ބާރުގަދަ ތޫފާން ފެންގަލް އަވަށްޓެރި އިންޑިޔާ އާއި ސްރީލަންކާއަށް އެރުމުގެ ސަބަބުން 19 މީހުން މަރުވެއްޖެ އެވެ.

ބޭ އޮފް ބެންގޯލްއިން އިންޑިޔާގެ ދެކުނު އައްސޭރިފަށް ހުރަސްކުރުމަށްފަހު ތަމިލްނާޑޫ ސްޓޭޓާއި ޕުދުޗެރީ ސަރަޙައްދަށް ތޫފާނުގެ އަސަރުކޮށް ވަނީ ވަރަށްބޮޑަށް ފެންބޮޑުވެފަ އެވެ.

އިންޑިޔާގެ މޫސުމާބެހޭ އޮފީހުން އާދީއްތަ ދުވަހު ބުނެފައިވަނީ އެއީ ޕުދުޗެރީގައި ވޭތުވެދިޔަ 30 އަހަރުގެ ތެރޭގައި އެންމެ ގިނައިން ވާރޭވެހުނު 24 ގަޑިއިރު ކަމަށެވެ.

މި ތޫފާނުގެ ސަބަބުން ދެކުނުގެ ޗެންނާއި ސިޓީގެ ބައެއް ސަރަޙައްދުތަކުގައި ފެންބޮޑުވެފައިވެ އެވެ. މޫސުން ގޯސްވެ ހޮނިހިރު ދުވަހު ވަގުތީގޮތުން އެ ސިޓީން ފްލައިޓްތައް ހުއްޓާލި ނަމަވެސް، އާދީއްތަ ދުވަހުގެ ފަތިހު ވަނީ އަލުން ފަށާފަ އެވެ.

ލޯކަލް މީޑިއާގައި އާއްމުކުރި ވީޑިއޯތަކުން ފެންނަ ގޮތުން ގަދަ ވަޔާއި ބޯ ވާރޭގެ ސަބަބުން މަގުތަކުގައި ފެންބޮޑުވެ، މީހުން ސަލާމަތްކުރުމަށް ބޯޓުފަހަރު ބޭނުންކުރަމުންދެ އެވެ.

އިންޑިއަން އާމީއިން ވަނީ ތޫފާނުގެ މެދުތެރޭގައި ތިބި މީހުންނަށް އެހީތެރިވުމަށް ޕުދުޗެރީގައި މީހުން ސަލާމަތްކުރުމުގެ މަސައްކަތްތައް ކުރަމުންނެވެ.

ސްރީލަންކާގައި 16 މީހުން މަރުވެފައިވާއިރު، ޖުމްލަ 138،944 އާއިލާއަށް ވިއްސާރައިގެ އަސަރުކޮށްފައިވާކަމަށް ކޮލަމްބޯގެ ޑިޒާސްޓާ މެނޭޖްމަންޓް ސެންޓަރުން އެންމެ ފަހުން ނެރުނު ތަފާސްހިސާބުތަކުން ދައްކަ އެވެ.