ތެޔޮ ބަރުކޮށްގެން ދަތުރު ކުރަނިކޮށް ގއ. ނިލަންދޫ ފަރަށް އެރި އެފްއެސްއެމްގެ ބޯޓު ފުންކޮށްފި އެވެ.

ގއ. އަދި ގދ. އަތޮޅުގެ ރަށްތަކަށް ތެޔޮ ފޯރުކޮށްދޭ އެ ބޯޓު ނިލަންދޫ ހުޅަނގު އުތުރު ފަރާތު ފަރަށް އެރީ މިދިޔަ އާދިއްތަ ދުވަހު އެވެ.

އެ ދުވަހު އިރުއޮއްސި 6:00 ހާއިރު އެ ކުންފުނީގެ އިތުރު ބޯޓެއް ގެންގޮސްގެން އެ ބޯޓު ފުންކޮށްފައިވާ ކަމަށް ނިލަންދޫ ކައުންސިލުން ހާމަކޮށްފައިވެ އެވެ.

މި ހާދިސާގައި ފަރަށް ބޮޑެތި ގެއްލުންތަކެއް ވަނީ ލިބިފައިވާކަމަށް ކައުންސިލުން ބުނެ އެވެ. އެގޮތުން 4-5 ފޫޓު ފުންކޮށް އަދި 100 ފޫޓެއްހާ ހިސާބު ތަންގަނޑަކަށް ފަރަށް ގެއްލުންވެފައިވާކަމަށް އެ ކައުންސިލުން ބުންޏެވެ.

ލިބުނު ގެއްލުންތަކާއި އެޅޭނެ ފިޔަވަޅުތައް ބެލުމަށް އެންވަޔަރުމެންޓް ޕްރޮޓެކްޝަން އެޖަންސީ (އީޕީއޭ)އާ ދަނީ މަޝްވަރާކުރަމުންނެވެ.

ފާހަގަކޮށްލެވޭގޮތުގައި މިފަދަ ހާދިސާތަކާއި ގުޅިގެން ފަރަށް އަރައިގެން ލިބޭ ގެއްލުންތަކުގައި ބޮޑެތި އަދަދުތަކުން އީޕީއޭ އިން ޖޫރިމަނާ ކުރެ އެވެ.