ބޮލުގައި ރިއްސުމަކީ އަޅުގަނޑުމެންގެ އާންމު ދިރިއުޅުމުގައި ވަރަށް ގިނައިން ދިމާވާ، އަދި ދިރިއުޅުމުގެ އާންމު އާދަކާދަތަކަށް ބޮޑެތި ބުރޫތަކެއް އަރުވާ ކަމެކެވެ.

އެއްބައި ފަހަރަށް މިއީ އާންމު ކަމަކަށް ވީނަމަވެސް، ތަކުރާރުކޮށް ނުވަތަ މާގިނައިން ބޮލުގައި ރިއްސާނަމަ، އެއީ ސިއްހީ ގޮތުން ސަމާލުކަން ދޭންޖެހޭ މުހިންމު ސަބަބުތަކެއް ހުރެދާނެ ކަމެކެވެ.

ބޮލުގައި ރިއްސަން މެދުވެރިވާ އާންމު ސަބަބުތައް

ނަފްސާނީ ނުވަތަ ފިކުރީ ސްޓްރެސް

މިއީ ބޮލުގައި ރިއްސުމަށް މެދުވެރިވާ އެންމެ އާންމު އެއް ސަބަބެވެ. ނަފްސާނީ ގޮތުން މާބޮޑަށް ފިކުރު ކުރުމާއި ސްޓްރެސްވުމުގެ ސަބަބުން ބޮލުގެ ނާރާއި މަސްތަކަށް ބާރުބޮޑުވެ، "ޓެންޝަން ހެޑޭކް" އުފެދެ އެވެ.

ނިދި މަދުވުން

ރެއަކާ ދުވާލު އެކަށީގެންވާ ވަރަށް ނިދި ނުލިބުމަކީ ސިކުނޑިއާއި ހަށިގަނޑު ވަރުބަލިކޮށް، ބޮލުގައި ރިއްސުމަށް މަގުފަހިކުރާ ކަމެކެވެ.

ހަށިގަނޑުން ފެން މަދުވުން

ދުވާލެއްގެ މައްޗަށް ބޭނުންވާ މިންވަރަށް ފެން ނުބުއިމުގެ ސަބަބުން ހަށިގަނޑުން ފެން މަދުވެ، ސިކުނޑިއަށް އޮކްސިޖަން އާއި ނިއުޓްރިއެންޓްސް ފޯރު ކޮށްދިނުމަށް ބުރޫ އަރައި ބޮލުގައި ރިއްސަން ފަށަ އެވެ.

ގަޑިން ގަޑިއަށް ނުކެއުން

ކޮންމެ އިރެއްގެ ކެއުން ވެސް ގަޑިއަށް ނުކެއުމުގެ ސަބަބުން ލޭގައި ހުންނަ ހަކުރުގެ މިންވަރު ދަށްވެ ބޮލުގައި ރިއްސުމަށް މަގުފަހިވެ އެވެ.

ލޮލަށް ބާރުބޮޑުވުން

ގިނައިރު ވަންދެން ފޯނު، ކޮމްޕިއުޓަރު ނުވަތަ ޓީވީގެ ސްކްރީނަށް ބެލުމާއި، އައިނު ނަންބަރު ބަދަލުވެފައި ހުރުމުގެ ސަބަބުން ލޮލުގެ ނާރުތަކަށް ބާރުބޮޑުވެ ބޮލުގައި ރިއްސަ އެވެ.

ކެފެއިން މަދުވުން

ގަވާއިދުން ސައި ނުވަތަ ކޯފީ ބޯ މީހުން، ކުއްލިއަކަށް ކެފެއިން ބޭނުން ކުރުން ހުއްޓާލުމުން ނުވަތަ މަދު ކުރުމުން ބޮލުގައި ރިއްސުން މެދުވެރިވެ އެވެ.

ތަކުރާރުކޮށް ބޮލުގައި ރިއްސުމުން އަންގައިދެނީ ކޮންކަމެއް؟

ގަވާއިދުން ނުވަތަ ތަކުރާރުކޮށް ބޮލުގައި ރިއްސާނަމަ އެއީ ހަމައެކަނި ވަރުބަލިވުމެއް ނޫނެވެ. އެއީ ތިރީގައިވާ ސިއްހީ މައްސަލަތަކުގެ ނިޝާނަކަށް ވެސް ވެދާނެ އެވެ:

  • މައިގްރޭން: މިއީ ބޮލުގެ އެއްފަޅީގައި ވަރަށް ބާރަށް ރިއްސައި، އަލިކަމަށާއި ގަދަ އަޑުތަކަށް އުނދަގޫވާ ބާވަތުގެ ބޮލުގައި ރިއްސުމެކެވެ. މިއާއެކު މޭ ނުބައިކުރުން ފަދަ ކަންކަންވެސް ދިމާވެ އެވެ.
  • ސައިނަސް: ނޭފަތާއި މޫނުމަތީގެ ސައިނަސްތަކުގައި އިންފެކްޝަން ހެދުމުގެ ސަބަބުން ނިއްކުރިއާއި މޫނުމަތީގައި ރިއްސާ ބޮލުގައި ކެކުޅުން އުފެދެ އެވެ.
  • ލޭގެ ޕްރެޝަރު މަތިވުން: ލޭ މައްޗަށް ދިއުމަކީވެސް ބޮލުގެ ފަހަތުގައި ތަކުރާރުކޮށް ރިއްސުމަށް މެދުވެރިވާ ސަބަބެކެވެ.

ޑޮކްޓަރަށް ދައްކަންޖެހޭ ދަނޑިވަޅުތައް

ބޮލުގައި ރިއްސުމަކީ އާންމު ކަމަކަށް ވިޔަސް، ތިރީގައިވާ އަލާމާތްތައް ފެންނަނަމަ ލަސްނުކޮށް ސިއްހީ އެހީތެރިކަން ހޯދަން ޖެހޭނެ އެވެ.

  • ކުއްލިއަކަށް ވަރަށް ބާރަށް ބޮލުގައި ރިއްސަން ފެށުން.
  • ބޮލުގައި ރިއްސުމާއެކު ހުންއައުން، ކަންތައްތައް އޮޅުންބޮޅުންވުން، ނުވަތަ ވާހަކަ ދައްކަން އުނދަގޫވުން.
  • ލޮލުގެ ފެނުމަށް ބަދަލުއައުން ނުވަތަ ހަށިގަނޑުގެ އެއްފަޅިން ވާގިނެތޭ ގޮތްވުން.
  • ބޮލަށް އަނިޔާއެއް ލިބުނު ފަހުން ބޮލުގައި ރިއްސަން ފެށުން.

އާންމު ގޮތެއްގައި ދުވާލަކު އެކަށީގެންވާ ވަރަށް ފެން ބުއިމާއި، ގަވާއިދުން ކެއުމާއި ނިދުމުގެ އާދަތައް ބެހެއްޓުމަކީ އާންމުކޮށް ބޮލުގައި ރިއްސުމުން ރައްކާތެރިވުމަށް ކުރެވިދާނެ އެންމެ މުހިންމު ކަންކަމެވެ.