގީ ވެރިންނަކީ ރައްޔިތުން ކަމަށްވެ، ރައީސަކީ ރައްޔިތުންގެ ޚާދިމެއްކަމަށް ހަމަޖެހުނުތާ ދުވަސްތަކެއް ވެއްޖެ އެވެ.

ރާއްޖޭގެ ރައްޔިތުން އެމީހުންގެ ކަންތައް ބަލަހައްޓައި ގައުމު ހިންގެވުމަށް މިހާރުގެ ރައީސް މުއިއްޒު އިންތިޚާބުކުރިތާ މިވީ އެންމެ އަހަރެކެވެ. ފާއިތުވި އަހަރު ދުވަހުގެ ތެރޭގައި އެމަނިކުފާނުގެ ވެރިކަމުގެ ވައްޓަފާޅި ޑިމޮކްރެޓިކް ވެރިއެއްގެ ސިފައިން ހުރިހާ ބާރުތަކެއް މުށުތެރެއަށް ލައްވައިގެން ހުންނެވި ރަސްކަލެއްގެ ސިފަޔަށް އަންނަނީ ބަދަލުވަމުންނެވެ. އެ މަނިކުފާނަކީ ވެރިކަންކުރާ ޕާޓީގެ އެންމެ އިސް ބޭފުޅާ އެވެ. ރައްޔިތުންގެ މަޖިލީހުގައި ތިއްބެވީ އެޕާޓީގެ މެންބަރުންނެވެ. އެއިން މެންބަރަކު ރައީސް ހިތްޕުޅުހަމަޖެހިވަޑައިނުގަންނަވާ ފަދަ އަމަލެއް ކުރައްވައިފިނަމަ ޕާޓީއިން ވަކިކޮށްލުމުގެ ބާރު އެމަނިކުފާނަށް ލިބިވަޑައިގަންނަވަ އެވެ. ޕާޓީއިން ވަކިކޮށްލުމުން އެ މެންބަރުގެ މެންބަރުކަމުގެ ގޮނޑި ގެއްލުނީ އެވެ. އެހެންކަމުން ރައީސް ބޭނުންފުޅު ކޮންމެ ކަމެއް ކުރެއްވުމަށް ވެރިކަމުގެ ހުރިހާ ބާރެއް ރައީސް މުއިއްޒު މިވަނީ ހޯއްދަވާފަ އެވެ.

ވެރިކަމުގެ ހުރިހާ ބާރެއް މުށުތެރެއަށް ލެއްވުމަށްފަހު ދައުލަތަށް އާމްދަނީ އިތުރުކުރުމުގެ ނަމުގައި ފާޑު ފާޑުފާޑުގެ ޓެކްސް ތައާރަފް ކުރައްވައި މިހާރު ހުރި ޓެކްސްތައް އެތައް ގުނައަކަށް ބޮޑު ކުރެއްވުމުން އެކަމާ ދެކޮޅަށް ޚިޔާލެއް ފާޅުކުރާ މީހަކަށް ހަޅޭލައްވައި ގަދަބަސް ވިދާޅުވަމުން ގެންދަވަނީ އެވެ. ދުނިޔޭގެ ބޮޑެތި މީޑިއާތަކުގެ ސަމާލުކަމަށް މިހާރު ވަނީ އެ މައްސަލަތައް ތިލަވެފަ އެވެ. ގައުމުގެ އިގުތިސާދު ފުނޑިދާނެކަމުގެ ކޮޅުމަތި އަންނަނީ ފެންނަމުންނެވެ.

ތަޖުރިބާކާރުންގެ ލަފަޔާ ފަންނީ މީހުންގެ ވާހަކަ ބޮލާލާ ޖެހުމަށްފަހު އަމިއްލަފުޅަށް ފެނިވަޑައިގަންނަވާ ގޮތަކަށް ޑޮކްޓަރު މުއިއްޒު ކުރައްވަމުން ގެނަދަވާ ވެރިކަން ޑިމޮކްރެޓިކް ވެރިކަމެއްގެ ސިފަތަކުން ބަރީއަވެ ޚުދު މުޚުތާރު ރަސްކަލެއްގެ ސިފަޔަށް ވަނީ މިސްރާބު ހިފާފައެވެ. އެމަނިކުފާނަށް، މުހައްމަދު އަލީ ޖަނާހު އެރުވި ބޮޑު ރަސްގެފާނުގެ ލަގަބަށްވުރެ ވެސް ކުރައްވަމުން ގެނަދަވާ ރައީސްކަމުގެ ހައިބަތު އަނަނަނީ ބޮޑު ވަމުންނެވެ.