އަވަށްޓެރި އިންޑިއާއިން ނިޕާ ވައިރަހަށް ޕޮޒިޓިވް މީހުންތަކެއް ފެނުނު ނަމަވެސް އެ ވައިރަހުގެ ނުރައްކާ ރާއްޖެއަށް އަދި ކުޑަކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.

މި ނިމުނު ޗުއްޓީ ފަދަ ދުވަސްތަކާ ދިމާކޮށް، ދިވެހީން އާންމުކޮށް ދަތުރުކުރާ އިންޑިއާއިން މި މަހު ވަނީ ނިޕާ ވައިރަހުގެ ކޭސްތަކެއް ފެނިފަ އެވެ. އެގޮތުން އިންޑިއާގެ ވެސްޓް ބެންގާލްއިން ނިޕާ ވައިރަހަށް ޕޮޒިޓިވް ތިން މީހަކު ވަނީ ފެނިފަ އެވެ. މީގެ ކުރީ އަހަރުތަކުގައި ނިޕާ ވައިރަހުގެ ކޭސްތަކެއް އިންޑިއާއާއި އެހެން ގައުމުތަކުން ވެސް ފެނިފައިވެ އެވެ.

އެޗްޕީއޭއިން ބުނީ، ވެސްޓް ބެންގާލްއިން ނިޕާ ވައިރަހަށް ޕޮޒިޓިވްވި މީހުންނާ ކޮންޓެކްޓުވި 180އަށް ވުރެ ގިނަ މީހުން ދެނެގަނެވި އެ މީހުން މިހާރު ކަރަންޓުކޮށްފައިވާ ކަމަށެވެ. އަދި ކަރަންޓީނު ކޮށްފައިވާ މީހުންގެ ހާލަތު ދަނީ އެ ގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުން ކަމަށް އެ އިދާރާއިން ބުންޏެވެ.

މީގެ އިތުރުން ބަލި ޖެހިގެން އިތުރު ކޭސްއެއް މިއަދާ ހަމައަށް ފެނިފައިނުވާއިރު، މި ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން އެ ބަލި ފެނިފައިވާ ކަމުގެ ރިޕޯޓެއް ކޮށްފައި ނުވާ ކަމަށް އެޗްޕީއޭއިން ބުންޏެވެ.

އެ އިދާރާއިން ބުނީ، މި ވަގުތު ރާއްޖެއަށް މި ބަލީގެ ނުރައްކާ އޮތް މިންވަރު ކުޑަ ނަމަވެސް، އެ އިދާރާއިން ދަނީ ހާލަތު މޮނިޓާ ކުރަމުން ކަމަށެވެ.

"އަދި މި ބައްޔާ ގުޅޭ ގޮތުން އެއްވެސް ކޭސްއެއް އަދި ކޮންޓެކްޓުވި އެއްވެސް ފަރާތެއް މި އޭޖެންސީއަށް ރިޕޯޓުކޮށްފައިނުވެއެވެ." އެޗްޕީއޭއިން ބުންޏެވެ.

އެހެންނަމަވެސް، ބަލި ފެނިފައިވާ ވެސްޓް ބެންގާލް ސަރަހައްދަށް ދަތުރުކުރާ ފަރާތްތަކުން އެކަމަށް ސަމާލުކަން ދިނުން މުހިންމު ކަމަށް އެ އިދާރާއިން ބުންޏެވެ. އަދި އާންމު ސިއްހަތު ރައްކާތެރިކުރުމަށް އަޅަން ޖެހޭ ފިޔަވަޅުތައް، ކަމާ ގުޅޭ އިދާރާތަކާއި ސިއްހީ ޚިދުމަތްދޭ ތަންތަނާ ގުޅިގެން އެ އޭޖެންސީން އަޅަމުން އަންނަ ކަމަށް އެޗްޕީއޭއިން ބުންޏެވެ.

ނިޕާ ވައިރަހަކީ ޓެރަޕޯސް އާއިލާގެ ވާލުންނާއި އޫރުން އިންސާނުންނަށް ފެތުރޭ ބައްޔެކެވެ. މި ބާވަތުގެ ވާ ކައިފައިޗާ މޭވާ ނުވަތަ ވާލުގެ ކުޅު ނުވަތަ ކުޑަކަމުދާ އެއްޗެހި ޖެހިފައިވާ މޭވާއާއި ތަރުކާރީ ފަދަ ތަކެތި ބޭނުން ކުރުމުން އިންސާނުންނަށް ބަލި ފެތުރެއެވެ. އަދި ބަލި ޖެހިފައިވާ މީހުންނާ ގާތްކޮށް އުޅޭ ފަރާތްތަކަށް ވެސް ބަލި ފެތުރުމުގެ ފުރުސަތު އޮވެ އެވެ.

ބަލި ޖެހޭ މީހުންގެ ފަރާތުން އާންމުކޮށް ފެންނަ އާންމު އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން، ކަރުގައި ރިއްސުން އަދި ނޭވާލާބް އުނދަގޫވުން ހިމެނެއެވެ. މީގެ އިތުރު ބަލި ބޮޑުވަމުންދާ ވަރކަށް ބައެެއް މީހުންގެ ސިކުނޑިއަށް އަސަރުކޮށް، ވާނުވާ ނޭނގުން، ނުވަތަ ފިޓު ޖެހުން ހިމެނެއެވެ. އެ ބަލި ޖެހޭ ބައެއް މީހުންނަށް އެއްވެސް އަލާމާތެއް ނުފެނި ވެސް ހިނގައިދާނެއެވެ.

ނިފާ ވައިރަސް އަށް ވަކި ހާއްސަ ފަރުވާއެއް ނެތް ނަމަވެސް ބަލީގެ އަލާމާތްތަކަށް ފަރުވާ ކުރެވެއެވެ.

އިންޑިއާއިން ނިޕާ ވައިރަހުގެ ކޭސްތައް ފެނުމާ ގުޅިގެން މި ސަރަހައްދުގެ ބައެއް ގައުމުތަކުގެ އެއާޕޯޓުތަކުގައި ހެލްތު ސްކްރީނިން ފިޔަވަޅުތައް ވަނީ ވަރުގަދަކޮށްފައެވެ. އެގޮތުން ތައިލެންޑާއި ނޭޕާލާއި ޓައިވާން ފަދަ ގައުމުތަކުން ވަނީ އިންޑިއާއިން އަންނަ ފަސިންޖަރުން ސްކްރީން ކުރުމުގެ ހަރުކަށި އުސޫލުތަކަށް އަމަލުކުރަން ފަށައިފަ އެވެ.