އިނގިރޭސި ވިލާތުގެ އޮކްސްފޯޑް ޔުނިވާސިޓީއިން ކޮންމެ އަހަރަކު ވެސް ހޮވަމުން އަންނަ އަހަރުގެ އިނގިރޭސި ބަހަކަށް މިއަހަރު "ބްރެއިން ރޮޓް" ހޮވިއްޖެ އެވެ.

އޮކްސްފޯޑް ޔުނިވާސިޓީ ޕްރެސްއިން ހާމަކުރާ ގޮތުގައި "ބްރެއިން ރޮޓް" އަހަރުގެ ބަހެއްގެ ގޮތުގައި ހޮވިފައިވަނީ 37،000 އަށްވުރެ ގިނަ ބަސްތަކުގެ ތެރެއިން ހޮވިގެންނެވެ.

އަހަރުގެ ބަސް ހޮވުމުގައި އާއްމުންގެ ހިޔާލާއި އަހަރުގެ ތެރޭގައި ސޯޝަލް މީޑިއާގައި އެ ބަސް ބޭނުން ކުރެވިފައިވާ މިންވަރާއި މާހިރުންގެ ލަފައަށް ބަލަ އެވެ. އެގޮތުން ޓިކްޓޮކްގައި އެކަނި ވެސް "ބްރެއިން ރޮޓް" ހޭޝްޓެގް ބައި މިލިއަނަށްވުރެ ގިނަ ފަހަރު ބޭނުން ކޮށްފައިވާ ކަމަށް ރިޕޯޓުތައް ބުނެ އެވެ.

"ބްރެއިން ރޮޓް" ބޭނުން ކުރެވެނީ އިންސާނާގެ ވިސްނުމުގެ ބާރު ދަށްވުން ނުވަތަ އެ ބާރު ދަށްކުރުވާ ފަދަ ކަމަކަށް ނިސްބަތް ކޮށެވެ. އެގޮތުން ސޯޝަލް މީޑިއާއިން ފެންނަ ބޭނުމެއް ނެތް އެއްޗެހިން ވިސްނުމަށް އަންނަ ބަދަލުތައް ސިފަކުރަން "ބްރެއިން ރޮޓް" ބޭނުން ކުރެވެ އެވެ.

މިއަހަރުގެ "އަހަރުގެ ބަހަށް" ވާދަކުރި އެހެން ބަސްތަކުގެ ތެރޭގައި "ޑިމިއުއާ"، "ރޮމޭންޓަސީ" އަދި "ސްލޮޕް" ފަދަ ބަސްތައް ހިމެނެ އެވެ.

މީގެ ކުރީގެ އަހަރުތަކުގައި "އަހަރުގެ ބަސް"ގެ ޝަރަފު ލިބުނު ބަސްތަކުގެ ތެރެއިން "ރިޓްޒް" އަދި "ގޮބުލިން މޯޑް" ފާހަގަ ކޮށްލެވެ އެވެ.