ވިހަގަދަ ބޮއްޔެއް ކަމަށްވާ، "ކޯން ސްނެއިލް" ރަސްފަންނުން ފެންނާތީ އެކަމަށް ސަމާލުވުމަށް ތިމާވެށީގެ ދިރުންތައް ހިމާޔަތްކުރުމަށް މަސައްކަތްކުރާ ޖަމިއްޔާއެއް ކަމަށްވާ "އޯޝަންހޯލިކް މޯލްޑިވްސް" އިން އެދެފި އެވެ.

އޯޝަންހޯލިކް މޯލްޑިވްސް އިން ކުރި ޕޯސްޓެއްގައި ބުނީ މި ދުވަސްވަރު ރަސްފަންނުން ނުރައްކާތެރި ކޯން ސްނެއިލް ފެންނަމުންދާ ކަމަށެވެ. އެ އެއްޗެހި އާންމުކޮށް ފެން މައްޗަށް އަރާނީ އިރުއޮއްސޭ ވަގުތު ކަމަށާއި އެހެންކަމުން ހަވީރާއި ރޭގަނޑު އެ ސަރަހައްދަށް މޫދަން އެރެންދާ ނަމަ ސަމާލުވާން ވަނީ އެދިފަ އެވެ.

އެ ޖަމިއްޔާއިން ވަނީ މޫދަށް އެރި އުޅޭއިރު ހާއްސަކޮށް ކުޑަކުދިން ބޫޓަށް އަރައިގެން އުޅުމަށާއި ވިލުގައި ހުސްފަޔާ ނޫޅުމަށް އިލްތިމާސްކޮށްފަ އެވެ.

އޯޝަންހޯލިކް ޖަމިއްޔާއިން ބުނިގޮތުގައި ބޮލީގެ ބާވަތާއި ސައިޒަށް ބަލާފައި މިއީ ވަރަށް ވިހަގަދަ އަދި ބައެއް ފަހަރު ފުރާނައަށް ވެސް ނުރައްކާތެރި އެއްޗަކަށް ވެދާނެ އެވެ.

"ކޯން ސްނެއިލް"ގެ ވިހާގައި ކޮމްޕްލެކްސް މިކްސްޗަރެއްގެ ވިހަ މާއްދާތަކެއް ހިމެނޭއިރު، އޭގެ ތެރެއިން ބައެއް ވިހަ މާއްދާތަކަކީ އިންސާނުންނަށް ނުރައްކާތެރި މާއްދާތަކެކެވެ. މި ސްނެއިލް ޝިކާރައަށް ހަމަލާ ދެނީ އޭތީގެ ބޮލުގައި އިންނަ ދަތަކުންނެވެ. ބައެއް ފަހަރު އޭގެ ވިހައިގެ ސަބަބުން ޝިކާރަ ވާކޮށްލާ ނުވަތަ މަރާލަ އެވެ.