ސަރުކާރު ހިންގާ ޕީއެންސީއަށް ވަގު ފޯމު ހުށަހެޅުމުގައި އިސްކޮށް އުޅެނީ ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން އަލީ އާއި ސީނީއާ ޕޮލިޓިކަލް ޑިރެކްޓަރު ސުއޫދާ އަބްދުﷲ ކަން ކާމަވެއްޖެ އެވެ.

ފަހަކަށް އައިސް މީހުންނަށް ނޭނގި އެ މީހުން ޕީއެންސީއަށް ވަައްދާ މައްސަލަ ވަނީ އިތުރުވެފަ އެވެ. އެގޮތުން މުހައްމަދު އައިޝް ނަކަމަށް ކިޔާ މީހަކު ޕީއެންސީއަށް ވެއްދުމަށް ފުރާފައިވާ ވަގު ފޯމު ސޯޝަލް މީޑިއާގައި މިހާރު ވަނީ އާންމުކޮށްފަ އެވެ.އައިޝްގެ ނަމުގައި ފުރި ވަގު ފޯމުގައި އައިޑީކާޑްގައިވާ ފޮޓޯ ހިމަނާފައިވެ އެވެ. އެ ފޮޓޯ ލިބޭނީ ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)ގެ ޑާޓާ ބޭސްއިން އެކަންޏެވެ.

އެ ފޯމުގައި ފިންގާޕްރިންޓް ޖަހައި ހެކިވެރިއެއްގެ ގޮތުގައި ސޮއިކޮށްފައި ވަނީ ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން އަލީ އާއި ސީނީއާ ޕޮލިޓިކަލް ޑިރެކްޓަރު ސުއޫދާ އަބްދުﷲ އެވެ.

ހޯމް މިނިސްޓްރީ ތެރޭގައި ފޯމު ފުރުމުގެ މަސައްކަތް ކުރިއަށްދާ ފޮޓޯތަކެއް ވެސް ވަނީ ސޯޝަލް މީޑިއާގައި އާންމުވެފަ އެވެ. އެ ފޮޓޯތަކުން ހަސަން އަލީ އާއި ސުއޫދާ ވެސް އެކަމުގައި އުޅެނިކޮށް ފެނެ އެވެ.

ޕީއެންސީގެ މެމްބާޝިޕް ފޯމް ފުރުން ހޯމް މިނިސްޓްރީ ތެރޭގައި ކުރަނީ --

އެ ވަގު ފޯމުގައި ކޮށްފައި ވަނީ އައިޑީކާޑްގައިވާ އައިޝްގެ ސޮޔާ ވައްތަރު ސޮޔެކެވެ. އެހެންކަމުން ޕީއެންސީއަށް މެމްބަރުން ވެއްދުމުގައި ޑީއެންއާރްގައިވާ ދިވެހި ރައްޔިތުންގެ ޒާތީ މައުލޫމާތުތަކުގެ ބޭނުން ނަހަމަގޮތުގައި ބޭނުންކުރާކަން މިވަނީ ސާބިތުވެފަ އެވެ. އެ ވަގު ފޯމުގައި އެ ފޯމަށް ޒިންމާވާކަމުގައި ސޮއިކުރައްވާފައި ވަނީ އެ ޕާޓީގެ ރަޖިސްޓްރާ އަދި ކެނދިކުޅުދޫ ދާއިރާގެ މަޖިލިސް މެމްބަރު މުހައްމަދު އަފޫ ހާމިދެވެ.

ހޯމް މިނިސްޓްރީގައި ފުރި ފޯމްތަކުގެ ތެރޭގައި ވަގު ފޯމުތަކެއް ވެސް ހިމެނޭއިރު، އެ ހުރިހާ ފޯމެއް ޕީއެންސީއާ ހަވާލުކުރެއްވީ މިނިސްޓަރު އަލީ އިހްސާނެވެ. ޕީއެންސީގެ ފަރާތުން ފޯމްތަކާ ހަވާލުވެފައި ވަނީ ސެކްރެޓަރީ ޖެނެރަލް ޒީނާޒް އަދުނާނެވެ.

ޕީއެންސީއަށް ސޮއިކުރި މީހުންގެ ފޯމްތައް އިހްސާން އެ ޕާޓީގެ ރަޖިސްޓްރާއާ ހަވާލުކުރަނީ: މީގެތެރޭގައި ވަގު ފޯމްތަކެއް ވެސް ހިމެނޭ --- ފޮޓޯ: ޕީއެންސީ

ކުރީގެ މިނިސްޓަރު އަދި ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލުގެ އަނބިކަނބަލުން ވެސް ވަގަށް ޕީއެންސީއަށް ވައްދާފައިވާކަން އިއްޔެ ވަނީ ފަޅާއަރައިފަ އެވެ.

ޕާޓީތަކުން ހުށަހަޅާ މެމްބާޝިޕް ފޯމްތަކުގެ ސައްހަކަން ކަށަވަރުކުރުމަށްޓަކައި އެ މީހެއްގެ މޮބައިލް ފޯނަށް ލިންކެއް މެދުވެރިކޮށް އޮންލައިން ފޯމެއް އިލެކްޝަންސް ކޮމިޝަނުން ފޮނުވަ އެވެ. އެ ފޯމްގައި ފުރަންޖެހޭ ގިނަ ބައިތަކެއް ހުރުމާއި އެ ފޯމް ފުރުމުގައި އުނދަގޫތަކެއް ހުރުމުން ގިނަ ބަޔަކު ޝަކުވާއެއް ނުކުރެ އެވެ. މިފަދަ ކަންތައްތައް ތަޖުރިބާކޮށްފައިވާ ބައެއް މީހުން ވަނީ "ހުރިހާ"އަށް އެކަންތައްތައް ކިޔައިދީފަ އެވެ.

"އަޅުގަނޑުގެ ނަމުގައި ޕީއެންސީގެ މެމްބާޝިޕް ފޯމެއް އިލެކްޝަންސް ކޮމިޝަނަށް ހުށަހެޅީމަ އެކަން ކަށަވަރުކުރަން އަޅުގަނޑުގެ ބަހެއް ދެއްތޯ ހޯދަންޖެހޭނީ. އަޅުގަނޑުގެ ބަސް ހޯދުމަށް ކަމަށް ބުނެ އުނދަގޫ އޮންލައިން ފޯމެއް ފޮނުވީމަ ކިހިނެތްތޯ އެކަން ކުރަނީ. އަޅުގަނޑުގެ ނަމުގައި ވަގު ފޯމު ހުށަހެޅީމަ އެކަމުގެ ތަކުލީފު ވެސް މިޖެހެނީ އަޅުގަނޑަށް. މިއީ ކިހާ ދެވަރުކަމެއްތޯ،" ޕީއެންސީގެ މައްސަލަ ތަޖުރިބާކުރި މީހަކު ކިޔައިދިނެވެ.

މީގެއިތުރުން އެމްޑީޕީގެ ގައުމީ މަޖިލީހުގެ މަނަދޫ ދާއިރާގެ ރައީސް އަދި މަނަދޫ ދާއިރާގެ ކުރީގެ މަޖިލިސް މެމްބަރު މުހައްމަދު ތޯރިގު ވަގަށް ޕީއެންސީއަށް ވައްދާފައިވާ މައްސަލަ ތަހުގީގުކޮށްދިނުމަށް އެދި އޭނާ ވަނީ ފުލުހުންގެ އިދާރާއަށް މައްސަލަ ހުށަހަޅާފަ އެވެ. ނަމަވެސް އެ މައްސަލަ ތަހުގީގުކުރަން ނިންމި ކަމެއް މިހާތަނަށް ފުލުހުން ބުނެފައެއްނުވެ އެވެ.

ޕީއެންސީގެ މެމްބަރުންގެ އަދަދު 100،000 އަށް އަރުވަން ރައީސް ޑރ. މުހައްމަދު މުއިއްޒު ވަނީ އަންގަވާފަ އެވެ.