އަލްހިޖްރަ ގްރޫޕްގެ ހަވާލުގައި ރާއްޖެއިން އުމްރާއަށް ދިޔަ 24 މީހަކު ރާއްޖެ ނާދެވި ސައުދިއަރަބިއާގައި ތާށިވެއްޖެ އެވެ.

އަލްހިޖްރަ އުމްރާ ގްރޫޕުގެ ހަވާލުގައި ދިޔަ 18 އުމްރާވެރިއަކު ދިޔައީ އެ ގްރޫޕަށް ފައިސާ ދައްކައިގެންނެވެ. އަދި ބާކީ ހަ މީހުންނަކީ އެހީތެރިންނާއި ސްޕޮންސާގެ ގޮތުގައި ފޮނުވި މީހުންނެވެ.

"ހުރިހާ"އަށް އެނގިފައިވާގޮތުގައި އެ މީހުން ތާށިވީ ޓިކެޓް ނެގޭނެ ގޮތެއް ނުވެގެންނެވެ. އެ 24 މީހުން އަނބުރާ ރާއްޖެ ގެނައުމަށް ޓިކެޓަށް ހަރަދުވާ 180،000 ރުފިޔާ ހޯދުމުގެ މަސައްކަތް އެ ގްރޫޕުން އަންނަނީ ކުރަމުންނެވެ.

އުމްރާއަށް ގޮސްހުރި މީހަކު ކިޔައިދިންގޮތުގައި ފުރަތަމަ ހަމަޖެހިފައި ވަނީ މިދިޔަ އާދީއްތަ ދުވަހު ފުރާގޮތަށެވެ. ނަމަވެސް ޓިކެޓް ނުނެގިގެން އަދިވެސް ފުރޭގޮތެއް ނުވެ އެވެ.

އެ މީހުން އުމްރާއަށް ފުރިއިރު ވެސް ޓިކެޓާއި ވިސާގެ މައްސަލަ ޖެހިފައިވާ ކަމަށް އޭނާ ކިޔައިދިނެވެ.

އެމީހުން ފުރުވާލަން ވެސް ޖެހުނީ އެކި ފްލެޓްތަކުން އެކި ދުވަސްތަކުގައި ކަމަށް މައުލޫމާތު ލިބެ އެވެ.

އަލްހިޖްރަ ގްރޫޕުން ބުނީ ކުންފުންޏަށް ދިމާވެފައިވާ މާލީ ދަތިތަކާހުރެ އުމްރާވެރިން ރާއްޖެ ގެނެވޭނެގޮތެއް އަދި ނުވާ ކަމަށެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެ މިނިސްޓްރީގެ ސަމާލުކަމަށް އެކަން އައިސްފައިވާތީ، ވަރަށް ގާތުން އެކަން ބަލަމުން އަންނަ ކަމަށެވެ. އަދި އެ މީހުން ރާއްޖެ ގެނައުމަށްޓަކައި ކޮށްދެވެން އޮތްކަމެއް ސަރުކާރުން ކުރާނެ ކަމަށް ވެސް ޝަހީމް ވިދާޅުވި އެވެ.