ހާއްސަ ހުއްދައާއިއެކު ހދ. ކުޅުދުއްފުއްޓަށް ދިޔަ މީހަކު ކޮވިޑަށް ޕޮޒިޓިވްވެއްޖެ އެވެ.

އެމީހާ އަކީ ރާއްޖެއިން ބޭރުން އައިސް މާލޭގައި މަޑުކުރުމަށްފަހު ކުޅުދުއްފުއްޓަށް ދިޔަ 28 އަހަރުގެ ބިދޭސީ ފިރިހެނެއް ކަމަށް މައުލޫމާތު ލިބިފައިވެ އެވެ.

އެ މީހާ ރާއްޖެ އައީ 72 ގަޑިއިރު ނުވާ ޕީސީއާރު ޓެސްޓަކާއެކު އެވެ. އަދި ރާއްޖެ އައިފަހުން މާލެއިން ވެސް އެ މީހާގެ ސާމްޕަލް ނަގާފައިވެ އެވެ. ނަމަވެސް، އެ މީހާގެ ކޮވިޑް ޓެސްޓުގެ ނަތީޖާ ލިބުނީ ކުޅުދުއްފުއްޓަށް ދިޔަތާ ކުޑަ އިރުކޮޅެއްފަހުން ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުންޏެވެ.

މީގެ އިތުރުން، އެ ހޮސްޕިޓަލުން ބުނިގޮތުގައި ޓެސްޓްގެ ނަތީޖާ ލިބުމާ ދެމެދު އެ މީހާ ގޮސްފައި ވަނީ ހަމަ އެކަނި އެއާޕޯޓުން ގެސްޓްހައުސް އަށެވެ. އަދި އެ މީހާ ވަނީ ގައިޑްލައިނާ އެއްގޮތަށް އަމަލުކޮށްފަ އެވެ.

އެ ބިދޭސީއަކީ އެރަށުގައި ހިންގާ ބޭކަރީއެއްގެ މެޝިނަކަށް ދިމާވި މައްސަލައެއް ހައްލުކުރުމަށް ގެންދިޔަ މީހެކެވެ. އަދި މި މީހާ މިހާރު ވަނީ ކަރަންޓީންކޮށްފަ އެވެ.

ހާއްސަ ހުއްދައިގެ ދަށުން ދަތުރުކުރެވޭނީ ނެގެޓިވް ޕީސީއާރު ޓެސްޓަކާއެކު އެވެ. ނަމަވެސް، އާންމު ރައްޔިތުންނާއެކު އުޅުމަކީ ގައިޑްލައިނާ ޚިލާފުކަމެކެވެ.