ކުރިއަށް އޮތް 20 އަހަރުގެ ތަރައްޤީގެ ޕްލޭން އެކުލަވާލުމުގެ މަސައްކަތް ކޮށްދޭނެ ބައިނަލްއަޤްވާމީ ކޮންސަލްޓަންސީ ފާމެއް ހޯދުމަށް ސަރުކާރުން އިއުލާން ކޮށްފި އެވެ،

މިނިސްޓްރީ އޮފް ފިނޭންސުން މިއަދު ކޮށްފައިވާ އިއުލާނުގައި ބުނެފައިވަނީ މި މަސައްކަތަށް ކޮންސަލްޓަންސީ ފާމެއް ހޯދަނީ މިނިސްޓްރީ އޮފް ހައުސިން މިނިސްޓްރީން އެދިގެންނެވެ. މި މަސައްކަތަށް ޝަރުތު ހަމަވާ ހުރިހާ ފަރާތްތަކަށް "އެކްސްޕްރެޝަން އޮފް އިންޓްރެސްޓް" (އީއޯއައި) ހުށަހެޅުމުގެ ފުރުޞަތު ވަނީ ހުޅުވާލާފަ އެވެ.

މި މަސައްކަތުގެ މައިގަނޑު މަގްސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ދިވެހިރާއްޖޭގެ ދެމެހެއްޓެނިވި އިޤްތިޞާދީ، އިޖްތިމާޢީ، ތިމާވެށި، އަދި އާބަން ޑިވެލޮޕްމަންޓުގެ ޤައުމީ ތަރައްޤީގެ ޕްލޭނެއް އެކުލަވާލުމެވެ. އަދި މި ޕްލޭންގައި ނެޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޛުކުރުމާއި، މޮނިޓާ ކުރުމާއި، އިވެލުއޭޓް ކުރެވޭނެ މެކޭނިޒަމްތައް ހިމަނަންވާނެ ކަމަށް ފިނޭންސް މިނިސްޓްރީން ބުނެފައިވެ އެވެ.

މި މަސައްކަތަށް ޝައުޤުވެރިކަން ފާޅުކުރާ ފަރާތްތަކުގެ ތެރެއިން ޝޯޓްލިސްޓް ކުރެވޭ ފަރާތްތަކަށް ޕްރޮޕޯސަލް ހުށަހެޅުމުގެ ދަޢުވަތު ދެވޭނެ ކަމަށް ފިނޭންސް މިނިސްޓްރީން ބުނެފައިވެ އެވެ. އަދި ޝައުޤުވެރިވާ ފަރާތްތަކުން މި މަހުގެ 16 ވަނަ ދުވަހުގެ މެންދުރު 14:00 ގެ ކުރިން "އެކްސްޕްރެޝަން އޮފް އިންޓަރެސްޓް" ފޮނުވުމަށް އެދިފައިވެ އެވެ.

ފާހަގަކޮށްލެވޭ ގޮތުގައި ޤައުމީ ތަރައްޤީގެ 20 އަހަރުގެ މާސްޓާ ޕްލޭންގެ މަޝްވަރާ ބައްދަލުވުން މިދިޔަ މަހުގެ 6 ވަނަ ދުވަހު ފަށާފައިވެ އެވެ. ގައުމީ ތަރައްގީގެ މާސްޓާ ޕްލޭން އެކުލަވައިލުމުގައި އެހީތެރިކަން ފޯރުކޮށްދިނުމަށް އޮސްޓްރޭލިއާއާއެކު ވެސް ވަނީ ހައުސިން މިނިސްޓްރީން އެއްބަސްވުމެއްގައި ސޮއިކޮށްފަ އެވެ.