ވަގަށް ރާއްޖެއިން ބޭރަށް ބައި ޓަނުގެ މަޑި މަހާއި މިޔަރު މަސް ބޭރު ކުރަން އުޅުނީ "ދަ ކްރިސްޓަލް ކޮމްޕެނީ" ނަމަކަށް ކިޔާ ކުންފުންޏަކުން ކަމަށް ކަސްޓަމްސްއިން ބުނެފި އެވެ.

ކަސްޓަމްސްއިން ރޭ ބުނީ މިދިޔަ އަހަރުގެ ނޮވެމްބަރު މަހު ގައި ކަސްޓަމްސްއިން ބަލާ ފާސްކުރި މުދާ ޝިޕްމެންޓެއްގެ ތެރެއިން މިޔަރު މަހާއި މަޑި މަސް ހުރި 45 ފޮށިގަނޑު ފެނިފައިވާ ކަމަށެވެ. އެތަކެތީގެ ބަރުދަނުގައި 582 ކިލޯ ހުރި ކަމަށް ވެސް ކަސްޓަމްސްއިން ބުންޏެވެ.

"މި ޝިޕްމެންޓް ކަސްޓަމްސްއަށް ޑިކްލެއާ ކޮށްފައި ވަނީ ދަ ކްރިސްޓަލް ކޮމްޕެނީ ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކުން،" ކަސްޓަމްސް އިން އެކްސްގައި ކުރި ޕޯސްޓްގައި ބުނެފައިވެ އެވެ.

ފާހަގަކޮށްލެވޭ ގޮތުގައި "ދަ ކްރިސްޓަލް ކޮމްޕެނީ" ގެ ހިއްސާދާރުންގެ ގޮތުގައި ތިބީ ދިވެހި ފިލްމު ޑައިރެކްޓަރު، ފާތިމަތު ނަހުލާ އާއި އޭނާގެ ފިރިމީހާ ހަސަން ސިނާން އެވެ. އަދި އެ ވިޔަފާރި ރަޖިސްޓްރީކޮށްފައި އޮތީ ނަހުލާގެ ގޭގަ އެވެ.

ކަސްޓަމްސްއިން ވަނީ ވަގަށް ބޭރު ކުރަން އުޅެނިކޮށް އަތުލައިގެން މަޑި މަހާއި މިޔަރު މަސްތައް މިދިޔަ ޑިސެމްބަރު މަހު ނައްތާލާފައިވާ ކަމަށެވެ.

މަޑި މަހާއި މިޔަރު މަހަކީ ރާއްޖޭގައި ބޭނުމާއި އޭގެ ވިޔަފާރި ކުރުން ވެސް މަނާ ބާވަތްތަކެކެވެ.