ސަރުކާރު އިދާރާތަކުގެ ރިކޯޑްތައް ރައްކާތެރިކަމާއެކު ނުބެލެހެއްޓުމަކީ ބޮޑު އިހުމާލެއް ކަމަަށް މޯލްޑިވްސް ރިފޯމް މޫވްމަންޓްގެ ރައީސް ފާރިސް މައުމޫން ވިދާޅުވެއްޖެ އެވެ.

ފާރިސް މިހެން ވިދާޅުވެފައިވަނީ ބުރާސްފަތި ދުވަހު ހިނގި އަލިފާނުގެ ހާދިސާގައި ހައުސިން މިނިސްޓްރީގެ ސާވާ ސަލާމަތް ނުކުރެވި އެ މިނިސްޓްރީން ކުރިއަށްގެންދާ ހުރިހާ މަޝްރޫއުއެއްގެ މައުލޫމާތު ގެއްލިފައިވާ ކަމަށް މިނިސްޓަރު ޑރ. އަލީ ހައިދަރު އަހުމަދު ވިދާޅުވުމާއި ގުޅިގެންނެވެ.

މިކަމާއި ގުޅިގެން ފާރިސް މިއަދު ކުރެއްވި އެކްސް ޕޯސްޓުގައި ވިދާޅުވީ މިއީ 2024 ވަނަ އަހަރު ކަމަށާއި އެންމެ ކުޑަމިނުން ސަރުކާރުގެ ފަރާތުން އާންމު ރެކޯޑުތަކުގެ ކްލައުޑް ނުވަތަ އޮފްސައިޓް ބެކަޕެއް ނުބެހެއްޓުމަކީ، ޖިނާއީ އިހުމާލެއް ކަމަށެވެ.

މިނިސްޓަރު ހައިދަރު އިއްޔެ ވިދާޅުވީ އެ މިނިސްޓްރީގެ ހުރިހާ ލިޔެކިޔުމަކާއި ޑޭޓާތައް އަލިފާނުގެ ހާދިސާގައި އެއްކޮށް ނެތިގޮސްފައިވާ ކަމަށެވެ.

ބުރާސްފަތި ދުވަހު ހިނގި އަލިފާނުގެ ހާދިސާގައި ސަރުކާރުގެ މުުހިއްމު ތިން މިނިސްޓްރީއެއް ވަނީ ބޭނުން ނުކުރެވޭވަރަށް އަނދާފަ އެވެ. އޭގެތެރޭގައި ހައުސިން މިނިސްޓްރީ، ޕްލޭނިން މިނިސްޓްރީ އަދި އެންވާރަމެންޓް މިނިސްޓްރީ ހިމެނެ އެވެ.

ފާހަގަކޮށްލެވޭ ގޮތުގައި ސަރުކާރުގެ ރިކޯޑްތައް ނުވަތަ ޑާޓާ ރައްކާކޮށް ބެލެހެއްޓުމަށް ހާއްސަ އިދާރާ އެންސީއަޓީވެސް ހުރެ އެވެ. ނަމަވެސް ހައުސިން މިނިސްޓްރީން އެތަނުގައި އޮފްސައިޓް ބެކަޕް ރައްކާކޮށްފައި ނުވާ ސަބަބު ސާފެއްނުވެ އެވެ.