މުވައްޒަފުން ލައްވާ "އަޅު މަސައްކަތް" ކުރިކަމުގެ ތުހުމަތުގައި ބްރެޒިލްގައި ހުންނަ އިލެކްޓްރިކް ކާރު ބްރޭންޑް "ބީވައިޑީ"ގެ ފެކްޓްރީގެ ބަންދުކޮށްފި އެވެ.

ބަންދުކޮށްފައި ވަނީ ބްރެޒިލްގެ އުތުރުގެ ސްޓޭޓެއް ކަމަށްވާ ބާހިއާ ހުންނަ ފެކްޓްރީއެކެވެ.

ބްރެޒިލްގެ ޕްރޮސެކިއުޓާ އޮފީހުން ބުނި ގޮތުގައި އެ ފެކްޓްރީއިން ވަނީ 160 މަސައްކަތްތެރިން ފެނިފަ އެވެ. އަދި އެ މަސައްކަތްތެރިން ފެނިފައިވާ މާހައުލަކީ އިންސާނުން ދިރިއުޅެން އަދި މަސައްކަތް ކުރަން ވެސް އެކަށޭނެ މާހައުލެއް ނޫން ކަމަށް އެ އޮފީހުން ބުނެފައިވެ އެވެ.

އޭގެ އިތުރުން އެ ފެކްޓްރީ ހިންގާ ކުންފުނިން ވަނީ އެމީހުންގެ މުސާރަތަކާއި ޕާސްޕޯޓްތައް ވެސް ހިފަހައްޓާފަ އެވެ. މިހާރު ހުރިހާ މަސައްކަތެރިން ރައްކާތެރި ތަންތަނަށް ބަދަލުކުރެވިފައިވާ ކަމަށް ޕްރޮސެކިއުޓާ އޮފީހުން ބުނެ އެވެ.

މި މައްސަލައާއި ގުޅިގެން ޗައިނާއަށް ނިސްބަތްވާ ބިލީވް ޔޯ ޑްރީމްސް (ބީވައިޑީ) ކުންފުނިން ވަނީ ފެކްޓްރީ ހިންގާ ކުންފުންޏާ މިހާރު ގުޅުން ކަނޑާލާފައިވާ ކަމަށް ބުނެފަ އެވެ.

އަންނަ އަހަރު މާޗް މަހު ހުޅުމަށް ހަމަޖެހިފައިވާ މި ފެކްޓްރީއަކީ "ބީވައިޑީ"ގެ ފުރަތަމަ އޭޝިއާއިން ބޭރުގައި އޮޕަރޭޓް ކުރުމަށް ހަަމަޖެހިފައިވާ ފެކްޓްރީ އެވެ.

ޗައިނާގެ އިލެކްޓްރިކް ވެހިކަލް ބްރޭންޑް "ބީވައިޑީ" އަކީ ދުނިޔޭގެ އެއްވަނަ އިލެކްޓްރިކް ވެހިކަލް ބްރޭންޑެވެ. މި ބްރޭންޑަކީ އިލޮން މަސްކް އުފެއްދި "ޓެސްލާ"ގެ އެންމެ ވަރުގަދަ ވާދަވެރިއާ އެވެ.