ރާއްޖެ ބަލި (އާތުރައިޓިސް)އަކީ މުޅި ދުނިޔޭގައިވެސް ވަރަށް އާންމު ސިއްހީ މައްސަލައެކެވެ. ނަމަވެސް، މި ބައްޔާ ގުޅޭގޮތުން މީހުންގެ މެދުގައި އާއްމުކޮށް ކުރެވޭ ކުށްހީތަކެއް ހުރެ އެވެ.

ސަރުވޯދަޔާ ހޮސްޕިޓަލުގެ އޯތޯޕެޑިކްސް އަދި ރޮބޮޓިކް ޖޮއިންޓް ރިޕްލޭސްމަންޓްގެ އެސޯސިއޭޓް ޑިރެކްޓަރު ޑރ. އަންކުރު ސިންގް ވަނީ މި ބައްޔާ ގުޅޭގޮތުން ކުރެވޭ ތަފާތު ފަސް ކުށްހީއެއްގެ ހަގީގަތް ހާމަ ކުރައްވާފަ އެވެ.

1. ދުންފަތުގެ އިސްތިއުމާލު ކުރުމާ ރާއްޖެ ބައްޔާ ހުރި ގުޅުން

ދުންފަތުގެ އިސްތިއުމާލު ކުރުމަކީ ރާއްޖެ ބަލި ޖެހުމުގެ ފުރުސަތު ބޮޑުކޮށްދޭ އަދި ބަލި ހުރިނަމަ އެކަން އިތުރަށް ގޯސްކޮށްދޭ ކަމެކެވެ. ސިނގިރޭޓް ބުއިމުގެ ސަބަބުން ހަށިގަނޑުގެ ސެލްތަކަށް ލޭ ފޯރުކޮށްދިނުން ކުޑަވެ، ކަށިތަކުގެ ދުޅަހެޔޮކަމަށް އަސަރުކޮށް، ދޭ ފަރުވާގެ އަސަރު ކުޑަކޮށްދެ އެވެ.

2. އުމުރާއެކު މުޖައްރިބު ކަމެއް؟

އުމުރުން ދުވަސްވުމަކީ ބަލީގެ ފުރުސަތު ބޮޑުވާ ކަމެއް ކަމުގައިވިޔަސް، މިއީ އުމުރުން ދުވަސްވާ ކޮންމެ މީހަކަށް ކޮންމެހެން ޖެހެން ޖެހޭ ބައްޔެއް ނޫނެވެ. ބަރުދަން އެއްވަރެއްގައި ހިފެހެއްޓުމާއި، ކަސްރަތުކުރުމާއި، ކަށިތަކަށް އަނިޔާވިޔަ ނުދީ ރައްކާތެރިވުމުން އުމުރުން ދުވަސްވާއިރުވެސް މި ބަލިން ރައްކާތެރި ވެވިދާނެ އެވެ.

3. ކަސްރަތު ކުރުމަކީ ހާލަތު ގޯސްވާ ކަމެއް؟

އެކަށީގެންވާ ގޮތެއްގައި ކުރާ ކަސްރަތަކީ އާތުރައިޓިސް ހުންނަ މީހުންނަށް ވަރަށް ފައިދާހުރި ކަމެކެވެ. ހިނގުން، ފެތުން، ސައިކަލު ދުއްވުން އަދި މަސްތައް ވަރުގަދަކުރާ ކަސްރަތުތަކުގެ ސަބަބުން ކަށިތަކުގެ ވަށައިގެންވާ މަސްތައް ވަރުގަދަވެ، ކަށިތަކުގެ ހަރަކާތްތެރިކަން އިތުރުވެގެންދެއެވެ.

4. އެންމެ ރަނގަޅު ފަރުވާއަކީ އަރާމު ކުރުމެއް ނޫން!

ގިނަ ދުވަސްވަންދެން އެއްވެސް ހަރަކާތެއް ނުކޮށް އޮތުމަކީ މަސްތައް ވަރުދެރަވެ، ކަށިތައް ހަރަކާތް ކުރަން އުނދަގޫވާ ކަމެކެވެ. ތަދު ބޮޑުވާ ވަގުތުތަކުގައި ކަސްރަތުތަކުގެ މިންވަރު މަދުކޮށްލި ކަމުގައިވިޔަސް، މުޅިން ހަރަކާތް ހުއްޓާލުމަކީ ބަލި އިތުރަށް ގޯސްވާނެ ކަމެކެވެ.

5. އިނގިލިތަކުގެ ކަށި ގޮއްވުމުން ބަލި ޖެހޭ؟

ގިނަ ބަޔަކު ގަބޫލުކުރާ ގޮތާ ހިލާފަށް، އިނގިލިތަކުގެ ކަށި ގޮއްވުމަކީ އާތުރައިޓިސް ޖެހެން މެދުވެރިވާ ކަމެއްކަން ސައިންސާއި ސިއްހީ ދިރާސާތަކުން ސާބިތުވެފައެއް ނުވެ އެވެ.

ޑރ. އަންކުރު ސިންގް އިރުޝާދު ދެއްވަނީ، އާތުރައިޓިސްގެ އަލާމާތެއް ފެނިއްޖެނަމަ އަމިއްލަ ގަބޫލު ކުރުންތަކަށް ބެލުމުގެ ބަދަލުގައި، އަވަހަށް ކަށީގެ ޑޮކްޓަރަކަށް ދައްކައި ސައްހަ މައުލޫމާތާއި ފަރުވާ ހޯދުމަށެވެ.