ވައިޓް ހައުސްއިން ތިން މީޑިއާއެއް ބޭންކުރުމަށް ރައީސް ޑޮނަލްޑް ޓްރަމްޕް ނިންމެވި ނިންމެވުމާ ދެކޮޅަށް އިހުތިޖާޖު ކުރުމުގެ ގޮތުން، އެމެރިކާގެ ޓީވީ ނެޓްވޯކްތަކުން ޓްރަމްޕްގެ ހަބަރުތައް ފެތުރުން ހުއްޓާލައި، ވަރުގަދަ ފިޔަވަޅެއް ހޯމަ ދުވަހު އަޅައިފި އެވެ.

ޓްރަމްޕް މީޑިއާތަކަށް އަމާޒުކުރައްވާ ހަމަލާތައް ވަރުގަދަކުރައްވައި، ސީއެންއެން، އެމްއެސް ނައު އަދި ޕޮލިޓިކޯ ވައިޓް ހައުސްއަށް ވަނުން މިދިޔަ ހުކުރު ދުވަހު މަނާކުރެއްވުމާ ގުޅިގެން، އެ މީޑިއާތަކުން މިހާރު ވަނީ ކޯޓަށް މައްސަލަ ހުށަހަޅާފަ އެވެ.

މި މައްސަލައިގެ ނަތީޖާއެއްގެ ގޮތުން، ޓްރަމްޕް ވަރަށް ބޮޑު އިސްކަމެއް ދެއްވައިގެން ވައިޓް ހައުސްގައި އަލަށް ހެދި ހެލިޕޭޑް ހުޅުވުމުގެ ރަސްމިއްޔާތާއި، އދ. ގެ އާންމު މަޖިލީހަށް ކުރެއްވި ދަތުރުފުޅުގެ ލައިވް ކަވަރޭޖް ޓީވީތަކުން ގެނެސްދީފައެއް ނުވެ އެވެ.

އާންމުކޮށް ނުފެންނަ ފަދަ ނިންމުމެއް ނިންމައި، އެމެރިކާގެ އެންމެ ބޮޑު ފަސް ބްރޯޑްކާސްޓަރުން ހޯމަ ދުވަހު ބުނީ، ސީއެންއެންއާ އެކު އޮތް އެއްބައިވަންތަކަން ހާމަކުރުމުގެ ގޮތުން، ވައިޓް ހައުސްގެ "ޕޫލް" ކަވަރޭޖް މެދުކަނޑާލާފައިވާ ކަމަށެވެ. ހޯމަ ދުވަހުގެ ޕޫލް ކަވަރޭޖް ދިނުމަށް ކުރިން ހަމަޖެހިފައި އޮތީ ސީއެންއެންއަށެވެ.

"ސަރުކާރާ ބެހޭ ސައްހަ އަދި މިނިވަން މައުލޫމާތު ލިބުމަކީ ރައްޔިތުންގެ ވަރަށް ބޮޑު ހައްގެއް. އެއްވެސް ސަރުކާރަކުން މީޑިއާއަކުން ގެނެސްދޭ ހަބަރަކާ ހިތްހަމަނުޖެހިގެން އެ ނޫސް އިދާރާއަކަށް ހުރަސްއަޅައިގެން ނުވާނެ،" އޭބީސީ، ސީބީއެސް، ސީއެންއެން، ފޮކްސް އަދި އެންބީސީ ގުޅިގެން ނެރުނު ބަޔާނުގައިވެ އެވެ.

މި ކުރިމަތިލުމަކީ ޓްރަމްޕްގެ ސަރުކާރާއި ނޫސްވެރިކަމުގެ މިނިވަންކަމާ ދެމެދު ކުރިމަތިވި ވަރަށް ބޮޑު އިމްތިހާނެކެވެ. ޚާއްސަކޮށް ޗައިނާގެ ރައީސް ޝީ ޖިންޕިން ވައިޓް ހައުސްއަށް ޒިޔާރަތްކުރައްވާ މި މުހިންމު ހަފުތާގައި މިފަދަ ކަމެއް ހިނގުމުން އޭގެ ނޭދެވޭ އަސަރު ކުރާނެކަމަށް ބެލެވެ އެވެ.

މީޑިއާއަކީ 'ކެންސަރެއް' ފަދަ އެއްޗެއް

ނިއުޔޯކްގައި ބޭއްވޭ އދ. ގެ އަހަރީ ބައްދަލުވުމުގައި ޓްރަމްޕް ދުނިޔޭގެ ލީޑަރުންނާ ބައްދަލުކުރައްވާ މަންޒަރުތައް ލައިވްކޮށް ޓީވީން ނުދައްކާނެ އެވެ. އަދި ވައިޓް ހައުސްގެ ދެކުނު ފަރާތު ފެހިދަނޑުގައި ހެދި ބޮޑު ހެލިޕޭޑް ހުޅުވުމުގެ ރަސްމިއްޔާތު ދެއްކީ ހަމައެކަނި ވައިޓް ހައުސްގެ ވެބްސައިޓުންނެވެ. އެހެންނަމަވެސް، އެ މަންޒަރުތަކުގައި ޓްރަމްޕް ދެއްކެވި ވާހަކަފުޅުތައް ސާފުކޮށް އަޑެއް ނީވެ އެވެ.

މީގެ އިތުރުން، ވައިޓް ހައުސްގައި މަސައްކަތްކުރާ ފޮޓޯ އެޖެންސީތަކުން ވެސް ވަނީ، ބޭންކުރި ތިން މީޑިއާއާ އެކު ތިބިކަން ހާމަކުރުމުގެ ގޮތުން، ހެލިޕޭޑް ކައިރީގައި ޓްރަމްޕް ހުންނެވި ފޮޓޯތައް އާންމުކުރުން ފަސްކޮށްފަ އެވެ.

މި ކަންކަމާ ގުޅިގެން ޓްރަމްޕް އެއްވެސް ވަރަކަށް ދޫދެއްވާފައެއް ނުވެ އެވެ. އޭނާ ވަނީ މީޑިއާއަކީ "ކެންސަރެއް" ކަމަށާއި ގައުމީ ސަލާމަތަށް އޮތް ނުރައްކަލެއްގެ ގޮތުގައި ސިފަކުރައްވާފަ އެވެ.

"ވައިޓް ހައުސްއިން މިނިވަން ނޫސްވެރިކަމަށް ހުރަހެއް ނާޅާ، އެއީ އަޅުގަނޑު ވަރަށް ގަދަރުކުރާ ކަމެއް. އެކަމަކު މި ހަމަލާ އަމާޒުވަނީ 'ފޭކް ނިއުސް' ނުވަތަ ދޮގު ހަބަރު ފަތުރާ މީޑިއާތަކަށް. އެއީ އަޅުގަނޑުމެންގެ ލޯބިވާ އެމެރިކާގައި ކެންސަރެއް ފަދައިން ފެތުރެމުންދާ އެއްޗެއް،" ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރުތު ސޯޝަލް' ގައި އޭނާ ލިޔުއްވާފައިވެ އެވެ.

ނައިބު ރައީސް ޖޭޑީ ވެންސް ވެސް ވަނީ މީޑިއާތަކުން ފަތުރަނީ ވާތުފިޔައިގެ ޕްރޮޕެގެންޑާ ކަމަށް ތުހުމަތުކުރައްވާފަ އެވެ. "އެމީހުންނަށް އަދިވެސް ރިޕޯޓްކުރެވޭނެ، ބޭނުން އެއްޗެއް ބުނުމުގެ މިނިވަންކަން އެބައޮތް. އެކަމަކު ވައިޓް ހައުސް ތެރޭގައި ދެން އެމީހުންނަށް އޮފީހެއް ނުލިބޭނެ،" އޭނާ ވިދާޅުވި އެވެ.

ނަމަވެސް ޓްރަމްޕްގެ މި ނިންމެވުމަކީ ހަމައެކަނި އޮފީސް ޖާގަ އަތުލުމެއް ނޫނެވެ. ސީއެންއެން، އެމްއެސް ނައު އަދި ޕޮލިޓިކޯގެ ނޫސްވެރިން ހޮނިހިރު ދުވަހު ވައިޓް ހައުސްގެ ސަރަހައްދަށް ވަނުން މަނާކޮށް، އެމީހުންގެ ފާސްތައް ވަނީ އަތުލާފަ އެވެ.

މި ތިން އިދާރާއިން ކޯޓަށް ހުށަހެޅި މައްސަލާގައި ބުނެފައިވަނީ، މި އަމަލަކީ އެމެރިކާގެ ގާނޫނުއަސާސީގެ ފުރަތަމަ އިސްލާހާ ހިލާފު ކަމެއް ކަމަށެވެ. އެ އިސްލާހަކީ ނޫސްވެރިކަމުގެ މިނިވަންކަން ކަށަވަރުކޮށްދޭ މާއްދާ އެވެ. "މި ބޭންކުރުމަކީ ގާނޫނުއަސާސީގެ އަސާސްތަކާ ކަނޑައެޅިގެން ހިލާފު، ނޫސްވެރިކަމުގެ މިނިވަންކަމަށް ދިން ސީދާ ހަމަލާއެއް،" ކޯޓަށް ހުށަހެޅި ލިޔުމުގައިވެ އެވެ.

މި މައްސަލައިގެ އަޑުއެހުމެއް ބުދަ ދުވަހަށް ވަނީ ތާވަލުކޮށްފަ އެވެ.

ނޫސްވެރިންގެ ފާސްތައް އަތުލުން

ޓްރަމްޕް ކުއްލި ގޮތަކަށް މި ނިންމެވުން އިއުލާން ކުރެއްވުމުން މީޑިއާތަކަށާއި، ސަރުކާރުގެ ބައެއް އިސްވެރިންނަށް ވެސް ބޮޑު ސިހުމެއް ލިބުނެވެ.

މިގޮތަށް ނިންމެވި ސީދާ ސަބަބެއް ޓްރަމްޕް ހާމައެއް ނުކުރައްވަ އެވެ. ނަމަވެސް، ހުކުރު ދުވަހު ނޫސްވެރިއަކު ކުރި ސުވާލަކަށް ޖަވާބު ދެއްވަމުން ވިދާޅުވީ، މިއީ ވޭތުވެދިޔަ ދެ އަހަރު ދުވަހު އެ މީޑިއާތަކުން ގެނެސްދިން ހަބަރުތަކުގެ ނަތީޖާ ކަމަށެވެ. އަދި ކުރިއަށް އޮތް ތަނުގައި އެހެން މީޑިއާތަކަށް ވެސް މިފަދަ ފިޔަވަޅަކާ ކުރިމަތިލާން ޖެހިދާނެ ކަމުގެ އިންޒާރު ޓްރަމްޕް ދެއްވި އެވެ.

ކުރީގެ ރިއަލިޓީ ޓީވީ ތަރި އަދި ބިލިއަނަރު ޓްރަމްޕަކީ އޭނާގެ ކެމްޕޭނާއި ސަރުކާރަށް ފާޑުކިޔާ މީޑިއާތަކަށް އަބަދުވެސް ހަމަލާދެއްވާ ބޭފުޅެކެވެ. އޭނާ ތަކުރާރުކޮށް ވިދާޅުވަމުން ގެންދަވަނީ މީޑިއާއަކީ "ރައްޔިތުންގެ ދުޝްމަނުން" ކަމަށެވެ.

ނަމަވެސް މި ފިޔަވަޅު މި އެޅީ، ޓްރަމްޕަށް އޮތް ތާއީދު ވަރަށް ބޮޑަށް ދަށަށް ގޮސް، ކުރިއަށް އޮތް އިންތިހާބުގައި އޭނާގެ ޕާޓީއަށް މަޖިލީހުގެ އަޣުލަބިއްޔަތު ގެއްލުމުގެ ބިރު އޮތް، އަދި އީރާނުގެ ހަނގުރާމަ އެއްވެސް ކޮޅެއްގައި ނުޖެހި ދިގުލައިގެން ގޮސްފައިވާ ދަނޑިވަޅެއްގަ އެވެ.

މި ލިޔުމާ ގުޅޭ އިތުރު ލިޔުން
CNN himeneyhen bodethi baeh media thah White House ah vanun Trump manaa koffi ބޮޑެތި ބައެއް މީޑިއާތައް ވައިޓް ހައުސްއަށް ވަނުން މަނާކޮށްފި